Eshua 21 bob
1 Lebiy urıwının' tiyre basshıları ruwxaniy Elazar, Nun ulı Eshua ha'm İzrail urıwlarının' tiyre basshılarına bardı.
2 Olar Kenaan jerindegi Shiloda edi. Sonda lebiyliler olarg'a: – Jaratqan İye Muwsa arqalı bizlerge jasaw ushın qalalar, mallarımız ushın qala a'tirapındag'ı jaylawlar beriliwin buyırg'an edi, – dedi.
3 Solay etip, izraillılar Jaratqan İyenin' buyrıg'ına qulaq asıp, lebiylilerge o'z u'leslerinen mına qalalardı ha'm olardın' a'tirapındag'ı jaylaw jerlerdi berdi:
4 Birinshi shek Qohat tiyrelerine tu'sti. Lebiyli bolg'an ruwxaniy Xaronnın' urpaqlarına shek boyınsha Yahuda, Shimon ha'm Benyamin urıwlarınan on u'sh qala berildi.
5 Al Qohattın' basqa urpaqlarına shek boyınsha Efrayım, Dan ha'm Menashshe urıwının' yarımına tiyisli bolg'an tiyrelerden alıng'an on qala berildi.
6 Gershon urpaqlarına shek boyınsha İssaxar, Asher, Naftaliy urıwlarına tiyisli bolg'an tiyrelerden ha'm Bashandag'ı Menashshe urıwının' yarımınan alıng'an on u'sh qala berildi.
7 Tiyre sanına qaray, Merariy urpaqlarına Ruben, Gad ha'm Zebulon urıwlarınan alıng'an on eki qala berildi.
8 Solay etip, Jaratqan İyenin' Muwsa arqalı buyırg'anınday, izraillılar shek taslap, usı qalalardı jaylawları menen birlikte lebiylilerge berdi.
9 Yahuda ha'm Shimon urıwlarınan alıng'an ha'm to'mende atları atalatug'ın qalalar
10 lebiyli Qohat tiyrelerinen bolg'an Xaronnın' urpaqlarına berildi. Sebebi birinshi shek olarg'a tu'sken edi.
11 Olarg'a Yahudanın' tawlı u'lkesindegi Anaqtın' urpaqlarının' tu'p babası bolg'an Arbanın' atı menen atalg'an Kiryat-Arba, yag'nıy Xebron ha'm onın' a'tirapındag'ı jaylawlar berildi.
12 Al qalanın' atızları menen awılları bolsa, Efunne ulı Kalebke mu'lik etip berilgen edi.
13 Ruwxaniy Xaronnın' urpaqlarına abaysızda adam o'ltirgenler ushın panalaytug'ın qalalar bolg'an Xebron, Libna,
14 Yattir, Eshtemoa,
15 Xolon, Debir,
16 Ayın, Yutta ha'm Beyt-Shemesh qalaları menen olardın' jaylawları, yag'nıy Yahuda ha'm Shimon urıwlarınan barlıg'ı bolıp tog'ız qala berildi.
17 Al Benyamin urıwınan Gibon, Geba,
18 Anatot ha'm Almon degen to'rt qala jaylawları menen birlikte berildi.
19 Solay etip, Xaron urpag'ınan shıqqan ruwxaniylerge jaylawları menen birlikte berilgen qalalardın' sanı barlıg'ı bolıp on u'shke jetti.
20 Lebiy urıwının' Qohat tiyrelerinin' qalg'an adamlarına Efrayım urıwınan mına qalalar u'les etip berildi:
21 Efrayımnın' tawlı u'lkesindegi abaysızda adam o'ltirgenler panalaytug'ın Shexem qalası ha'm Gezer,
22 Kibsayım, Beyt-Xoron degen jaylawları menen birlikte to'rt qala.
23 Al Dan urıwınan Elteke, Gibbeton,
24 Ayyalon ha'm Gat-Rimmon degen to'rt qala jaylawları menen birlikte berildi.
25 Menashshe urıwının' yarımınan jaylawları menen birlikte Taanax ha'm Gat-Rimmon degen eki qala berildi.
26 Solay etip, Qohattın' qalg'an urpaqlarına jaylawları menen birlikte barlıg'ı bolıp on qala berildi.
27 Lebiy urıwınan bolg'an Gershonnın' urpaqlarına Menashshe urıwının' yarımına tiyisli bolg'an eki qala: Bashandag'ı abaysızda adam o'ltirgenler panalaytug'ın Golan qalası ha'm Beeshtera qalası jaylawları menen birlikte berildi.
28 İssaxar urıwınan bolsa, jaylawları menen birlikte Kishyon, Daberat,
29 Yarmut ha'm En-Gannim degen to'rt qala berildi.
30 Asher urıwınan jaylawları menen birlikte Mishal, Abdon,
31 Xelqat ha'm Rexob degen to'rt qala berildi.
32 Naftaliy urıwınan u'sh qala jaylawları menen birlikte berildi: olar Xammot-Dor, Qartan ha'm abaysızda adam o'ltirgenler panalaytug'ın Galiladag'ı Kedesh qalası.
33 Tiyre sanına qaray, Gershonnın' urpaqlarına jaylawları menen birlikte barlıg'ı bolıp on u'sh qala berildi.
34 Qalg'an lebiylilerge, yag'nıy Merariydin' urpaqlarının' tiyrelerine Zebulon urıwınan alıng'an İoqneam, Qarta,
35 Dimna ha'm Nahalal degen to'rt qala jaylawları menen birlikte berildi.
36 Ruben urıwınan alıng'an Beser, Yahasa,
37 Kedemot ha'm Mefaat degen to'rt qala jaylawları menen birlikte berildi.
38 Gad urıwınan Giladtag'ı panalaytug'ın Ramot qalası ha'm Maxanayım,
39 Xeshbon ha'm Yazer qalaları barlıg'ı bolıp to'rt qala jaylawları menen birlikte berildi.
40 Tiyre sanına qaray, lebiylilerdin' qalg'an tiyrelerine, yag'nıy Merariydin' urpaqlarına u'les etip berilgen qalalardın' sanı barlıg'ı bolıp on eki edi.
41 İzraillılardın' jerlerinen lebiylilerge jaylawları menen birlikte barlıg'ı bolıp qırıq segiz qala berildi.
42 Bul qalalardın' ha'mmesinin' a'tirapında jaylawları bar edi. Jaylawsız qala joq edi.
43 Solay etip, Jaratqan İye ata-babalarına beriwge ant ishken barlıq jerlerdi izraillılarg'a berdi. İzraillılar sol jerlerdi iyelep, ma'kan bastı
44 Jaratqan İye ata-babalarına ant ishkenindey, olardı ha'r ta'repleme tınıshlıqqa eristirdi. Hesh bir dushpanı olarg'a qarsı tura almadı. Jaratqan İye dushpanlarının' ha'mmesin olarg'a ta'slim etti
45 Jaratqan İyenin' İzrail xalqına bergen hesh bir iygilikli so'zi orınlanbay qalmadı, ha'mmesi iske astı
