1 Timofey 4 bob
1 Muxaddes Ruwx anıq aytpaqta: son'g'ı waqıtlarda geybir adamlar aldawshı ruwxlarg'a ha'm jinlerdin' ta'liymatlarına qulaq asıp, isenimnen qaytadı.
2 Bunday ta'liymatlar hu'jdansız bolg'an eki ju'zli o'tirikshiler ta'repinen tarqaladı.
3 Bul o'tirikshiler u'yleniwdi ha'm turmısqa shıg'ıwdı qadag'an etedi, ja'ne de, ayırım azıq-awqatlardı jemewdi buyıradı. Degen menen, haqıyqattı biletug'ın iseniwshilerdin' minnetdarshılıq bildirip jewi ushın, Quday bul na'rselerdi jaratqan-g'o.
4 Quday jaratqan ha'r bir na'rse jaqsı ha'm eger minnetdarshılıq penen qabıl etilse, hesh na'rsege tıyım salınbawı kerek.
5 O'ytkeni bizler ha'r bir na'rseni Qudaydın' so'zi boyınsha ha'm duwa etiw arqalı muxaddes dep qabıl etemiz.
6 Eger bulardı tuwısqanlarg'a na'siyatlasan', onda sen isenimnin' ha'm o'zin' tutıng'an jaqsı ta'liymattın' so'zleri menen azıqlang'an, Masix İysanın' jaqsı xızmetshisi bolasan'.
7 Jaramas ha'm ma'nissiz ga'plerden awlaq bolıp, o'zin'di Quday jolında shınıqtırıp bar.
8 Deneni shınıqtırıwdın' paydası az. Al Qudaydın' jolında shınıg'ıw ha'r ta'repleme paydalı. Sebebi bul arqalı ha'zir ha'm keleshekte o'mir beriledi.
9 Bul so'zler isenimli ha'm ha'r ta'repleme qabıl etiliwge ılayıqlı.
10 Sonın' ushın bizler awır miynet etip, azap shekpektemiz. O'ytkeni ha'mme adamlardın', a'sirese iseniwshilerdin' Qutqarıwshısı bolg'an tiri Qudaydan u'mit etemiz.
11 Sen usılardı buyır ha'm u'yret.
12 Jassan' dep, o'zin'di hesh kimnin' kemsitiwine jol qoyma. Kerisinshe, so'ylegen so'zin', jasaw ta'rizin', su'yispenshiligin', isenimin' ha'm pa'kligin' menen iseniwshilerge o'rnek bol.
13 Men janın'a barg'anımsha, iseniwshiler ja'ma'a'tine Muxaddes Jazıwlardı oqıwg'a, u'git-na'siyat etiwge ha'm u'yretiwge o'zin'di bag'ıshla.
14 Aqsaqallar jıyını senin' u'stin'e qol qoyıp duwa etkende, o'zin'e payg'ambarshılıq arqalı berilgen ruwxıy sıydı pa's ko'rme.
15 Usını is ju'zinde qollan ha'm tabısların'dı ha'mme ko'riwi ushın, o'zin'di bug'an tolıq bag'ıshla.
16 O'zin'e ha'm berip atırg'an ta'limin'e dıqqat awdar, usı islerin'di dawam et. Usılay islesen', o'zin'di de, seni tın'laytug'ınlardı da qutqarasan'.
