Ayan 4 bob
1 Bunnan son', aspanda ashıq turg'an bir qapını ko'rdim. Men burın esitken dawıs, yag'nıy ka'rnay sestine uqsag'an ses mag'an bılay dedi: «Bul jerge ko'teril! Men sag'an bunnan son' bolıwı tiyis waqıyalardı ko'rsetemen».
2 Sonda men da'rhal Muxaddes Ruwxqa tolıp, aspanda bir taxtı ha'm onda Otırg'andı ko'rdim.
3 Taxtta Otırg'annın' ko'rinisi yaspis, sardis sıyaqlı hasıl taslarday jarqırap, al taxtın' a'tirapın jarqırag'an hasıl zumrat tası sıyaqlı raduga qorshap turg'an edi.
4 Taxtın' do'gereginde basqa jigirma to'rt taxt bolıp, bul taxtlarda aq kiyimli, baslarına altın taj kiygen jigirma to'rt aqsaqal otırg'an edi.
5 Taxttan shaqmaq shag'ıp, gu'rsildegen dawıs shıg'ıp, gu'ldirmamanın' gu'rkiregeni esitilip turg'an edi. Al taxtın' aldında jeti shıra janıp turg'an edi. Bul – Qudaydın' jeti ruwxı.
6 Ja'ne taxtın' aldında kristall sıyaqlı shiyshe ten'iz bar edi. Taxttın' to'rt ta'repinde yag'nıy do'gereginde aldı-artı ko'zge tolg'an to'rt maqluq turg'an edi.
7 Olardın' birinshisi arıslang'a, ekinshisi buzawg'a uqsag'an edi. Al u'shinshisinin' ju'zi adamnın' tu'rindey, to'rtinshisi ushıp baratırg'an bu'rkit sıyaqlı edi.
8 Ha'r birinin' altı qanatı bolıp, qanatlarının' ishi-sırtı tolg'an ko'z edi. Olar ku'ni-tu'ni toqtamastan: «Bar bolg'an, ha'zir bar ha'm keleshekte bar bolatug'ın ha'm keletug'ın, ha'mme na'rsege qu'diretli Quday İyemiz muxaddes, muxaddes, muxaddes!» – deydi.
9 To'rt maqluq ma'n'gi o'mir su'retug'ın taxtta Otırg'andı ullılap, Og'an hu'rmet ko'rsetip shu'kirlik bildirgen sayın,
10 jigirma to'rt aqsaqal taxtın' u'stinde otırg'an ma'n'gi o'mir Su'retug'ınnın' aldına jıg'ılıp, Og'an tabındı. Olar tajların taxtın' aldına qoyıp bılay dedi:
11 «Quday İyemiz! Sen dan'q, hu'rmet ha'm qu'diretti alıwg'a ılayıqlısan'. Sebebi ha'mme na'rseni Sen jaratqansan'. Ha'mmesi Senin' erkin' menen jaratıldı ha'm bar boldı».
