2 Timofey 4 bob
1 Qudaydın' aldında ha'm tiriler menen o'lilerdi hu'kim etetug'ın Masix İysanın' aldında Onın' qayta keliwi ha'm Patshalıg'ı haqı qatan' buyıraman:
2 Qudaydın' so'zin ja'riyala. Zamannın' qolaylı yamasa qolaysız bolıwına qaramay, bul xızmetti dawam et. Adamlarg'a tolıq sabırlılıq penen ta'lim berip, a'shkarala, jolg'a sal ha'm aqıl-na'siyat et.
3 Sebebi adamlar durıs ta'liymattı tın'lamaytug'ın waqıtlar keledi. Olar jaman qa'lewlerine berilip, qulaqlarına jag'atug'ın so'zlerdi so'yleytug'ın ko'p mug'allimlerdi a'tiraplarına jıynaydı.
4 Olar haqıyqatlıqtı esitpew ushın qulaqların jawıp, an'ızlarg'a qulaq asatug'ın boladı.
5 Biraq sen ha'r qanday jag'dayda sergek bol. Qıyınshılıqlarg'a shıdam ber, Xosh Xabar ushın miynet etip, o'z xızmetin'di orınla.
6 O'ytkeni menin' qanım to'gilip, qurban bolmaqtaman ha'm du'nyadan o'tetug'ın waqtım da jaqınlastı.
7 Men ullı sawashta gu'restim, jarıstı juwmaqladım ha'm isenimimdi saqlap qaldım.
8 Endi bolsa, men ushın haqıyqatlıq tajı tayın tur. A'dil hu'kim etiwshi bolg'an İyemiz sol ku'ni usı tajdı mag'an, tek g'ana mag'an emes, al Onın' qayta keliwin intizarlıq penen ku'tkenlerdin' ha'mmesine de beredi.
9 Janıma tezirek keliwge bar ku'shin' menen tırıs.
10 Sebebi Dimas bul du'nyanı su'ygenlikten meni taslap, Salonikag'a ketti. Al Kriskiy Galatiyag'a, Titus Dalmatiyag'a ketti.
11 Janımda tek Luka g'ana bar. Sen Marktı tawıp, o'zin' menen birge alıp kel. Ol menin' xızmetime ja'rdem beredi.
12 Men Tixikti Efeske jiberdim.
13 Kelerin'de, menin' Troasta, Karptın' qasında qaldırıp ketken shapanımdı alıp kel. Ja'ne de kitaplarımdı, a'sirese oralg'an teri kitaplardı alıp kel.
14 Temir ustası İskender mag'an ko'p jamanlıq isledi. İyemiz og'an islegenlerine qaray qaytarsın.
15 Sen de onnan abaylı bol. O'ytkeni ol bizlerdin' so'zlerimizge qattı qarsı boldı.
16 Birinshi ma'rte o'zimdi aqlamaqshı bolıp juwap bergenimde, meni hesh kim jaqlamadı. Kerisinshe, ha'mme meni taslap ketti. Bunın' ushın Quday olardı keshirsin.
17 Biraq, Qudaydın' Xosh Xabarı men arqalı tolıq ja'riyalanıwı ushın ha'm pu'tkil milletler bunı esitiwi ushın, İyemiz mag'an ja'rdemge kelip, ku'sh-quwat berdi. Ol meni sol ta'rizde o'limnen* qutqarıp qaldı.
18 İyemiz meni ha'r qanday jamanlıqtan qutqaradı ha'm O'zinin' Aspan Patshalıg'ına aman-esen aparadı. Og'an ma'n'gige alg'ısmaqtawlar bolsın! Awmiyin.
19 Priskila menen Akilag'a ha'm Onisifordın' u'y-ishine sa'lem ayt.
20 Erastus Korinfte qaldı. Trofimdi awırıw halında Militte qaldırdım.
21 Qıstan burın keliwge bar ku'shin' menen tırıs. Ebul, Pud, Lin, Klavdiya ha'm barlıq iseniwshi tuwısqanlar sag'an sa'lem aytıp atır.
22 İyemiz senin' ruwxın' menen birge bolsın! Qudaydın' miyrimi sizlerge yar bolg'ay!
