Evreyler 5 bob
1 Ha'r bir bas ruwxaniy adamlar arasınan tan'lap alınadı ha'm ol Qudayg'a baylanıslı islerde adamlardın' wa'kili bolıp, olardın' gu'naları ushın Qudayg'a sadaqa ha'm qurbanlıqlar beriw ushın tayınlanadı.
2 Bilmey qalıp joldan adasqanlarg'a ol mu'la'yimlilik penen qatnas jasay aladı. O'ytkeni onın' o'zinin' de ha'lsiz jerleri bar.
3 Sol sebepten ol tek xalıqtın' gu'naları ushın emes, al o'zinin' gu'naları ushın da qurbanlıq beriwi sha'rt.
4 Hesh bir adam bas ruwxaniy bolıw ma'rtebesine o'zliginen erise almaydı. Tek Xaron sıyaqlı Quday ta'repinen shaqırılsa g'ana erise aladı.
5 Sol sıyaqlı, Masix ta bas ruwxaniy bolıw ma'rtebesine iye bolıw ushın, O'zin O'zi ullılag'an joq. Al Og'an: «Sen Menin' Ulımsan', Bu'gin Men Sag'an A'ke boldım» , – degen Qudaydın' O'zi Onı usı ma'rtebege eristirdi.
6 Muxaddes Jazıwdın' basqa jerinde Quday Og'an bılay degen: «Sen Melxisedek sıyaqlı, Ma'n'gige ruwxaniysen'».
7 Masix jer ju'zinde adam bolıp jasag'an ku'nlerde O'zin o'limnen qutqara alatug'ın ku'shke iye bolg'an Qudayg'a ba'lent dawıs penen nala etip, ko'z jasların to'gip, duwa etip jalbarındı. Ol Qudayg'a boysıng'anlıqtan, Quday Onı esitti.
8 Ol Qudaydın' Ulı bolsa da, shekken azapları arqalı boysınıwdı u'yrendi.
9 Masix usı ta'rizde minsizlikke erisip, O'zine boysınatug'ınlardın' ha'mmesi ushın ma'n'gilik qutqarılıwg'a jol ashtı
10 ha'm Ol Quday ta'repinen Melxisedek sıyaqlı bas ruwxaniy, dep ataldı.
11 Melxisedek haqqında aytajaq ko'p so'zlerimiz bar, biraq sizler zeyinsiz bolg'anlıqtan, tu'sindiriw qıyın boladı.
12 Usı waqıtqa kelip, sizler mug'allim bolıwın'ız kerek edi. Biraq sizler Qudaydın' so'zlerinin' da'slepki tiykarların qaytadan u'yreniwge mu'ta'jsiz. Sizlerge ku'shli awqat emes, al su't kerek!
13 Su't penen azıqlanatug'ın ha'r bir adam go'dek, yag'nıy haqıyqatlıq so'zi boyınsha jasawda ta'jiriybesiz adam bolg'anı.
14 Al ku'shli awqat eresek adamlar ushın, yag'nıy o'mirdegi ta'jiriybesi arqalı jaman menen jaqsını ayırıw sezimine iye bolg'anlar ushın arnalg'an.
