Ayan 17 bob
1 Jeti kesesi bar jeti perishtenin' biri jaqınlap keldi de, menin' menen so'ylese baslap bılay dedi: – Berman kel, men sag'an ko'p suwlardın' u'stinde otırg'an ullı buzıq hayaldın' qanday jazag'a tartılatug'ının ko'rsetemen.
2 Du'nya patshaları onın' menen buzıqshılıq islegen edi. Jer ju'zinde jasawshılar onın' buzıqshılıg'ının' sharabına ma's bolg'an edi.
3 Son'ınan perishte meni Muxaddes Ruwxtın' basqarıwında sho'lge alıp bardı. Ol jerde men jeti baslı, on shaqlı, u'sti Qudayg'a til tiygizetug'ın atlarg'a tolı, jırtqısh qızıl haywannın' u'stinde otırg'an bir hayaldı ko'rdim.
4 Hayal qızg'ılt ko'k ha'm qımbatlı qızıl lipaslar kiyip, altın, hasıl taslar ha'm hinjiler menen bezengen edi. Onın' qolında jerkenishli na'rselerge ha'm buzıqshılıg'ının' haramılıqlarına tolı altın kese bar edi.
5 Al man'layına bolsa: «ULLI BABİLON, DU'NYANIN' BUZIQLARININ' HA'M JERKENİSHLİ NA'RSELERİNİN' ANASI», degen sırlı at jazılg'an edi.
6 Hayaldın' muxaddeslerdin' ha'm İysa haqqında gu'walıq berip o'lgenlerdin' qanına ma's ekenin ko'rdim. Bunı ko'rip, men qattı tan' qaldım.
7 Perishte mag'an bılay dedi: – Nege tan' qalıp tursan'? Men sag'an hayaldın' ha'm onı ko'terip ju'rgen jeti baslı, on shaqlı jırtqısh haywannın' sırın ashıp beremen.
8 Sen ko'rgen jırtqısh haywan burın bar edi, biraq ha'zir joq. Birazdan son', ol teren' tun'g'ıyıqtan shıg'ıp, nabıt boladı. Du'nya jaratılg'annan beri atları O'mir kitabında jazılmag'an jer ju'zinde jasawshılar jırtqısh haywandı ko'rgende hayran qaladı. Sebebi bul haywan bir waqıtları bar edi, endi joq, biraq ja'ne keledi.
9 Bunı tu'siniw ushın danalıq kerek. Jeti bas – hayal u'stinde otırg'an jeti tawdı ha'm jeti patshanı bildiredi.
10 Bulardın' besewi quladı, birewi bar, basqası ele kelmedi. Ol keledi, biraq uzaq waqıt turmaydı.
11 Burın bar bolg'an, biraq endi joq jırtqısh haywannın' o'zi segizinshi patsha. Aldın'g'ı jeti patshanın' biri bolg'an ol nabıt boladı.
12 Sen ko'rgen on shaq ele patshalıq etpegen on patsha. Biraq bular jırtqısh haywan menen birlikte az waqıt patshalıq etiw ushın biylik aladı.
13 Bul patshalar bir niyetke iye bolıp, ku'shlerin ha'm biyligin jırtqısh haywang'a beredi.
14 Olar Qozıg'a qarsı urısadı, biraq Qozı olardı jen'edi. O'ytkeni Qozı – hu'kimdarlar Hu'kimdarı ha'm patshalar Patshası. Onın' menen birge bolg'anlar – shaqırılg'anlar, tan'lang'anlar ha'm Og'an sadıq qalg'anlar.
15 Son'ınan perishte mag'an bılay dedi: – Mına sen ko'rgen suwlar, yag'nıy u'stinde buzıq hayal otırg'an suwlar – xalıqlar, alamanlar, milletler ha'm tiller.
16 Sen ko'rgen on shaq ha'm jırtqısh haywan buzıq hayaldı jek ko'rip, onın' ha'mme na'rsesin talantaraj etedi ha'm onı tır jalan'ash qaldıradı. Onın' etin jep, o'zin otqa jandıradı.
17 Sebebi Quday O'zinin' erkin orınlaw ushın, olardın' kewillerine usı niyetti salg'an edi. Solay etip, Qudaydın' so'zleri orınlanıwg'a deyin olar o'z ara kelisip, patshalıqların jırtqısh haywang'a beredi.
18 Sen ko'rgen hayal – du'nya patshalarının' u'stinen ha'kimlik etetug'ın ullı qala.
