Evreyler 2 bob
1 Sonlıqtan esitkenlerimizden uzaqlap, joldan shıg'ıp ketpewimiz ushın, esitkenlerimizge ele de ko'birek dıqqat awdarıwımız kerek.
2 Sebebi perishteler arqalı aytılg'an so'z ku'shke iye bolıp, ha'r qanday jınayat ha'm boysınbawshılıq ushın a'dil jaza beriletug'ın edi.
3 Solay eken, da'slep İyemiz İysa ta'repinen aytılg'an, son'ınan Onnan esitkenler ta'repinen tastıyıqlang'an ullı qutqarılıwg'a itibarsız qarasaq, bizler bul jazadan qalay qashıp qutıla alamız?
4 Quday da bul haqqında ka'ramatlı belgiler, tan' qalarlıq na'rseler ha'm ha'r tu'rli ka'ramatlı isler arqalı, ja'ne de, O'z qa'lewi boyınsha Muxaddes Ruwxtın'* sıyların u'lestiriwi arqalı gu'walıq berdi.
5 Quday bizler so'z etip atırg'an keleshek zamandı perishtelerge bag'ınıshlı qılg'an joq.
6 Kerisinshe, Muxaddes Jazıwdın' bir jerinde birew bılay dep gu'walıq bergen edi: «O İyem, Sen eske alg'anday adam kim o'zi? Sen og'an g'amxorlıq ko'rsetetug'ınday, adam ulı kim bolıptı?
7 Onı perishtelerden az waqıtqa to'menirek qoydın', Dan'q-hu'rmet tajın og'an kiydirip,
8 Ha'mme na'rseni onın' ayaqlarına bas urg'ızdın'» . Quday ha'mme na'rseni adamg'a bag'ınıshlı qılıp, og'an bag'ınıshlı bolmag'an hesh bir na'rse qaldırmadı. Degen menen, ha'mme na'rsenin' adamg'a bag'ınıshlı ekenin bizler elege deyin ko'rmey atırmız.
9 Biraq bizler perishtelerden az waqıtqa to'menirek qoyılg'an İysanın' o'lim azabın shekkeni ushın, dan'q-hu'rmet tajın kiygenin ko'rip turmız. Awa, Ol Qudaydın' miyrimi menen ha'mme adamlar ushın o'limdi basınan keshirgen edi.
10 Ha'mme na'rse Quday ushın ha'm Quday arqalı bar bolg'an. Usı Quday ko'p perzentlerin ullılıqqa eristiriw ushın, olardı qutqarılıwg'a jetelewshi İysanı azap-aqıretler arqalı minsizlikke jetkiziwdi maqul ko'rdi.
11 O'ytkeni muxaddes qılıwshı İysa ha'm Ol muxaddes qılg'an iseniwshilerdin' ha'mmesi bir A'keden. Sonlıqtan İysa olardı «tuwısqanlarım» dep atawg'a uyalmaydı.
12 İysa bılay deydi: «Quday, Senin' atın'dı tuwısqanlarıma ja'riya etemen, Olardın' jıyınında Seni alg'ıslayman» .
13 Ja'ne basqa jerde bılay delingen: «Men Qudayg'a su'yenemen» tag'ı da: «Minekey, Men Qudaydın' Mag'an bergen balaları menen birge usı jerdemen».
14 Bul balalar et ha'm qannan ibarat bolg'anlıqtan, İysanın' O'zi de olarg'a ten'lesip, et ha'm qannan ibarat bolg'an adamnın' denesine iye boldı. Bunı Ol o'lim u'stinen biylikke iye bolg'andı, yag'nıy shaytandı O'z o'limi arqalı nabıt qılıw ushın.
15 ha'm o'mir boyı o'lim qorqınıshı sebepli qul bolg'anlardın' ha'mmesin azat qılıw ushın isledi.
16 Sebebi, a'lbette, İysa perishtelerge emes, al İbrayımnın' urpag'ınan bolg'anlarg'a ja'rdem etedi.
17 Sol sebepten Qudaydın' xızmetinde miyrim-sha'pa'a'tli ha'm sadıq bas ruwxaniy bolıp, adamlardın' gu'naların tazalaw ushın, Ol ha'r ta'repleme tuwısqanlarına uqsawı kerek edi.
18 Onın' O'zi sınaqqa tu'sip, azap shekkenlikten, Ol sınaqqa tu'skenlerge de ja'rdem ete aladı.
