Evreyler 6 bob

Qudaydın' o'zgermeytug'ın wa'desi(13-20).

¹ Sonlıqtan Masix haqqında baslang'ısh ta'liymattı u'yreniwde toqtap qalmayıq, al alg'a ilgerilep, jetisip barayıq. O'limge jetelewshi isler ushın ta'wbe etiwden, Qudayg'a iseniwden,

² suwg'a shomıldırıw haqqında qag'ıydalardan, qol qoyıp duwa etiwden, o'lilerdin' tiriliwinen ha'm ma'n'gilik hu'kimnen ibarat bolg'an sol ta'liymattın' tiykarların qaytadan salmayıq.

³ Eger Quday ruxsat berse, bizler alg'a ilgerilep, jetisip baramız.

⁴ Bir ma'rtebe haqıyqatlıq nurı tu'sip, Qudaydın' sıyının' da'min tatqan ha'm Muxaddes Ruwxqa sherik bolg'anlardı,

⁵ Qudaydın' so'zinin' jaqsı ekenin ha'm keleshektin' qu'diretli islerin o'mirlerinde ko'rip bolıp,

⁶ isenimnen qaytqanlardı du'zetip ta'wbe qıldırıw mu'mkin emes. Sebebi olar Qudaydın' Ulın o'zleri qaytadan atanaq ag'ashqa shegelep, masqara qılg'an boladı.

⁷ U'stine jiyi-jiyi jawg'an jawındı ishken ha'm o'zinde islegenlerge paydalı zu'ra'a't bergen jerdi Quday jarılqaydı.

⁸ Biraq, shen'gel ha'm jantaq o'sirgen jer jaramsız bolıp, ko'p ku'tpey g'arg'ısqa ushıraydı ha'm aqırı jandırılıp jiberiledi.

⁹ Sizlerge kelsek, su'yikli tuwısqanlarım, bizler usılay desek te, sizlerdin' qutqarılıwg'a baylanıslı ele de ko'birek jarılqawlarg'a iye ekenin'izge isenimimiz ka'mil.

¹⁰ O'ytkeni Quday a'dalatsız emes: Ol sizlerdin' miynetin'izdi ha'm iseniwshilerge qılg'an ha'm qılıp atırg'an xızmetin'iz arqalı O'zine ko'rsetken su'yispenshiligin'izdi umıtpaydı.

¹¹ Ha'r birin'izdin' u'mitin'izdi aqırına deyin bekkem saqlawın'ız ushın, usılay g'ayrat salıwın'ızdı a'rman etemiz.

¹² Ja'ne de erinshek bolmay, Quday ta'repinen wa'de etilgenlerdi isenim ha'm sabırlılıq penen alg'anlardan o'rnek alıwın'ızdı qa'leymiz.

¹³ Quday İbrayımg'a wa'de bergende, O'zinen ullıraq hesh kim bolmag'anlıqtan, O'zinin' atı menen ant iship,

¹⁴ bılay degen edi: «Seni u'sti-u'stine jarılqayman, Urpaqların'dı sansız qılıp ko'beytemen» .

¹⁵ Solay etip, İbrayım sabırlılıq penen ku'tip, wa'de etilgendi aldı.

¹⁶ Adamlar o'zlerinen ullıraq bolg'an menen ant ishedi. Olar ushın ant aytılg'an so'zlerdi tastıyıqlap, ha'r bir tartıstı toqtatadı.

¹⁷ Sol sıyaqlı, Quday da O'z erkinin' o'zgermeytug'ının wa'deni alg'anlarg'a ashıq ko'rsetpekshi bolıp, wa'desin ant penen tastıyıqladı.

¹⁸ Solay etip, usı eki na'rse, yag'nıy wa'de ha'm ant o'zgermeydi. Sebebi Quday olardı aytqanda o'tirik so'ylewi mu'mkin emes. Sonlıqtan o'zlerimizge berilgen u'mitti bekkem saqlawımız ushın, Qudaydan pana tapqan bizler olar arqalı u'lken jubanıshqa iye bolamız.

¹⁹ Bizlerdin' bul u'mitimiz janlarımız ushın kemenin' ko'shkisi sıyaqlı isenimli ha'm bekkem. Usı u'mit bizlerdi aspandag'ı Muxaddes shatırdın' perdesinin' arg'ı ta'repine o'tkizedi.

²⁰ İysa bizler ushın sol jerge bizlerden aldın kirip, Melxisedek sıyaqlı ma'n'gige bas ruwxaniy boldı.