Kolosalılar 2 bob
1 Men sizler ushın, sonday-aq, Laodikiyadag'ılar ha'm meni ju'zbeju'z ko'rmegenlerdin' ha'mmesi ushın qanshelli g'ayrat salıp atırg'anımdı biliwin'izdi qa'leymen.
2 Menin' usı g'ayrat salıwımnın' maqseti – sizlerdin' kewillerin'iz jubanısh tawıp, su'yispenshilik penen birlesiwin'izden ibarat. Solay etip, sizler minsiz tu'sinikten payda bolatug'ın ka'mil isenim menen, Qudaydın' sırı bolg'an Masixtı bilip alasızlar.
3 Masixta aqıl-danalıqtın' pu'tkil g'a'ziynesi jasırılg'an.
4 Bunı men hesh kimnin' sizlerdi maylı til menen aldap ketpewi ushın aytıp atırman.
5 Sebebi menin' o'zim aran'ızda joq bolsam da, ruwxım sizler me.nen birge bolıp, aran'ızdag'ı ta'rtipti ha'm Masixqa degen isenimin'izdin' bekkemligin ko'rip, quwanıp atırman
6 Sonlıqtan Masix İysanı İyemiz dep qabıl etken bolsan'ız, Onın' menen tıg'ız qatnasta bolıp jasan'lar.
7 Onda tamır jayıp ha'm tiklenip, o'zlerin'iz u'yrengendey, isenimde bekkemlenip barın'lar ha'm Qudayg'a sansız shu'kirlik bildirin'ler.
8 Saq bolın'lar! Masixqa emes, al adamlardın' u'rp-a'detlerine ha'm bul du'nyadag'ı ma'nissiz qag'ıydalarg'a tiykarlang'an filosofiya, bos ha'm o'tirik so'zler menen hesh kim sizlerdi olja etpesin.
9 O'ytkeni qudaylıq ta'biyattın' pu'tkil tolılıg'ı Masixtın' denesinde jasaydı.
10 Sizler de ha'r qanday ha'kimshilik ha'm biyliktin' bası Masix penen qatnasta bolıp, usı tolılıqqa eristin'iz.
11 Sizler Masix penen qatnasta bolıp, su'nnet etildin'iz. Bul su'nnet adamnın' qolı menen qılınatug'ın su'nnet emes, al Masix ta'repinen islengen su'nnet bolıp, usı arqalı gu'nakar ta'biyatın'ız kesip taslanadı.
12 Suwg'a shomıldırılg'anın'ızda Masix penen birge ko'mildin'ler ha'm Onı o'limnen tiriltken Qudaydın' ku'shine isenip, sol waqıtta Onın' menen birge tirildin'ler.
13 Sizler gu'naların'ız ha'm gu'nakar ta'biyatın'ızdın' su'nnetsizligi sebepli o'li edin'ler, biraq Quday sizlerdi Masix penen birge tiriltti. Ol barlıq gu'nalarımızdı keshirdi.
14 Muxaddes Nızam talapları boyınsha bizlerge qarsı ayıp tag'ıp, hu'kim belgileytug'ın hu'jetti Quday o'shirdi ha'm onı atanaq ag'ashqa shegelep, joq qıldı.
15 Ol ruwxıy ha'kimler menen biylewshilerdi quralsızlandırdı. Olardı Masixtın' atanaq ag'ashtag'ı o'limi arqalı jen'ip, ko'pshiliktin' ko'z aldında masqara etti.
16 Solay etip, jeytug'ın ha'm ishetug'ın na'rselerge, bayramg'a, jan'a ayg'a yamasa dem alıs ku'nine baylanıslı hesh kim sizlerdi hu'kim etpesin.
17 Bular tek keliwi tiyis na'rsenin' ko'len'kesi, al haqıyqatlıq bolsa Masixta.
18 Jalg'an kishipeyillikten ha'm perishtelerge sıyınıwdan la'zzet alatug'ın hesh kim sizlerdi sıyın'ızdan ayırmasın. Olar tek o'zleri ko'rgen ayanlarg'a g'ana berilip, o'z gu'nakar ta'biyatının' aqılı menen sebepsiz ko'kirek ko'teredi.
19 Bundaylar iseniwshiler ja'ma'a'tinin' bası bolg'an Masix penen baylanıstı u'zgen. A'ne usı bastan pu'tkil dene buwın ha'm sin'irdin' ja'rdemi menen ku'sh alıp ha'm birlesip, Qudaydın' qa'legen jolı menen o'sip baradı.
20 Eger sizler Masix penen birge bul du'nyanın' ma'nissiz qag'ıydaları ushın o'lgen bolsan'lar, onda nege bul du'nyag'a tiyisli adamlar sıyaqlı:
21 «Uslama», «Jeme» ha'm «Qol tiygizbe» degen qag'ıydalarg'a qulaq asasız?
22 Bunday qag'ıydalardın' ha'mmesi qollanıw arqalı joq bolatug'ın na'rselerge baylanıslı bolıp, adamlardın' buyrıq ha'm ta'liymatlarına tiykarlang'an.
23 Awa, bul qag'ıydalar jalg'an dindarlıq, jalg'an kishipeyillik ha'm deneni qıynaw boyınsha aqıllıday bolıp ko'rinedi. Biraq gu'nakar ta'biyattın' qa'lewlerin ju'wenlewde olardın' hesh qanday paydası joq.
