Kolosalılar 3 bob
1 Solay etip, Masix penen birge tirilgen bolsan'ız, onda aspandag'ı na'rselerdi izlen'ler. Masix sol jerde, Qudaydın' on' jag'ında otırıptı.
2 Jerdegi emes, al aspandag'ı na'rselerdi oylan'lar.
3 Sebebi sizler du'nya ushın o'lgensizler ha'm jan'a o'mirin'iz Masix penen birge Qudayda jasırılg'an.
4 O'mirin'iz bolg'an Masix kelgende, sizler de Onın' menen birlikte saltanat penen ko'rinesiz
5 Sonlıqtan o'zlerin'izdegi jerge tiyisli bolg'an jaman a'detlerdi: buzıqshılıq, haramılıq, na'psiqumarlıq, jaman qa'lewler ha'm na'psiqawlıq bolg'an butqa tabınıwshılıqtı joq qılın'lar
6 Bular sebepli, so'zge qulaq aspaytug'ınlarg'a Qudaydın' g'a'zebi keledi.
7 Burın sizler de usınday adamlardın' arasında jasag'anın'ızda, sonday is-ha'reketlerdi isledin'ler.
8 Biraq endi ha'mmesin: ashıw, g'a'zep ha'm jek ko'riwshilikti qoyın'lar. Awzın'ızdan hesh qanday o'sek ha'm so'gis so'z shıqpasın.
9 Bir-birin'izge o'tirik so'ylemen'ler. O'ytkeni sizler eski ta'biyatın'ızdı onın' jaman isleri menen taslap,
10 jan'a ta'biyatqa iye boldın'lar. Bul jan'a ta'biyatqa iye adam Qudaydı tolıq biliw ushın, o'z Jaratıwshısına uqsap baradı.
11 Solay etip, jan'a ta'biyatqa iye adamlar arasında grek ha'm yahudiy, su'nnetli ha'm su'nnetsiz, varvar ha'm skif*, qul ha'm azat adam bolıp bo'liniw joq. Al en' a'hmiyetlisi, ha'mme iseniwshilerde jasaytug'ın tek Masix g'ana bar.
12 Qudaydın' tan'lap alg'an muxaddes ha'm su'yikli adamları sıpatında rehimlilik, jaqsılıq, kishipeyillik, mu'la'yimlilik ha'm sabırlılıq penen jasan'lar.
13 Bir-birin'izge shıdamlı ha'm keshirimli bolın'lar. Eger kim de kim birewden o'kpeli bolsa, İyemizdin' sizlerdi keshirgeni sıyaqlı, sizler de bir-birin'izdi keshirin'ler.
14 Bulardın' ha'mmesine qosımsha su'yispenshilik penen jasan'lar. Ol minsiz birlikke eristiredi.
15 Ju'reklerin'izde Masixtın' tınıshlıg'ı hu'kimdarlıq etsin. Sizler bir denenin' mu'sheleri bolıp, usı tınıshlıqqa shaqırıldın'ız. Ja'ne de, shu'kirlik bildirin'ler
16 Masixtın' so'zi pu'tkil baylıg'ı menen ishin'izde jasasın. Bir-birin'izge tolıq danalıq penen ta'lim berip, aqıl-na'siyat etin'ler. Qudayg'a shu'kirlik bildirip, Og'an Zabur jırların, alg'ıs-maqtaw qosıqların ha'm Muxaddes Ruwxtın' ilhamı menen jazılg'an qosıqlardı shın ju'rekten aytın'lar.
17 So'zin'iz yamasa isin'iz benen qılg'an ha'r bir na'rseni İyemiz İysanın' atı ushın, Ol arqalı A'kemiz Qudayg'a shu'kirlik etip islen'ler.
18 Ha'y hayallar, ku'yewlerin'izge boysının'lar. Bul İyemizge tiyisli bolg'an hayallarg'a mina'sip.
19 Ha'y ku'yewler, hayalların'ızdı su'yin'ler. Olarg'a qopal qatnasta bolman'lar.
20 Ha'y balalar, ha'mme na'rsede ataanaların'ızdın' so'zin tın'lan'lar. Sebebi bul İyemizge unaydı.
21 Ha'y a'keler, ruwxı tu'spewi ushın, balaların'ızdın' ashıwın keltirmen'ler.
22 a'y qullar, du'nyadag'ı xojayınların'ızg'a ha'mme na'rsede boysının'lar. Bunı tek olarg'a jag'ınıw ushın ko'zabag'a emes, al İyemizden qorqıp, shın ju'rekten islen'ler.
23 İyemizden sıylıq retinde miyras alatug'ının'ızdı bilip, ne islesen'iz de adamlar ushın emes, al İyemiz ushın islep atırg'anday bolıp, shın ju'rekten islen'ler.
24 O'ytkeni sizler İyemiz Masixqa xızmet etip atırsızlar.
25 Nahaq is islegen adamg'a nahaqlıg'ına ılayıq qaytarıladı. Quday hesh kimdi ayırmaydı.
