Eshua 22 bob

Shıg'ıstag'ı urıwlardın' qaytıwı(1-34).

¹ Bunnan son', Eshua Ruben ha'm Gad urıwları menen Menashshe urıwının' yarımın jıynadı da,

² olarg'a bılay dedi: – Sizler Jaratqan İyenin' qulı Muwsanın' o'zlerin'izge buyırg'an ha'r bir na'rsesin isledin'ler. Menin' ha'mme buyrıqlarıma da boysındın'lar.

³ Sonshama waqıt dawamında, bu'ginge deyin tuwısqanların'ızdı jalg'ız taslap ketpedin'ler. Qudayın'ız Jaratqan İyenin' sizlerge bergen buyrıg'ın orınladın'lar.

⁴ Minekey, Qudayın'ız Jaratqan İye tuwısqanların'ızg'a wa'de qılg'anınday, olardı tınıshlıqqa eristirdi. Endi Jaratqan İyenin' qulı Muwsanın' İordan da'ryasının' arg'ı jag'asında sizlerge mu'lik qılıp bergen jerlerdegi u'ylerin'izge qaytın'lar.

⁵ Biraq Jaratqan İyenin' qulı Muwsanın' sizlerge bergen buyrıqların ha'm Nızamın muqıyatlı tu'rde orınlan'lar. Qudayın'ız Jaratqan İyeni su'yin'ler, Onın' jolı menen ju'rip, buyrıqların orınlan'lar. Og'an sadıq bolın'lar, Og'an shın ju'rek ha'm shın kewlin'izden xızmet etin'ler.

⁶ Son'ınan Eshua olarg'a aq pa'tiyasın berip, jolg'a atlandırdı. Solay etip, olar u'ylerine qaytıp ketti.

⁷ Muwsa Menashshe urıwının' yarımına Bashanda jer bergen edi. Eshua bolsa, Menashshe urıwının' qalg'an yarımına İordan da'ryasının' batısınan, basqa tuwısqanları arasınan jer berdi.Eshua olardı u'ylerine qaytarıp atırıp, olarg'a aq pa'tiyasın berip:

⁸ – U'ylerin'izge u'lken baylıq penen, ju'da' ko'p mal, gu'mis, altın, mıs, temir ha'm ju'da' ko'p kiyim-kenshek penen qaytıp baratırsızlar. Dushpanların'ızdan olja qılıp alg'an na'rselerin'izdi tuwısqanların'ız benen bo'lisin'ler, – dedi.

⁹ Solay etip, Ruben ha'm Gad urıwları menen Menashshe urıwının' yarımı Kenaan jerindegi Shilodan, izraillılardın' janınan ketti. Olar Jaratqan İyenin' buyrıg'ı boyınsha, Muwsa arqalı o'zleri mu'lik etip alg'an Gilad jerine qaytıw ushın jolg'a shıqtı.

¹⁰ Ruben ha'm Gad urıwları menen Menashshe urıwının' yarımı İordan da'ryasına jaqın ornalasqan Kenaan jerindegi aymaqqa kelgende, da'ryanın' jag'asında ko'rinisi u'lken bolg'an qurbanlıq ornın qurdı.

¹¹ zrail xalqına: «Ruben ha'm Gad urıwları menen Menashshe urıwının' yarımı Kenaan elinin' shegarasında, İordan da'ryasının' jag'asında, izraillılarg'a tiyisli jerde bir qurbanlıq ornın qurdı», – degen xabar jetti.

¹² İzrail xalqı bul xabardı esitkende, olarg'a qarsı urısıw ushın pu'tkil ja'miyet Shilog'a jıynaldı.

¹³ Sonda izraillılar ruwxaniy Elazardın' ulı Pinexastı Gilad jerine, Ruben ha'm Gad urıwları menen Menashshe urıwının' yarımına jiberdi.

¹⁴ Onın' menen birge İzrail urıwlarınan on ko'sem ketti. Bul ko'semlerdin' ha'r biri İzrail tiyrelerinin' ishindegi o'z qa'wimlerine basshı edi.

¹⁵ Olar Gilad jerine, Ruben ha'm Gad urıwları menen Menashshe urıwının' yarımına kelip bılay dedi:

¹⁶ – Jaratqan İyenin' pu'tkil ja'miyeti bılay deydi: «Sizler nege İzraildın' Qudayına qıyanet ettin'ler? Nege bu'gin sizler o'zlerin'iz ushın qurbanlıq ornın qurıp, Jaratqan İyeden waz keshtin'ler ha'm Og'an qarsı bas ko'terdin'ler?

¹⁷ Bizlerge Peor tawındag'ı gu'namız az ba edi? Jaratqan İyenin' ja'miyeti sol gu'na sebepli ba'lege jolıqqan edi. Bizler usı ku'nge deyin o'zlerimizdi bul gu'nadan tazalay almadıq.

¹⁸ Sizler bu'gin Jaratqan İyeden waz keshtin'iz! Eger sizler bu'gin Jaratqan İyege qarsı qozg'alan' ko'tersen'iz, Ol da erten' pu'tkil İzrail ja'miyetine g'a'zeplenedi.

¹⁹ Eger sizlerge tiyisli jerler hadal bolmasa, Jaratqan İyenin' shatırı turg'an Og'an tiyisli jerge kelip, aramızdag'ı jerden u'les alın'lar. O'zlerin'izge Qudayımız Jaratqan İyenin' qurbanlıq ornınan basqa bir qurbanlıq ornın qurıp, Jaratqan İyege ha'm bizlerge qarsı qozg'alan' ko'termen'ler.

