Eshua 3 bob

İzraillılardın' İordan da'ryasınan o'tiwi(1-17).

¹ Eshua tan' azannan turdı da, pu'tkil İzrail xalqı menen birlikte Shittimnen jolg'a shıg'ıp, İordan da'ryasına keldi. Olar da'ryanı kesip o'tpey, sol jerde tu'nedi.

² U'shinshi ku'nnin' son'ında ordanı bastanayaq aylanıp shıqqan qadag'alawshılar.

³ xalıqqa bılay dep buyırdı: «Lebiyli ruwxaniyler Quday İyen'izdin' Kelisim sandıg'ın ko'terip baratırg'anın ko'rgenin'izde, sizler de ornın'ızdan qozg'alıp, sandıqtın' izine erin'ler.

⁴ Solay etip, sizler qaysı ta'repke baratug'ının'ızdı bilip alasızlar. Sebebi sizler aldın bul joldan hesh qashan ju'rip ko'rmegensizler. Biraq Kelisim sandıg'ına jaqınlaspan'lar. Sandıq penen sizlerdin' aran'ızda eki mın' shıg'anaq qashıqlıq bolsın».

⁵ Eshua xalıqqa: – O'zlerin'izdi pa'klen'ler. O'ytkeni Jaratqan İye erten' aran'ızda a'jayıp isler isleydi, – dedi.

⁶ Al ruwxaniylerge: – Kelisim sandıg'ın ko'terip, xalıqtın' aldında ju'rin'ler, – dedi. Solay etip, ruwxaniyler sandıqtı ko'terip, xalıqtın' aldında ju'rip ketti.

⁷ Sol arada Jaratqan İye Eshuag'a bılay dedi: – Men Muwsa menen birge bolg'anım sıyaqlı, senin' menen de birge ekenimdi olar tu'siniwi ushın, bu'ginnen baslap seni pu'tkil İzrail xalqının' ko'z aldında ma'rtebeli qılaman.

⁸ Sen Kelisim sandıg'ın ko'tergen ruwxaniylerge: „İordan da'ryasının' jag'asına barg'anın'ızda, suwg'a ayaq basıp, toqtap turın'lar“, – dep buyrıq ber.

⁹ Eshua İzrail xalqına: «Jaqınıraq kelip, Qudayın'ız Jaratqan İyenin' so'zlerin tın'lan'lar», – dep bolıp, so'zin bılay dawam etti:

¹⁰ «Tiri Qudaydın' aran'ızda ekenin, Onın' kenaan, xett, xiw, periz, girgash, amor ha'm ebus xalıqların aldın'ızdan so'zsiz quwıp jiberetug'ının mınadan bilip alasızlar:

¹¹ mine, pu'tkil jer ju'zi İyesinin' Kelisim sandıg'ı sizlerden aldın İordan da'ryasınan o'tedi.

¹² Endi o'zlerin'izge ha'r bir urıwdan bir adamnan, yag'nıy İzrail urıwlarınan on eki adamdı saylap alın'lar.

¹³ Pu'tkil jer ju'zinin' İyesi bolg'an Jaratqan İyenin' sandıg'ın ko'tergen ruwxaniyler İordan da'ryasına ayaq basqanda, joqarıdan aqqan suwlar toqtap, bir jerge toplanadı».

¹⁴ Xalıq İordan da'ryasınan o'tiw ushın tu'negen jerinen jolg'a shıqtı. Kelisim sandıg'ın ko'tergen ruwxaniyler aldında ju'rip baratır edi.

¹⁵ İordan da'ryası jıyın-terim waqtında tasıp, ka'narınan shıg'ıp ketetug'ın edi. Sonda sandıqtı ko'tergen ruwxaniyler da'ryanın' jag'asına barıp, suwg'a ayaqların tiygiziwden-aq,

¹⁶ joqarıdan aqqan suwlar toqtap, ju'da' uzaqlarda, Saretang'a jaqın bolg'an Adam qalasında toplanıp, joqarılay basladı. Al İordan tegisligindegi ten'izge, yag'nıy O'li ten'izge aqqan da'ryanın' qalg'an suwları bolsa, pu'tkilley toqtap qaldı. Xalıq da'ryanı Erixonın' qarsı aldınan kesip o'tti.

¹⁷ Pu'tkil xalıq da'ryadan o'tip bolg'ansha, Jaratqan İyenin' Kelisim sandıg'ın ko'tergen ruwxaniyler da'ryanın' qurg'ap qalg'an ultanının' ortasında qozg'almay turdı. Solay etip, pu'tkil İzrail xalqı da'ryanın' qurg'ap qalg'an ultanı arqalı o'tti.