Evreyler 9 bob
1 Birinshi kelisim da'wirinde sıyınıw qag'ıydaları ha'm adamnın' qolınan qurılg'an Muxaddes shatır bar edi.
2 Qurılg'an sol Muxaddes shatırdag'ı «Muxaddes bo'lme» dep atalatug'ın birinshi bo'lmede shıra qoyg'ısh, stol ha'm stoldın' u'stinde Qudayg'a usınılg'an nanlar bolatug'ın edi.
3 Muxaddes shatırdag'ı ekinshi perdenin' artında «En' muxaddes bo'lme» dep atalatug'ın ekinshi, ishki bo'lme bar edi.
4 Bul bo'lmede xosh iyisli zatlar tu'tetiletug'ın altınnan islengen orın ha'm ha'mme jeri altın menen qaplang'an Kelisim sandıg'ı bar edi. Sandıqtın' ishinde manna salıng'an altın gu'ze, Xaronnın' bo'rtken hasası ha'm on buyrıq oyıp jazılg'an taslar bar edi.
5 Sandıqtın' u'stinde kerub atlı ullı perishtelerdin' mu'sini bar edi. Olar sandıqtın' u'stindegi gu'nalar keshiriletug'ın jerdi qanatları menen jawıp turatug'ın edi. Biraq, ha'zir bul na'rseler haqqında birme-bir ayta almaymız.
6 Muxaddes shatır usılay u'skenelengen edi. Onın' birinshi bo'lmesine ruwxaniyler ha'r qashan kirip, sıyınıw xızmetin orınlaytug'ın edi.
7 Al ekinshi, ishki bo'lmege bolsa, bir jılda bir ma'rtebe tek bas ruwxaniy g'ana kire alatug'ın edi. Ol o'zi menen birge sol jerge o'zinin' gu'nalarının' ha'm xalıqtın' bilmey islegen gu'nalarının' keshiriliwi ushın shalıng'an qurbanlıqtın' qanın alıp kiriwi tiyis edi.
8 Bul arqalı Muxaddes Ruwx bizlerge mınanı bildiredi: Muxaddes shatırdın' birinshi bo'lmesi ele bar eken, En' muxaddes bo'lmege baratug'ın jol jabıq boladı.
9 Bul ha'zirgi zaman ushın tımsal bolıp, berilgen sadaqalar ha'm qurbanlıqlardın' Qudayg'a sıyınatug'ın adamnın' hu'jdanın pa'kley almaytug'ının ko'rsetedi.
10 Bular tek jewge, ishiwge ha'm ha'r qıylı diniy tazalanıw u'rdislerine baylanıslı na'rseler bolıp, jan'a du'zim payda bolg'ang'a deyin ku'shke iye bolg'an sırtqı qag'ıydalar g'ana.
11 Biraq Masix payda bolg'an jaqsı na'rselerdin' bas ruwxaniyi bolıp kelip, qoldan sog'ılmag'an, yag'nıy bul du'nyadag'ı jaratılıstan bolmag'an ullıraq ha'm minsiz Muxaddes shatırg'a kirdi.
12 Masix teke ha'm baspaqlardın' qanı menen emes, al O'z qanı menen En' muxaddes bo'lmege birinshi ha'm son'g'ı ma'rtebe kirip, bizlerge ma'n'gilik qutqarılıw alıp keldi.
13 Burın haramlanıp qalg'anlardın' denesinin' pa'k bolıwı ushın, olardın' u'stilerine teke menen o'gizlerdin' qanı ha'm qasharlardın' ku'li sebilip, olardı muxaddes qılatug'ın edi.
14 Al endi bolsa, ma'n'gilik Muxaddes Ruwx arqalı O'zin minsiz qurbanlıq qılıp Qudayg'a bag'ıshlag'an Masixtın' qanı bizlerdin' tiri Qudayg'a xızmet ete alıwımız ushın, hu'jdanımızdı o'limge jetelewshi islerden tazalawı so'zsiz.
15 Solay etip, Quday ta'repinen shaqırılg'anlardın' wa'de etilgen ma'n'gilik miyrastı alıwı ushın, Masix Quday menen adamlardın' arasında du'zilgen jan'a kelisimnin' ta'welleshisi boldı. O'ytkeni Ol adamlardı birinshi kelisimnin' waqtında islegen gu'nalarınan qutqarıw ushın, O'zin qurban etti.
16 Wa'siyat bar jerde wa'siyat etken adamnın' o'limin tastıyıqlaw da kerek boladı.
17 Wa'siyat tek adamnın' o'liminen son' g'ana ku'shke iye boladı. Wa'siyat etken adam tiri bolsa, ol hesh qanday ku'shke iye emes.
18 Sonlıqtan birinshi kelisim de qan to'gilgennen keyin ku'shke endi.
19 Muwsa Muxaddes Nızamnın' ha'r bir buyrıg'ın xalıqqa ja'riyalag'annan son', baspaq ha'm tekelerdin' suw qosılg'an qanına qızıl ju'n ha'm issop sho'bin malıp alıp, kelisim kitabının' da, pu'tkil xalıqtın' da u'stine septi de:
20 «Bul – Qudaydın' sizler menen du'zgen kelisimin bekitetug'ın qan» , – dedi.
21 Sonday-aq, ol Muxaddes shatırdın' ha'm sıyıng'anda qollanılatug'ın barlıq zatlardın' u'stine de qan septi.
22 Haqıyqattan da, Muxaddes Nızam boyınsha derlik ha'mme na'rse qan menen tazalanadı. Qan to'gilmese, gu'na keshirilmeydi.
23 Solay etip, aspandag'ı haqıyqıy na'rselerdin' u'lgisi bolg'an bul na'rseler usılay tazalanıwı kerek edi. Biraq aspandag'ı na'rseler bolsa, onnan da jaqsıraq qurbanlıqlar menen tazalanıwı tiyis.
24 Sebebi Masix aspandag'ı haqıyqıy ha'm muxaddes shatırdın' u'lgisi bolg'an, qoldan qurılg'an Muxaddes shatırg'a emes, al tuwrı aspang'a kirip, ha'zir bizler ushın Qudaydın' aldında tur.
25 Maldın' qanı menen En' muxaddes bo'lmege jıl sayın kiretug'ın bas ruwxaniy sıyaqlı, aspang'a kirgen Masixqa O'zin qayta-qayta qurban etiwdin' keregi joq.
26 Eger olay bolmag'anda, du'nya jaratılg'annan baslap Masixtın' qayta-qayta azap shegiwi tiyis bolar edi. Biraq Masix O'zin qurban etip, gu'nanı joq qılıw ushın, zamannın' aqırında tek bir ma'rtebe jerge keldi.
27 Bir ma'rtebe o'lip, onnan son' hu'kim etiliw adamlardın' ta'g'dirine jazılg'an.
28 Sol sıyaqlı, Masix ta ko'plerdin' gu'naların juwıw ushın, birinshi ha'm son'g'ı ma'rtebe qurban boldı. Ekinshi ma'rtebe bolsa, Ol gu'nalardı juwıw ushın emes, al O'zin intizarlıq penen ku'tip atırg'anlardı tolıq qutqarıw ushın keledi.
