Ayan 20 bob

Mın' jıl (1-6), Shaytannın' jazalanıwı (7-10), O'lilerdin' hu'kim etiliwi (11-15).

¹ Son' men qolında teren' tun'g'ıyıqtın' gilti ha'm u'lken shınjırı bar bir perishtenin' aspannan tu'skenin ko'rdim.

² Perishte aydarhanı, yag'nıy a'za'zu'l ha'm shaytan dep atalg'an sol eski jılandı tutıp, mın' jılg'a baylap tasladı.

³ Mın' jıl tamam bolmag'ansha, milletlerdi endi azg'ırmasın dep, onı teren' tun'g'ıyıqqa ılaqtırıp jiberdi. Ol jerdi jawıp, awzın mo'rlep tasladı. Mın' jıl o'tkennen son', ol qısqa mu'ddetke bosatılıwı tiyis.

⁴ Son'ınan men taxtlardı ha'm olarda otırg'anlardı ko'rdim. Olarg'a hu'kim etiw biyligi berilgen edi. İysanın' gu'walıg'ı ha'm Qudaydın' so'zi ushın bası kesilgenlerdin' janların da ko'rdim. Bular jırtqısh haywang'a ha'm onın' mu'sinine tabınbag'an, man'laylarına ha'm qollarına jırtqısh haywannın' tamg'asın bastırmag'an edi. Olar tirilip, Masix penen birge mın' jıl patshalıq etti.

⁵ Bul – birinshi qayta tiriliw. Qalg'an o'liler mın' jıl tamam bolmag'ansha tirilmedi.

⁶ Birinshi qayta tiriliwde qatnasqanlar baxıtlı ha'm muxaddes. Ekinshi o'limnin' bular u'stinen hesh qanday biyligi joq. Olar Qudaydın' ha'm Masixtın' ruwxaniyleri bolıp, Onın' menen birlikte mın' jıl patshalıq etedi.

⁷ Mın' jıl o'tkennen son', shaytan qamalg'an jerinen azat etiledi.

⁸ Jer ju'zinin' to'rt mu'yeshindegi milletlerdi, Gog ha'm Magogtı azg'ırıp, olardı sawashqa jıynaw ushın, ol qamaqtan shıg'adı. Olardın' sanı ten'izdin' qumı sıyaqlı san-sanaqsız boladı.

⁹ Olar jer ju'zin basıp o'tip, muxaddeslerdin' ma'kanı bolg'an Qudaydın' su'yikli qalasın qorshap aldı. Biraq aspannan ot jawıp, olardı ku'ydirip, joq qılıp jiberdi.

¹⁰ Al olardı azg'ırg'an shaytan ot ha'm ku'kirt ko'line ılaqtırıldı. Burın sol jerge jırtqısh haywan ha'm jalg'an payg'ambar da ılaqtırılg'an edi. Olar ku'ni-tu'ni, ma'n'gige azap shegedi.

¹¹ Sonda men bir ullı aq taxttı ha'm taxtta Otırg'andı ko'rdim. Jer ha'm aspan Onın' ju'zinen qashıp, joq bolıp ketti.

¹² Taxttın' aldında turg'an u'lken-kishi o'lilerdi de ko'rdim. Son'ınan bir kitaplar ashıldı. Basqa bir kitap ta ashıldı, bul – O'mir kitabı edi. O'liler kitaplarda jazılg'anlar boyınsha, o'z islerine qaray hu'kim etildi.

¹³ Ten'iz o'zinde bolg'an o'lilerdi, o'lim ha'm o'liler ma'kanı da o'zlerinde bolg'an o'lilerdi shıg'arıp berdi. Ha'r biri o'z islerine qaray hu'kim etildi.

¹⁴ O'lim ha'm o'liler ma'kanı ot ko'line ılaqtırıldı. Bul ot ko'li – ekinshi o'lim.

¹⁵ Atları O'mir kitabında jazılmag'anlardın' ha'mmesi ot ko'line ılaqtırıldı.