Ayan 10 bob
1 Son'ınan men aspannan tu'sip kiyatırg'an basqa bir ku'shli perishteni ko'rdim. Ol bultqa orang'an bolıp, basının' u'stinde raduga bar edi. Ju'zi quyashqa, ayaqları otlı su'tinge uqsag'an edi.
2 Onın' qolında ashılg'an bir kitapsha bar edi. Ol on' ayag'ın ten'izge, al sol ayag'ın jerge qoyıp,
3 arıslannın' aqırg'anına uqsag'an ba'lent dawıs penen baqırdı. Ol baqırg'anda, jeti gu'ldirmama sesti gu'rkirep, tilge kirdi.
4 Jeti gu'ldirmama tilge kirgende, men jazbaqshı bolıp edim, biraq aspannan bir dawıstın': «Jeti gu'ldirmamanın' aytqanların jazba, olardı qupıya saqla», – degenin esittim.
5 Sonnan keyin, bir ayag'ı menen ten'izde, bir ayag'ı menen jerde turg'anın o'zim ko'rgen sol perishte on' qolın aspang'a ko'terdi.
6 Ol aspandı ha'm aspandag'ılardın' ha'mmesin, jerdi ha'm jerdegilerdin' ha'mmesin, ten'izdi ha'm ten'izdegilerdin' ha'mmesin jaratqan ma'n'gi tiri Qudaydın' atı menen ant iship: «Endi waqıt qalmadı.
7 Biraq, jetinshi perishte ka'rnayın shertetug'ın ku'nlerde Qudaydın' O'z xızmetshileri – payg'ambarlarg'a xabarlag'an sırlı jobası a'melge asadı», – dedi.
8 O'zim aspannan esitken dawıs menin' menen ja'ne so'ylese baslap: «Barıp, ten'izde ha'm jerde turg'an perishtenin' qolındag'ı ashıwlı kitapshanı al», – dedi.
9 Men perishtenin' janına barıp, kitapshanı mag'an beriwin soradım. Perishte mag'an: «Bunı al da, jep qoy. Ol qarnın'a barg'anda ashshı, al awzın'da pal sıyaqlı tatlı boladı», – dedi.
10 Sonda men kitapshanı perishtenin' qolınan alıp, jep qoydım. Ol awzımda pal sıyaqlı tatlı boldı, al jutqanımnan keyin qarnımdı ashıttı.
11 Son'ınan mag'an bılay delindi: «Sen ja'ne ko'p xalıqlar, milletler, tiller ha'm patshalar tuwralı payg'ambarshılıq aytıwın' tiyis».
