Titus 3 bob
1 Basshılarg'a ha'm hu'kimetke boysınıp qulaq asıwdı, ha'r bir iygilikli isti islewge tayar bolıwdı,
2 hesh kimdi o'sek qılmay ha'm ja'njelkesh bolmay, mu'la'yim bolıp, ha'mme adamlarg'a ha'r ta'repleme jumsaq qatnasta bolıwdı iseniwshilerge esletip qoy
3 Sebebi bir waqıtları bizler de aqılsız, qulaq aspaytug'ın, adasqan, ha'r tu'rli jaman ha'wesler menen ha'zliklerdin' qulı bolg'an, jamanlıq ha'm ku'nshillik penen jasag'an, basqalar bizlerdi ha'm bizler de bir-birimizdi jek ko'rgen adamlar edik.
4 Biraq, Qutqarıwshımız Quday O'z miyrimin ha'm adamg'a degen su'yispenshiligin ashıq ko'rsetkende,
5 Ol bizlerdi qılg'an haq islerimiz sebepli emes, al O'z miyrim-sha'pa'a'ti menen qutqardı. Bizlerdi Muxaddes Ruwxı arqalı gu'nadan tazalap, qaytadan tuwıldırdı ha'm jan'aladı.
6 Onın' miyrimi menen aqlanıp, o'zlerimiz u'mit etken ma'n'gilik o'mirdin' miyrasxorları bolıwımız ushın,
7 Ol Muxaddes Ruwxın Qutqarıwshımız İysa Masix arqalı mol-mol etip jawdırdı.
8 Bul so'z – haqıyqat. Qudayg'a isengenlerdin' o'zlerin jaqsı islerdi islewge arnawg'a tırısıwları ushın, aytqanlarımdı talap etiwin'di qa'leymen. Bular – adamlar ushın jaqsı ha'm paydalı.
9 Biraq, aqılsız tartıslar menen shejireler tuwralı so'zlerden, Muxaddes Nızamg'a baylanıslı aytıs ha'm ja'njellerden qash. O'ytkeni bular paydasız ha'm biykar na'rseler.
10 Alawızlıq tuwdıratug'ın adamg'a bir-eki eskertiw jasag'annan son', onın' menen baylanıstı u'z.
11 Bunday adamnın' buzılg'anın ha'm o'z-o'zin hu'kim etip, gu'na islep atırg'anın bilesen'.
12 Artemdi yamasa Tixikti sag'an jibergenimde, da'rhal Nikopoliske, menin' janıma keliwge bar ku'shin'di sal. Sebebi qıstı sol jerde o'tkiziwge qarar ettim.
13 Nızam xızmetkeri Zenas penen Apolostı jolg'a atlandırg'anın'da, olar hesh bir na'rsege mu'ta'j bolmawı ushın g'amxorlıq jasa.
14 Mu'ta'j adamlarg'a ja'rdem beriw ushın ha'm jemissiz o'mir su'rmew ushın, bizin' adamlarımız da jaqsı islerdi islewge o'zlerin bag'ıshlawdı u'yrensin.
15 Menin' janımdag'ılardın' ha'mmesi sag'an sa'lem aytıp atır. Ortaq isenimdegi bizlerdi su'yetug'ınlarg'a sa'lem ayt. Qudaydın' miyrimi ha'mmen'izge yar bolsın!
