Eshua 18 bob
1 Eldi qolg'a kirgizgennen son', pu'tkil İzrail ja'miyeti Shiloda bir jerge toplandı. Olar sol jerde Ushırasıw shatırın qurdı.
2 Degen menen, olardın' arasında jerden elege deyin o'z u'lesin almag'an jeti urıw bar edi.
3 Sonda Eshua izraillılarg'a bılay dedi: – Ata-babaların'ızdın' Qudayı, Jaratqan İyenin' sizlerge bergen jerlerin qolg'a kirgiziwdi qashang'a shekem keshiktiresizler?
4 Ha'r urıwdan u'sh adamnan saylap alın'lar. Men olardı eldi ko'zden o'tkizip keliw ushın jiberejaqpan. Olar u'les etip alatug'ın jerlerinin' shegaraların belgileydi ha'm olardı su'wretlep jazıp, mag'an qaytıp keledi.
5 Olar bul jerlerdi jeti bo'lekke bo'lsin. Yahuda urıwı qubla bo'lektegi, Yusup urıwı arqa bo'lektegi o'z jerlerinde qalsın.
6 Jerdi jeti bo'lekke bo'lip, su'wretlep jazg'anın'ızdan keyin, mag'an alıp kelin'ler. Men bul jerde, Qudayımız Jaratqan İyenin' aldında sizler ushın shek taslayman.
7 Lebiylilerge kelsek, olardın' sizlerdin' aran'ızda u'lesi joq. Olardın' u'lesi – Jaratqan İye ushın ruwxaniylik xızmetin atqarıwdan ibarat. Al Gad ha'm Ruben urıwı menen Menashshe urıwının' yarımı İordan da'ryasının' shıg'ıs ta'repinde o'zlerinin' u'les jerlerin alg'an edi. Sol jerlerdi olarg'a Jaratqan İyenin' qulı Muwsa bergen edi.
8 Eshua jerdi su'wretlep jazıp keliw ushın jolg'a shıqpaqshı bolg'an adamlarg'a: – Barıp, jerlerdi aylanıp shıg'ıp, su'wretlep jazın' da, son'ınan janıma qaytıp kelin'ler. Keyin men bul jerde, Shiloda, Jaratqan İyenin' aldında sizler ushın shek taslayman, – dep buyırdı.
9 Solay etip, adamlar jolg'a atlanıp, eldi aylanıp shıqtı. Olar eldi qalamaqala jeti bo'lekke bo'lgen halda kitapqa su'wretlep jazdı da, Shilog'a, ordada bolg'an Eshuag'a qaytıp keldi.
10 Eshua Shiloda, Jaratqan İyenin' aldında olar ushın shek taslap, jerlerdi İzrail urıwları arasında bo'listirdi.
11 Tiyre sanına qaray, Benyamin urıwı ushın shek taslandı. Olardın' shegine tu'sken jerler Yahuda urıwı menen Yusup urıwının' jerleri arasında edi.
12 Olardın' jerinin' shegarası arqada İordan da'ryasınan baslanıp, Erixonın' arqa ta'repine ko'teriletug'ın, batısta tawlı u'lkege qaray sozılıp, Beyt-Awen atlı elsiz dalada toqtaytug'ın edi.
13 Shegara ol jerden Luzdın' janbawırına, yag'nıy Beyt-Eldin' qubla ta'repine o'tip, BeytXoronnın' qublasındag'ı tawdın' qasındag'ı to'mengi Atrot-Addarg'a tu'sedi.
14 Ol jerden shegara burılıp, Beyt-Xoronnın' qarsısında bolg'an tawdın' batıs ta'repi menen qublag'a qaray sozıladı ha'm Yahuda urıwına tiyisli bolg'an Kiryat-Baal, yag'nıy Kiryat-Yarim qalasında toqtaydı. Bul batıs shegarası edi.
15 Al qubla shegarası Kiryat-Yarimnin' shetinen baslanıp, Neftoax suw bulag'ına deyin sozılatug'ın edi.
16 Shegara bul jerden Refaim oypatlıg'ının' arqa ta'repindegi Ben-Hinnom oypatlıg'ına qarag'an tawdın' eteklerine barıp, Hinnom oypatlıg'ı arqalı o'tetug'ın ha'm Ebustın' qubla ta'repine, ol jerden Rogel bulag'ına tu'setug'ın edi.
17 Arqag'a burılg'an shegara EnShemesh ha'm Adummim biyikliginin' qarsısındag'ı Gelilotqa barıp, Rubennin' ulı Bohannın' tasına tu'setug'ın edi.
18 Son'ınan İordan tegisliginin' janındag'ı qırdın' arqa ta'repinen o'tip, tegislikke tu'setug'ın edi.
19 Ol jerden Beyt-Xoglanın' arqa eteklerine o'tip, O'li ten'izdin' arqa qoltıg'ında, İordan da'ryasının' qubla quyar qoltıg'ında toqtaytug'ın edi. Bul qubla shegarası edi.
20 Shıg'ıs shegarası İordan da'ryası edi. Tiyre sanına qaray, Benyamin urıwının' u'lesine tiygen jerlerdin' shegaraları usılar edi.
21 Tiyre sanına qaray, Benyamin urıwının' u'lesine tiygen qalalar mınalar edi: Erixo, Beyt-Xogla, Emek-Kesis,
22 Beyt-Araba, Semarayım, Beyt-El,
23 Awwim, Para, Ofra,
24 Kefar-Ammoniy, Ofniy, Geba. Ha'mmesi bolıp, awılları menen birlikte on eki qala.
25 Gibon, Rama, Beerot,
26 Mispe, Kefira, Mosa,
27 Rekem, İrpeel, Tarala,
28 Sela, Elef, Ebus, yag'nıy Erusalim, Gibat ha'm Kiryat. Ha'mmesi bolıp, awılları menen birlikte on to'rt qala. Tiyre sanına qaray, Benyamin urıwının' u'lesi usı edi.
