Eshua 20 bob
1 Bunnan son', Jaratqan İye Eshuag'a bılay dedi:
2 – Muwsa arqalı sizlerge buyırg'anımday, izraillılarg'a ayt, olar o'zleri panalaytug'ın qalalardı tan'lasın.
3 Eger birew abaysızda adam o'ltirip qoysa, ol sol jerge qashıp barsın. Sizlerdin' o'lgen adamnın' o'sh alıwshı a'mengerinen qashıp panalaytug'ın bir jerin'iz bolıwı kerek.
4 Bul qalalardın' birine qashqan adam qala da'rwazasının' qasında turıp, o'zinin' awhalın qalanın' aqsaqallarına bildirsin. Aqsaqallar onı qalasına qabıl etip, og'an jasaytug'ın orın bersin.
5 Adam o'ltirgen adamnın' izinen o'sh alıwshı a'mengeri quwıp kelse, qalanın' basshıları onı o'sh alıwshı adamg'a tapsırıp jibermesin. Sebebi ol abaysızda adam o'ltirdi ha'm onda o'ltirgen adamına degen aldın ala hesh qanday qaslıq bolmag'an.
6 Adam o'ltirgen adam qaladag'ı ja'miyetshilik aldında hu'kim etilmegenshe ha'm sol waqıtta xızmet etken bas ruwxaniy o'lgenge deyin, sol qalada qalıwı kerek. Son'ınan ol o'zi qashıp shıqqan qalasına, o'z u'yine qaytsın.
7 Solay etip, olar Naftaliydin' tawlı u'lkesindegi, yag'nıy Galiladag'ı Kedeshti, Efrayımnın' tawlı u'lkesinde bolg'an Shexemdi ha'm Yahudanın' tawlı u'lkesindegi Kiryat-Arbanı, yag'nıy Xebrondı tan'ladı.
8 Ja'ne de, İordan da'ryasının' arg'ı jag'ındag'ı, Erixonın' shıg'ısındag'ı mına qalalardı tan'ladı: olar Ruben urıwına tiyisli ken'isliktegi sho'lde jaylasqan Beser qalası, Gad urıwının' jerleri ishindegi Giladtag'ı Ramot, Menashshe urıwının' jerleri ishindegi Bashandag'ı Golan edi.
9 Bul qalalar izraillılar ha'm olar arasında jasaytug'ın kelgindi adamlar ushın ajıratıldı. Eger olardın' birewi abaysızda adam o'ltirip qoysa, o'sh alıwshı a'mengerdin' qolınan o'lim ko'rmew ushın, sol qalalarg'a qashıp baradı. Ol ja'miyetshiliktin' aldında hu'kim etilmegenshe, sol jerde qa'wip-qa'tersiz boladı.
