Evreyler 3 bob
1 Solay etip, bizler menen birge Quday ta'repinen shaqırılg'an, ha'y muxaddes tuwısqanlarım, Qudaydın' elshisi ha'm bas ruwxaniyi, dep o'zlerimiz ashıq ta'n alg'an İysa haqqında teren' oylan'lar!
2 Muwsa Qudaydın' pu'tkil shan'arag'ında Qudayg'a sadıq bolg'anınday, İysa da O'zin xızmetke qoyg'an Qudayg'a sadıq boldı.
3 U'ydi salg'an u'ydin' o'zinen go're ko'birek hu'rmet ko'rgeni sıyaqlı, İysa da Muwsadan go're joqarıraq ullılıqqa ılayıq tabıldı.
4 Ha'r bir u'ydin' qurıwshısı bar, al Quday pu'tkil barlıqtın' jaratıwshısı.
5 Muwsa keleshekte aytılatug'ın so'zler haqqında gu'walıq beriw ushın, Qudaydın' pu'tkil shan'arag'ında bir xızmetker sıpatında sadıq boldı.
6 Biraq, Masix Qudaydın' shan'arag'ın basqaratug'ın Ul sıpatında sadıq boldı. Eger o'zlerimizdegi u'mit sebepli payda bolatug'ın batırlıq ha'm quwanıshtı aqırına deyin bekkem saqlasaq, bizler – Onın' shan'arag'ımız.
7 Sol sebepten Muxaddes Ruwx bılay deydi: «Eger bu'gin Qudaydın' dawısın esitsen'iz,
8 Sho'ldegi sınaq waqtında qozg'alan' ko'tergen ata-babaların'ızday, Qaysarlıq etpen'ler.
9 Olar sol jerde qırıq jıl boyı Menin' islerimdi ko'rgen bolsa da, Meni sınay berdi.
10 Sonlıqtan Men sol a'wladqa g'a'zeplenip bılay dedim: „Olardın' ju'rek qa'lewleri ba'rqulla tuwrı emes, Olar Menin' jollarımdı bilmedi“.
11 Ja'ne de, Men qa'ha'rlengenimde: „Olar Menin' dem alıw ushın beretug'ın ma'kanıma kirmeydi“, – dep ant ishken edim» .
12 Ha'y tuwısqanlarım, ju'regin'iz isenbey jawız bolıp qalıp, tiri Qudaydan bezip ketiwden saq bolın'lar!
13 Kerisinshe, aran'ızdag'ı hesh birin'iz gu'nanın' aldawına erip, ju'regin qaysar qılmawı ushın, ha'r ku'ni ele «bu'gin» dep aytılıp atır eken, bir-birin'izdi jigerlendirip barın'lar.
14 O'ytkeni eger bizler da'slepki isenimimizdi aqırına deyin bekkem saqlasaq, Masixqa tiyisli bolg'an ha'mme na'rsege sherikles bolamız.
15 Joqarıda bılay delingen edi: «Eger bu'gin Qudaydın' dawısın esitsen'ler, Og'an qarsı qozg'alan' ko'tergen atababaların'ızday, Qaysarlıq etpen'ler» .
16 Qudaydın' so'zin esitse de, Og'an qarsı qozg'alan' ko'tergen kimler edi? Muwsanın' basshılıg'ında Mısırdan shıqqanlardın' ha'mmesi emes pe edi?
17 Quday kimlerge qırıq jıl ashıwlı edi? Gu'na islep, su'yekleri sho'lde qalg'anlarg'a emes pe?
18 Quday kimlerge: «Menin' dem alıw ushın beretug'ın ma'kanıma kirmeysizler», – dep ant ishken edi? O'zine boysınbag'anlarg'a emes pe?
19 Solay etip, ko'rip turg'anımızday, olar isenbegenlikten sol jerge kire almadı.
