1 Salonikalılar 3 bob
1 Solay etip, bizler artıq shıday almay, Afinada jalg'ız qalıwdı uyg'ardıq.
2 İsenimin'izdi bekkemlep, sizlerdi jigerlendiriw ushın, Masixtın' Xosh Xabarın ja'riyalaytug'ın Qudaydın' xızmetshisi, tuwısqanımız Timofeydi sizlerge jiberdik.
3 Azap-aqıretler sebepli hesh kim isenimde silkinbesin dep, bizler usılay isledik. Azap shegiw ta'g'dirimizge jazılg'anı o'zlerin'izge ma'lim.
4 O'ytkeni sizler menen birge bolg'anımızda, azap shegetug'ınımızdı aldın aytqan edik. Xabarın'ız bar, aytqanımızday anıq solay boldı da.
5 Sonlıqtan men de artıq shıday almay, azg'ırıwshı sizlerdi azg'ırıp, miynetimiz bosqa ketpesin dep, isenimin'izdin' jag'dayın biliw ushın Timofeydi sizlerge jiberdim.
6 Biraq, sizlerdin' janın'ızdan bizlerge jan'a g'ana qaytıp kelgen Timofey sizlerdin' isenimin'iz ha'm su'yispenshiligin'iz haqqında quwanıshlı xabar alıp keldi. Bizlerdi ba'rqulla jaqsı oy menen eske alıp, bizlerdin' sizlerdi sag'ıng'anımızday, sizlerdin' de bizlerdi sag'ınıp atırg'anın'ızdı aytıp berdi.
7 Sol sebepten tuwısqanlar, qıyınshılıqlı ha'm azap-aqıretli jag'dayda sizlerdin' isenimin'iz sebepli jigerlenip qaldıq.
8 Sebebi sizler İyemiz benen bekkem baylanısta bolsan'ız, bizlerdin' janımız jay tabadı.
9 Qudayımızdın' aldında sizler sebepli alg'an barlıq quwanıshımızdın' esesin Og'an qansha shu'kirlik aytıp qaytarsaq ta az.
10 Sizler menen ju'zbe-ju'z ko'risiw ushın ha'm isenimin'izdegi jetispegen na'rselerdi tolıqtırıw ushın, ku'ni-tu'ni bar ku'shimiz benen duwa etip atırmız.
11 A'kemiz Qudaydın' O'zi ha'm İyemiz İysa sizlerge barıwg'a jolımızdı ashsın!
12 İyemiz bir-birin'izge ha'm pu'tkil adamlarg'a degen su'yispenshiligin'izdi bizlerdin' sizlerge degen su'yispenshiligimiz sıyaqlı ko'beytip arttırsın!
13 Solay etip, İyemiz İysa O'zinin' pu'tkil muxaddesleri* menen kelgende, A'kemiz Qudaydın' aldında muxaddeslikte kemshiliksiz bolıwın'ız ushın, ju'reklerin'izdi bekkemlesin.
