2 Timofey 2 bob
1 Ulım, al sen İysa Masix arqalı beriletug'ın miyrim menen ku'shke tolıp bar.
2 Ko'plegen gu'walar aldında mennen o'zin' esitken so'zlerdi isenimli adamlarg'a jetkiz. Sonda olar da basqalarg'a u'yrete aladı.
3 Masix İysanın' jaqsı a'skeri bolıp, menin' menen birge qıyınshılıqqa shıda.
4 Xızmetdegi a'sker o'zin a'skerlikke shaqırg'an a'skerbasının' kewlinen shıg'ıw ushın, turmıs isleri menen baylanbaydı.
5 Jarısqa tu'sken adam da qag'ıyda boyınsha jarıspasa, jen'is tajın kiymeydi.
6 Awır miynet etken diyxan zu'ra'a'tten birinshi bolıp u'les alıwı tiyis.
7 Aytqanlarım haqqında jaqsılap oylap ko'r. İyemizdin' O'zi sag'an ha'mmesin tu'sindiredi.
8 Dawıttın' urpag'ınan shıqqan ha'm o'limnen qayta tirilgen İysa Masixtı yadın'da saqla! Men ja'riyalap atırg'an Xosh Xabar – usı.
9 Men usı Xosh Xabar ushın azap shegip, ha'tte, jınayatshı sıyaqlı tutqın bolıp baylandım. Biraq, Qudaydın' so'zi baylawlı emes.
10 Sonlıqtan men tan'lap alıng'anlardın' da Masix İysa arqalı qutqarılıwdı ma'n'gilik saltanat penen alıwı ushın, ha'mme na'rsege shıdap atırman.
11 ul so'z isenimli: «Eger Onın' menen birge o'lgen bolsaq, Onın' menen birge jasaymız da.
12 Eger sabırlılıq qılsaq, Onın' menen birge patshalıq etemiz. Eger Onnan waz keshsek, Ol da bizden waz keshedi.
13 Biz sadıq bolıp qalmasaq ta, Ol sadıq bolıp qaladı. Sebebi Ol O'zinen O'zi waz keshe almaydı».
14 Usılardı iseniwshilerge esletip tur. So'zler tuwralı tartıspawdı olarg'a Quday aldında eskertip qoy. Tartıslar tın'lawshılardı aynıtıwdan basqa hesh na'rsege jaramaydı.
15 Haqıyqat so'zlerin durıs u'yretetug'ın ha'm o'z isi ushın uyatqa qalmaytug'ın, Qudayg'a unamlı, jaqsı xızmetshi bolıwg'a jan-ta'nin' menen tırıs.
16 Jaramas ha'm bos so'zlerden awlaq bol. O'ytkeni bunday so'zler Qudaydan barg'an sayın uzaqlastıradı.
17 ha'm juqpalı jara sıyaqlı tarqaladı. Usınday so'zlerdi aytıwshılar arasında Gimeney ha'm Filit te bar.
18 Olar haqıyqat jolınan adastı ha'm o'limnen qayta tiriliw a'lle qashan boldı dep, ayırım adamlardın' isenimin joq qılmaqta.
19 Biraq Quday salg'an ku'shli negiz bekkem turıptı. Sol negiz «İyemiz O'zine tiyisli bolg'anlardı biledi» ha'm «İyemizge tiyislimen, degen ha'r bir adam jamanlıqtan awlaq ju'rsin» , – degen so'zler menen tastıyıqlang'an.
20 U'lken bir u'yde tek altın ha'm gu'mis ıdıslar emes, al ag'ash ha'm ılay ıdıslar da bar. Olardın' birewleri sıylı, al birewleri sıysız is ushın qollanıladı.
21 Solay etip, eger kim de kim o'zin jamanlıqlardan tazalasa, onda ol sıylı, muxaddes qılıng'an, xojayınına paydalı ha'm ha'r bir jaqsı iske tayın ıdıs boladı.
22 Al sen jaslıqtın' jaman ha'weslerinen awlaq bol. İyemizge taza kewil menen sıyınatug'ınlar menen birlikte haqıyqatlıq, isenim, su'yispenshilik ha'm tınıshlıqqa umtılıp jasa.
23 Aqılsız ha'm ma'nissiz tartıslardan qash. Sebebi bulardın' ja'njel tuwdıratug'ının sen bilesen'.
24 İyemizdin' xızmetshisi ja'njelpaz bolmawı kerek. Kerisinshe, ol ha'mme menen mu'la'yim, ta'lim beriwge qa'biletli ha'm sabırlı bolıwı tiyis.
25 Ja'ne ol o'zine qarsı bolg'anlarg'a a'lpayımlılıq penen jol-jorıq beriwi lazım. Sonda, mu'mkin, Quday sol adamlardın' da ta'wbege kelip, haqıyqatlıqtı biliwi ushın jol ashar.
26 Solay etip, olardın' aqılı kiredi ha'm qa'legenin isletiw ushın o'zlerin tutqın qılg'an shaytannın' duzag'ınan qutıladı.
