Biyler 10 bob
1 Abimelextin' o'liminen keyin, İzraildı qutqarıw ushın İssaxar urıwınan Dodonın' aqlıg'ı, Puanın' ulı bolg'an Tola atlı bir adam shıqtı. Tola Efrayımnın' tawlı u'lkesindegi Shamirde jasaytug'ın edi.
2 Ol İzrailg'a jigirma u'sh jıl biylik etkennen son', qaytıs boldı ha'm Shamirde jerlendi.
3 Sonnan keyin, Giladtan Yair degen adam shıg'ıp, İzrailda jigirma eki jıl biylik etti.
4 Onın' otız ulı boldı. Olar otız eshekke minip, otız qalanı basqardı. Gilad jerindegi bul qalalar bu'gin de Yairge tiyisli qalalar dep ataladı.
5 Yair o'lip, Qamonda jerlendi.
6 İzraillılar Jaratqan İyenin' na'zerinde jawız bolg'an islerdi ja'ne isledi. Olar Baal ha'm Ashtarta mu'sinlerine, aramlılar, sidonlılar, moablılar, ammonlar ha'm filistlerdin' butlarına tabınıp ketti. Olar Jaratqan İyeni taslap ketti, Og'an sıyınbay qoydı.
7 Solay etip, izraillılarg'a g'a'zebi qaynag'an Jaratqan İye olardı filistler menen ammonlardın' qolına tapsırdı.
8 Olar İordan da'ryasının' arg'ı ta'repinde, Giladtag'ı amorlardın' jerinde jasaytug'ın pu'tkil izraillılardı sol jıldan baslap on segiz jıl dawamında ezip, olarg'a zulımlıq isledi.
9 Ammon xalqı Yahuda, Benyamin ha'm Efrayım urıwları menen urısıw ushın İordan da'ryasınan o'tti. Sol sebepli İzrail awır awhalda qaldı.
10 Sonda izraillılar Jaratqan İyege: – Bizler Sag'an qarsı gu'na isledik. Seni, o'z Qudayımızdı taslap, Baallarg'a tabınıp kettik, – dep nala shekti.
11 Jaratqan İye izraillılarg'a bılay dep juwap berdi: – Sizlerdi mısırlılardan, amorlardan, ammonlardan ha'm filistlerden qutqarg'an Men emes pe edim?
12 Sidonlılar, amalekler ha'm maonlılar sizlerge eziwshilik qılg'anda da, sizler Mag'an nala shekken edin'iz ha'm Men sizlerdi olardın' qolınan qutqarg'an edim.
13 Biraq sizler Meni taslap, basqa qudaylarg'a tabınıp kettin'iz. Sol sebepli Men de endi sizlerdi qutqarmayman.
14 Barın'lar, tan'lag'an qudayların'ızg'a nala etin'ler. Qıyınshılıqqa tu'skenin'izde, sizlerdi olar qutqarsın.
15 İzraillılar Jaratqan İyege: – Bizler gu'na isledik. Neni maqul dep tapsan', bizlerge sonı isle. Tek bu'gin bizlerdi qutqar, – dedi.
16 Son'ınan olar o'zlerindegi jat qudaylardın' mu'sinlerin ılaqtırıp taslap, Jaratqan İyege sıyındı. Jaratqan İye de izraillılardın' ja'bir shegiwine artıq shıdamadı.
17 Ammonlar urısıw ushın jıynalıp, Giladta orda qurg'anda, izraillılar da jıynalıp, Mispada ordasın qurdı.
18 Gilad a'skerlerinin' basshıları bir-birine: «Ammonlarg'a qarsı birinshi bolıp urıstı baslag'an adam pu'tkil Gilad xalqının' basshısı boladı», – dedi.
