Eshua 23 bob

Eshuanın' xoshlasıw so'zleri(1-16).

¹ Jaratqan İye İzraildı a'tirapındag'ı barlıq dushpanlarınan qutqarıp tınıshlıqqa eristirgennen son', ko'p jıllar o'tti. Eshua bolsa qartayıp, biraz jasqa barıp qalg'an edi.

² Sonda ol pu'tkil İzrail xalqın, olardın' aqsaqalların, tiyre basshıların, qazıların ha'm qadag'alawshıların shaqırıp alıp, olarg'a bılay dedi: – Men qartayıp, biraz jasqa barıp qaldım.

³ Qudayın'ız Jaratqan İyenin' sizler ushın bul barlıq xalıqlarg'a neler islegenin ko'rdin'ler. O'ytkeni Qudayın'ız Jaratqan İyenin' O'zi sizler ushın urıstı.

⁴ Minekey, men İordan da'ryasınan baslap, ku'n batar ta'reptegi Jer Orta ten'izine deyin jasag'an barlıq xalıqlardı joq etip, olardın' jerlerin de, ele joq qılınbag'an xalıqlardın' jerlerin de shek boyınsha sizlerdin' urıwların'ızg'a bo'lip berdim.

⁵ Qudayın'ız Jaratqan İye bul xalıqlardı quwıp shıg'arıp, aldın'ızdan shegindiredi ha'm O'zi sizlerge wa'de etkenindey, sizler olardın' jerlerin iyeleysizler.

⁶ Sonlıqtan sizler Muwsanın' Nızam kitabında jazılg'an ha'r bir na'rseni orınlaw ushın ju'da' ku'shli bolın'lar. Jazılg'anlardan ya on'g'a, ya solg'a awıp ketpen'ler.

⁷ Aran'ızda qalg'an xalıqlar menen hesh qanday qarım-qatnas jasaman'lar. Olardın' qudaylarının' atların tilge alman'lar ha'm olardın' atları menen ant ishpen'ler. Sol qudaylarg'a xızmet etpen'ler ha'm tabınban'lar.

⁸ Bu'gingi ku'nge deyin islep kelgenin'izdey, Qudayın'ız Jaratqan İyege sadıq qalın'lar.

⁹ Sebebi Jaratqan İye ullı ha'm ku'shli xalıqlardı sizlerdin' aldın'ızdan quwıp shıg'ardı. Bu'gingi ku'nge deyin hesh kim sizlerge qarsı tura almadı.

¹⁰ Sizlerdin' aran'ızdag'ı birewin'iz mın' adamdı quwıp shıg'aradı. O'ytkeni Qudayın'ız Jaratqan İyenin' wa'de etkenindey, Onın' O'zi sizler ushın urısadı.

¹¹ Sonlıqtan Qudayın'ız Jaratqan İyeni su'yiwde ju'da' muqıyatlı bolın'lar.

¹² Al eger sizler Onnan ju'z burıp, aran'ızdag'ı qalg'an sol xalıqlar menen aralassan'ız, olar menen qız alısıp, qız berisetug'ın bolsan'ız, qarım-qatnas jasasan'ız,

¹³ onda bilip qoyın'lar: Qudayın'ız Jaratqan İye sol xalıqlardı endi aldın'ızdan quwıp shıg'armaydı. Onın' sizlerge bergen usı jaqsı jerinen joq bolıng'anın'ızsha, bul xalıqlar sizler ushın duzaq, qaqpan, arqan'ızg'a qamshı ha'm ko'zlerin'izge tiken boladı.

¹⁴ Minekey, menin' de bul du'nyadan o'tetug'ın waqtım keldi. Qudayın'ız Jaratqan İyenin' sizlerge bergen hesh bir jaqsı wa'delerinin' bosqa shıqpag'anın sizler pu'tkil ju'regin'iz ha'm pu'tkil kewlin'iz benen bilesizler. Olardın' ha'mmesi orınlandı, hesh biri orınlanbay qalmadı.

¹⁵ Qudayın'ız Jaratqan İye sizlerge bergen wa'delerinin' ha'mmesin qalay orınlag'an bolsa, Ol O'zi bergen usı jaqsı jerden sizlerdi joq etpegenshe, aytqan barlıq jamanlıqların da solay basın'ızg'a saladı.

¹⁶ Eger Qudayın'ız Jaratqan İyenin' sizlerge orınlan' dep buyırg'an kelisimin buzsan'ız ha'm barıp, basqa qudaylarg'a xızmet etip, olarg'a tabınsan'ız, Jaratqan İyenin' sizlerge g'a'zebi tutanadı. Sonda sizler Ol bergen bul jaqsı jerden tez arada qırılıp ketesizler.