Ayan 16 bob
1 Son'ınan men İbadatxanadan shıqqan bir ba'lent dawıstın' jeti perishtege: «Barın'lar! Qudaydın' g'a'zebine tolı jeti keseni jerge to'gin'ler!» – degenin esittim.
2 Sonda birinshi perishte barıp, keseni jerge to'kti. Birinshi jırtqısh haywannın' tamg'asına iye bolıp, onın' mu'sinine tabınatug'ınlardın' u'stinde azap beriwshi jerkenishli jaralar payda boldı.
3 Ekinshi perishte kesesin ten'izge to'kti. Ten'iz o'linin' qanına uqsaytug'ın qang'a aylanıp, ten'izdegi pu'tkil tirishilik nabıt boldı.
4 U'shinshi perishte kesesin da'ryalarg'a ha'm suw bulaqlarına to'kti. Olar da qang'a aylandı.
5 Suwlar u'stinen ha'kimlik etetug'ın perishtenin' bılay degenin esittim: «Ha'zir bar ha'm burınnan bar bolg'an muxaddes Qudayımız! Senin' shıg'arg'an bul hu'kimlerin' a'dil.
6 Muxaddeslerdin' ha'm payg'ambarlardın' qanın to'kkeni ushın, Sen olarg'a qan ishkizdin'. Bug'an olar ılayıqlı».
7 Sonda men qurbanlıq shalınatug'ın orınnan shıqqan bir dawıstın' bılay degenin esittim: «Awa, ha'mme na'rsege qu'diretli Quday İyemiz, Senin' hu'kimlerin' tuwrı ha'm a'dil».
8 To'rtinshi perishte kesesin quyashqa to'kti. Sonlıqtan quyashqa adamlardı ot penen ku'ydiriw ku'shi berildi.
9 Adamlardı ku'shli ha'wir ku'ydirip jiberdi. Olar ta'wbe etpedi ha'm usı ba'lelerdin' u'stinen biylikke iye bolg'an Qudaydı alg'ıslamay, Onın' atına til tiygizdi.
10 Besinshi perishte kesesin jırtqısh haywannın' taxtı u'stine to'kti. Jırtqısh haywannın' patshalıg'ı tas tu'nek bolıp qaldı. Adamlar azapqa shıdamay, tillerin tisledi.
11 Biraq olar jaman is-ha'reketleri ushın ta'wbe etpey, ko'rip atırg'an azapları ha'm jaraları sebepli, aspandag'ı Qudayg'a til tiygizdi.
12 Altınshı perishte kesesin ullı Evfrat da'ryasına to'kti. Ku'nshıg'ıstan keletug'ın patshalarg'a jol tayarlaw ushın, da'ryanın' suwı qurıp qaldı.
13 Bunnan son', men aydarhanın', jırtqısh haywannın' ha'm jalg'an payg'ambardın' awzınan shıqqan qurbaqalarg'a uqsaytug'ın u'sh jawız ruwxtı ko'rdim.
14 Bul ruwxlar – ka'ramatlar isleytug'ın jinlerdin' ruwxları edi. Olar ha'mme na'rsege qu'diretli Qudaydın' ullı ku'ninde bolatug'ın sawashqa pu'tkil du'nyanın' patshaların jıynaw ushın atlandı.
15 «Mine, Men urı sıyaqlı ku'tilmegende kelemen! Jalan'ash bolıp ju'rip, uyatqa qalmawı ushın u'stindegi kiyimlerin saqlap, sergek turg'anlar qanday baxıtlı!» – (dedi İyemiz İysa).
16 U'sh jawız ruwx evreyshe «Armagedon» dep atalatug'ın jerge patshalardı jıynadı.
17 Jetinshi perishte kesesin hawag'a to'kti. İbadatxanadag'ı taxttan shıqqan ba'lent bir dawıs: «Orınlandı», – dedi.
18 Sonda shaqmaq shag'ıp, gu'rsildegen dawıslar esitildi ha'm gu'ldirmama gu'rkirep, ku'shli jer silkiniw boldı. Adamzat jer ju'zinde payda bolg'alı berli, bunday ku'shli jer silkiniw hesh qashan bolg'an emes.
19 Ullı qala u'shke bo'linip quladı. Milletlerdin' qalaları da qıyralıp qaldı. Quday ullı Babilondı yadında saqlap, O'zinin' qa'ha'rli g'a'zebinin' sharabı tolı keseni og'an ishiw ushın berdi.
20 Barlıq atawlar ornınan ko'ship, tawlar joq bolıp ketti.
21 Aspannan adamlardın' u'stine ha'r bir danası batpanday ku'shli burshaq jawdı. Burshaq sonshelli qorqınıshlı bolıp, adamlar usı ba'le ushın Qudayg'a til tiygizdi.
