Efesliler 6 bob
1 Ha'y balalar, İyemizge tiyisli bolg'an sizler, ata-anan'ızg'a boysının'lar! Sebebi usılay islegenin'iz durıs boladı.
2 «Ata-anan'dı hu'rmetle», – bul wa'de menen birge berilgen baslı buyrıq.
3 Sol wa'de bolsa mınaday: «Sonda sen bereket tabasan' ha'm jerdegi o'mirin' uzaq boladı».
4 Ha'y a'keler, balaların'ızdın' ashıwın keltirmen'ler. Olardı İyemizdin' ta'lim-ta'rbiyası menen o'sirin'ler.
5 Ha'y qullar, du'nyadag'ı xojayınların'ızdın' so'zin Masixtın' so'zin tın'lag'anday, teren' hu'rmet, qorqıw ha'm pa'k ju'rek penen tın'lan'lar.
6 Bunı adamlarg'a jaqsı ko'ringisi keletug'ınlar sıyaqlı, ko'zabag'a islemen'ler. Qudaydın' qa'lewin Masixtın' qulları sıpatında shın ju'rekten orınlan'lar.
7 Adamlarg'a emes, al İyemizge xızmet etip atırg'anday, inta menen xızmet etin'ler.
8 O'ytkeni qul bolsın, azat adam bolsın, ha'r bir adamnın' islegen jaqsılıg'ının' İyemizden qaytatug'ının bilesizler.
9 Ha'y xojayınlar, sizler de qulların'ızg'a usınday qatnasta bolıp, olardı qorqıtıwdı toqtatın'lar. Sebebi aspanda olar menen sizlerdin' İyen'iz bar ekenin ha'm Onın' adamlardı ayırmaytug'ının bilesizler.
10 Juwmaqlap aytqanda, İyemiz benen qatnasta bolıp, Onın' qu'diretinin' ku'shi menen bekkemlenip barın'lar.
11 Shaytannın' hiylelerine qarsı tura alıw ushın, Qudaydın' barlıq sawıt-quralların tag'ının'lar.
12 O'ytkeni urısımız qan ha'm etten ibarat bolg'an adam balasına qarsı emes, al bul du'nyadag'ı ko'zge ko'rinbeytug'ın ha'kimlerge, biylewshilerge, bul qaran'g'ı zamannın' ku'shlerine ha'm aspandag'ı jawız ruwxlarg'a qarsı.
13 Sonlıqtan jaman ku'nde olarg'a qarsılıq ko'rsete alıwın'ız ushın ha'm tolıq jen'iske eriskenin'izden son', bekkem tura alıwın'ız ushın, Qudaydın' barlıq sawıt-quralların tag'ıp alın'lar.
14 Solay etip, ornın'ızda bekkem turın'lar. Belin'izdi haqıyqat belbewi menen buwıp, ko'kiregin'izge haqlıq sawıtın kiyin'ler.
15 Tınıshlıq Xosh Xabarın ja'riyalaw tayarlıg'ın ayaqların'ızg'a ayaq kiyim qılıp kiyin'ler.
16 Bulardın' ha'mmesine qosa shaytannın' barlıq otlı oqların o'shire alatug'ın isenim qalqanın qolların'ızg'a alın'lar.
17 Qutqarılıw duwlıg'asın ha'm Qudaydın' so'zi bolg'an Muxaddes Ruwxtın' qılıshın alın'lar.
18 Ha'r tu'rli tilek ha'm jalbarınıw menen, Muxaddes Ruwxtın' basqarıwında ha'mme waqıt duwa etin'ler. Usı maqset penen sergek bolıp, pu'tkil iseniwshiler ushın taban tirep soran'lar.
19 Men ushın da duwa etin'ler. Awzımdı ha'r ashqanımda mag'an kerekli so'z berilip, Xosh Xabardın' sırın batırlıq penen bildire alayın.
20 Ja'ne de, Xosh Xabar ushın elshi bolg'an men ha'zir tutqın bolsam da, Xosh Xabardı ılayıqlı ma'rtlik penen ja'riyalawım ushın da duwa etin'ler.
21 Awhalımnın' qalay ekenin ha'm ne islegenimdi sizler de biliwin'iz ushın, su'yikli tuwısqanımız ha'm İyemizdin' isenimli xızmetshisi Tixik sizlerge ha'mmesin bildiredi.
22 Mine, usı maqsette onı sizlerge jiberip atırman. Ol bizlerdin' awhalımızdı bildirip, kewillerin'izdi jigerlendiredi.
23 A'kemiz Quday ha'm İyemiz İysa Masix tuwısqanlarg'a tınıshlıq ha'm isenim menen birlikte su'yispenshilik bersin.
24 İyemiz İysa Masixtı o'shpes su'yispenshilik penen su'yiwshilerdin' ha'mmesine Qudaydın' miyrimi yar bolsın!