²⁰ 0Zerax ulı Axan bag'ıshlang'an oljadan alıp, qıyanet etkende, pu'tkil İzrail ja'miyeti g'a'zepke ushıramadı ma? Axannın' gu'nası ushın tek onın' o'zi g'ana o'limge duwshar bolmadı-g'o!»

²¹ Sonda Ruben ha'm Gad urıwları menen Menashshe urıwının' yarımı İzraildın' tiyre basshılarına bılay dep juwap berdi:

²² – Jaratqan İye – qudaylar Qudayı! Jaratqan İye – qudaylar Qudayı! Ol bulardın' barlıg'ın biledi ha'm İzrail da bilip qoysın: eger bizler islegen isimizdi Jaratqan İyege qarsı qozg'alan' ko'teriw yamasa Og'an qıyanet islew maqsetinde islegen bolsaq, onda bu'gin Jaratqan İye bizlerdi ayamasın!

²³ Eger bizler qurbanlıq orındı Jaratqan İyeden waz keshiw ushın, jandırılatug'ın qurbanlıqlardı, g'a'lle sadaqaların yamasa tatıwlıq qurbanlıqların beriw ushın qurg'an bolsaq, Jaratqan İyenin' O'zi bizlerdi jazalasın.

²⁴ Bizler bul isti mınadan ta'shiwishlengenimiz sebepli islegen edik: keleshekte sizlerdin' urpaqların'ız bizlerdin' urpaqlarımızg'a: «İzraildın' Qudayı Jaratqan İye menen sizlerdin' qanday baylanısın'ız bar?

²⁵ Ha'y, Ruben ha'm Gad urpaqları! Jaratqan İye sizler menen bizlerdin' aramızg'a İordan da'ryasın shegara qılıp qoyg'an. Sizlerdin' Jaratqan İyege hesh qanday qatnasın'ız joq», – dep bizlerdin' urpaqlarımızdın' Jaratqan İyeden qorqıp jasawına tosqınlıq jasawı mu'mkin.

²⁶ Sonlıqtan bizler o'zlerimiz ushın qurbanlıq ornın qurıwdı sheshtik. Bunı jandırılatug'ın qurbanlıq ha'm basqa qurbanlıqlar ushın emes,

²⁷ al tek sizler menen bizlerdin' aramızda ha'm keleshek a'wladlar arasında gu'walıq bolıwı ushın isledik. Solay etip, bizler de Jaratqan İyenin' aldında jandırılatug'ın qurbanlıqlarımız, tatıwlıq qurbanlıqlarımız ha'm basqa qurbanlıqlarımız benen Og'an sıyınajaqpız. Sonda sizlerdin' urpaqların'ız keleshekte bizlerdin' urpaqlarımızg'a: «Jaratqan İyege hesh qanday qatnasın'ız joq», – dep ayta almaydı.

²⁸ Solay etip, bizler bılay oyladıq: keleshekte bizlerge yamasa bolajaq urpaqlarımızg'a usılay dese, bizler: «Ata-babalarımızdın' Jaratqan İyege arnap qurg'an qurbanlıq ornının' nusqasına qaran'lar. Bul orın jandırılatug'ın yamasa basqa qurbanlıqlar ushın emes, al bizler menen sizlerdin' aran'ızda gu'walıq bolıw ushın qurılg'an», – deymiz.

²⁹ Bizler Jaratqan İyege qarsı qozg'alan' ko'teriwden, bu'gin Onnan waz keshiwden, jandırılatug'ın qurbanlıqlar, g'a'lle sadaqaları yamasa basqa qurbanlıqlar beriw ushın Qudayımız Jaratqan İyenin' shatırının' aldında turg'an qurbanlıq ornınan basqa birewin qurıwdan awlaqpız.

³⁰ Ruwxaniy Pinexas ha'm onın' menen birge bolg'an ja'miyet basshıları, yag'nıy İzraildın' tiyre basshıları Ruben ha'm Gad urıwları menen Menashshe urıwının' yarımının' aytqan so'zlerin esitkende kewilleri toldı.Ruwxaniy Elazardın' ulı Pinexas ha'm basshılar Ruben ha'm Gad urıwları jasaytug'ın Gilad jerinen Kenaan jerine, izraillılarg'a qaytıp kelip, ne bolg'anın aytıp berdi.

³¹ Sonlıqtan ruwxaniy Elazardın' ulı Pinexas Ruben ha'm Gad urıwları menen Menashshe urıwının' yarımına: – Endi Jaratqan İyenin' aramızda ekenin bilemiz. Sebebi sizler Og'an qıyanet etpedin'iz ha'm izraillılardı Onın' jazasınan qutqardın'ız, – dedi

³² Ruwxaniy Elazardın' ulı Pinexas ha'm basshılar Ruben ha'm Gad urıwları jasaytug'ın Gilad jerinen Kenaan jerine, izraillılarg'a qaytıp kelip, ne bolg'anın aytıp berdi.

³³ İzraillılar bul xabarg'a kewli tolıp, Qudayg'a alg'ıslar ayttı. Olar Ruben ha'm Gad urıwlarına qarsı urıs ashıw ha'm olardın' jasaytug'ın jerlerin wayran etiw haqqında qaytıp awız ashpadı.

³⁴ Ruben ha'm Gad urıwları: «Bul qurbanlıq ornı – bizlerdin' aramızda Jaratqan İyenin' Quday ekenine gu'wa» dep, orındı «Gu'wa» dep atadı.