1 Timofey 2 bob
1 En' aldı menen iseniwshilerge mınanı u'yretiwin'di o'tinish etemen: olar Quday aldında ha'mme adamlar ushın sorap, duwa etip, jalbarınıp, minnetdarshılıq bildirsin.
2 Patshalar ha'm basshılar ushın da duwa etsin. Sonda bizler Qudaydın' jolı menen hadal jasap, paraxat ha'm tınısh o'mir su'remiz.
3 Bul is jaqsı bolıp, Qutqarıwshımız Qudayg'a unaydı.
4 Sebebi Ol ha'mme adamlardın' qutqarılıwın ha'm haqıyqatlıqtı biliwin qa'leydi.
5 Quday jalg'ız ha'm Quday menen adamlardın' arasındag'ı Ta'welleshi, O'zi adam bolg'an Masix İysa da jalg'ız.
6 Ol O'zin ha'mme adamlar ushın qurban qıldı. Bul arqalı Ol Qudaydın' ha'mme adamlardı qutqarıwdı qa'leytug'ının belgilengen waqıtta da'lilledi.
7 Men usı ushın Masix İysa ta'repinen xabarshı ha'm elshi bolıp tayınlanıp, basqa milletlerge isenim ha'm haqıyqatlıq haqqında u'yretetug'ın mug'allim boldım. Men aldap atırg'an joqpan, haqıyqatın aytıp turman.
8 Ja'ma'a'tdegi er adamlarg'a ashıwlanbawdı ha'm tartıspawdı, al ha'mme jerde muxaddes qolların ko'terip duwa etiw kerekligin u'yretiwin'di qa'leymen.
9 Hayallar da shashlarına artıqsha sa'n bermey, o'zlerin altınlar, hinjiler yamasa qımbat kiyimler menen emes, al sıpayı kiyim, a'dep ha'm iybe menen bezesin.
10 Kerisinshe, olar Qudaydan qorqıp jasaytug'ın hayallarg'a ılayıqlı jaqsı isler menen o'zlerin ko'rkem qılsın.
11 Hayal tınısh ha'm tolıq boysıng'an halda ta'lim alsın.
12 Hayaldın' ta'lim berip, er adamdı basqarıwına ruxsat etpeymen. Hayal tınısh bolsın.
13 O'ytkeni da'slep Adam-ata, son'ınan Hawa-ene jaratıldı.
14 Ja'ne de, Adam-ata emes, al hayal aldanıp, gu'na isledi.
15 Biraq, hayal isenim, su'yispenshilik ha'm muxaddeslik penen, a'depli bolıp jasasa, bala tuwıwı arqalı qutqarıladı.
