Evreyler 8 bob
1 Aytqanlarımızdın' toq eteri mınadan ibarat: bizlerdin' aspanda qu'diretli Qudaydın' on' jag'ında otırg'an bas ruwxaniyimiz İysa bar.
2 Ol sol jerde adam ta'repinen emes, al Quday ta'repinen qurılg'an haqıyqıy ha'm muxaddes shatırda xızmet qıladı.
3 Ha'r bir bas ruwxaniy sadaqa ha'm qurbanlıqlar beriw ushın tayınlanadı. Sonlıqtan bizlerdin' bas ruwxaniyimizdin' de beretug'ın bir na'rsesi bolıwı tiyis edi.
4 Eger İysa jer ju'zinde qalg'anda, ruwxaniy bolmas edi. O'ytkeni a'lle qashan jer ju'zinde Muxaddes Nızam boyınsha sadaqalar beretug'ın ruwxaniyler bar.
5 Biraq, bul ruwxaniyler aspandag'ı haqıyqıy ha'm muxaddes shatırdın' u'lgisi ha'm ko'len'kesi bolg'an jerdegi Muxaddes shatırda xızmet etedi. Sebebi Muwsa usı Muxaddes shatırdı qurıwg'a kiriskende, Quday ta'repinen bılay dep eskertilgen edi: «Abayla, ha'r bir na'rseni tawda o'zin'e ko'rsetilgen u'lgi boyınsha isle» .
6 Al İysa burıng'ıdan da jaqsıraq wa'delerge tiykarlanıp du'zilgen, Quday menen adamlardın' arasındag'ı jaqsıraq kelisimnin' ta'welleshisi boldı. Sonlıqtan Ol ruwxaniylerdin' xızmetinen anag'urlım joqarıraq xızmetke iye boldı.
7 Eger sol birinshi kelisim kemshiliksiz bolg'anda, onın' ornına ekinshisin du'ziwdin' keregi bolmas edi.
8 Al, xalqın ayıplı dep tapqan Qudaydın' so'zleri mınaday: «Jaratqan İyemiz bılay deydi: „Men İzrail xalqı ha'm Yahudiya xalqı menen, Jan'a kelisim du'zetug'ın ku'nler jaqınladı.
9 Bul kelisim Men olardın' ata-babalarının' qolınan uslap, Mısır elinen alıp shıqqan waqtımda, Olar menen du'zgen kelisim sıyaqlı bolmaydı. O'ytkeni olar Menin' kelisimime sadıq bolmadı. Sonda Men de olardan ju'zimdi teris burdım.
10 Sol ku'nlerden son', İzrail xalqı menen du'zetug'ın kelisimim mınaw: Nızamlarımdı olardın' sana-sezimlerine salıp, Ju'reklerine oyıp jazıp qoyaman. Men olardın' Qudayı bolaman, Olar Menin' xalqım boladı.
11 Hesh kimnin' janındag'ı adamg'a, Ya bolmasa, o'z tuwısqanına, İyemizdi bil, dep u'yretiwine ha'jet joq. Sebebi kishkenesinen u'lkenine deyin, Olardın' ha'mmesi Meni biletug'ın boladı.
12 Men olardın' nahaq islerin rehimlilik penen keshiremen, Gu'naların qaytıp esime almayman“».
13 Quday «jan'a kelisim» dep, burıng'ısının' go'nergen ko'rsetti. Go'nergen na'rse ko'p o'tpey joq boladı.
