Ayan 5 bob
1 Sonda taxtta Otırg'annın' on' qolında ishi-sırtı jazılg'an, jeti mo'r basılıp bekitilgen bir kitaptı ko'rdim.
2 Ja'ne men ba'lent dawıs penen ja'riyalap baqırg'an bir ku'shli perishteni de ko'rdim. Ol jar salıp: «Kim bekitilgen mo'rlerdi buzıp, kitaptı ashıwg'a ılayıqlı?» – dedi.
3 Biraq aspanda da, jerde de, jerdin' astında da kitaptı ashıp, onın' ishine qarawg'a ılayıqlı hesh kim bolmadı.
4 Kitaptı ashıp, onın' ishine qarawg'a ılayıqlı hesh kim tabılmag'anlıqtan, men qattı jıladım.
5 Sonda aqsaqallardın' biri mag'an: – Jılama! Qara, Yahuda urıwınan shıqqan Arıslan, Dawıttın' Urpag'ı jen'ip shıqtı! Ol bekitilgen mo'rlerdi buzıp, kitaptı asha aladı, – dedi.
6 Sol waqıtta men to'rt maqluq penen aqsaqallar qorshap turg'an taxtın' ortasında bawızlang'ang'a uqsag'an bir Qozını ko'rdim. Qozının' jeti mu'yizi ha'm jeti ko'zi bar edi. Bul ko'zler – Qudaydın' pu'tkil jer ju'zine jibergen jeti ruwxı.
7 Qozı jaqınlap barıp, taxtta Otırg'annın' on' qolınan kitaptı aldı.
8 Qozı kitaptı alg'anda, to'rt maqluq ha'm jigirma to'rt aqsaqal Onın' ayag'ına jıg'ıldı. Ha'r birinin' qolında tarlı a'sbap ha'm xosh iyisli zatlarg'a tolg'an altın keseler bar edi. Bul xosh iyisli zatlar muxaddeslerdin' duwaların bildiredi.
9 Olar jan'a alg'ıs-maqtaw qosıg'ın aytıp bılay dedi: «Sen kitaptı alıwg'a ha'm bekitilgen mo'rlerdi buzıp ashıwg'a ılayıqlısan'! O'ytkeni Sen O'zin'di qurban ettin' ha'm ha'r bir urıw, til, Xalıq ha'm milletten shıqqan adamlardı Qudayg'a arnaw ushın, O'z qanın'dı to'gip, olardın' to'lemlerin o'tedin'.
10 Olardı patshalıg'ın'a eristirip, Qudaydın' xızmetindegi ruwxaniyler qıldın'. Olar jer ju'zinde ha'kimlik etedi»
11 Son'ınan taxttı, maqluqlardı ha'm aqsaqallardı qorshag'an esapsansız, mın'lag'an, millionlag'an perishtelerdi ko'rdim ha'm olardın' dawısların esittim.
12 Olar dawıslap qosıq aytıp bılay dedi: «Bawızlang'an Qozı ku'sh, baylıq, danalıq, qu'diret, Hu'rmet, dan'q ha'm alg'ıs-maqtawdı alıwg'a ılayıqlı».
13 Ja'ne men aspandag'ı, jer ju'zindegi, jerdin' astındag'ı ha'm ten'izdegi pu'tkil jaratılıstın', olardag'ı pu'tkil barlıqtın' bılay dep qosıq aytqanın esittim: «Taxtta otırg'an ha'm Qozı Alg'ıs-maqtawg'a, hu'rmetke, dan'qqa Ha'm qu'diretke ma'n'gige iye bolsın!».
14 To'rt maqluq: «Awmiyin!» dep juwap berdi, al jigirma to'rt aqsaqal jerge jıg'ılıp tabındı.
