Eshua 16 bob

Efrayım urıwına berilgen jerler (1-10).

¹ Yusup urpag'ının' shegine tu'sken jerlerdin' shegaraları Erixo janındag'ı İordan da'ryasınan, Erixonın' shıg'ısındag'ı suwlardan baslanıp, sho'l arqalı Erixodan Beyt-Eldin' tawlı u'lkesine qaray sozıladı.

² Keyin Beyt-Elden Luzg'a o'tip, Ark tiyresinin' jeri bolg'an Atarotqa qaray sozıladı.

³ Shegara sol jerden batıstag'ı Yaflet urpag'ının' jerlerine, to'mende Beyt-Xoron u'lkesine, ol jerden Gezerge tu'sedi ha'm Jer Orta ten'izine kelip tawısıladı.

⁴ Solay etip, Yusuptin' ulları Menashshe ha'm Efrayım usı jerlerdi u'les etip aldı.

⁵ Tiyre sanına qaray, Efrayım urıwının' u'lesine tiygen jerlerdin' shegarası shıg'ısta Atrot-Addardan joqarıdag'ı Beyt-Xorong'a qaray sozılıp,

⁶ Jer Orta ten'izine baradı. Arqadag'ı Mixmetattan Taanat-Shilonın' shıg'ısına qaray burılıp, qalanın' shıg'ısı boylap, Yanoaxtın' shıg'ısına qaray sozıladı.

⁷ Bul jerden Atarot ha'm Naarag'a tu'sedi, Erixog'a jetip, İordan da'ryasına barıp tawısıladı.

⁸ Tappuaxtan batısqa qaray Qana sayına deyin sozılıp, Jer Orta ten'izinde tawısıladı. Tiyre sanına qaray, Efrayım urıwının' u'lesi usı edi.

⁹ Bunnan tısqarı, Menashshe urıwına tiygen u'les jerdin' ishinde Efrayım urıwına tiyisli qalalar ha'm olardın' a'tiraplarındag'ı awıllar bar edi.

¹⁰ Degen menen, Efrayım urıwı Gezerde jasag'an kenaanlılardı quwıp shıg'armadı. Kenaanlılar bu'gingi ku'nge deyin Efrayım urıwının' arasında jasaydı ha'm olar ushın erksiz xızmetshige aylang'an.