Biyler 13 bob
1 İzrail xalqı Jaratqan İyenin' na'zerinde jawız bolg'an islerdi ja'ne isley basladı. Jaratqan İye de olardı qırıq jılg'a filistlerdin' qolına tapsırdı.
2 Sora qalasınan, Dan urıwınan bolg'an Manoax atlı bir adam bar edi. Onın' hayalı na'silsiz bolıp, hesh perzenti joq edi.
3 Jaratqan İyenin' perishtesi hayalg'a ko'rinip, og'an bılay dedi:– Sen na'silsiz bolıp, perzent ko'rmegen bolsan' da, endi ha'miledar bolıp, bir ul tuwasan
4 Endigiden bılay abaylı bol, sen sharap ta, basqa o'tkir ishimlik te ishpe ha'm hesh bir haram na'rse jeme.
5 Sebebi sen ha'miledar bolıp, bir ul tuwasan'. Onın' basına pa'ki tiymesin. O'ytkeni bala ana qursag'ınan baslap-aq, Qudayg'a bag'ıshlang'an boladı ha'm ol İzrail xalqın filistlerdin' qolınan qutqara baslaydı.
6 Hayal ku'yewine bılay dedi: – Qasıma Qudaydın' bir adamı keldi. Ol Qudaydın' perishtesi sıyaqlı ju'da' aybatlı edi. Men onnan qay jerden kelgenin soramadım, ol da mag'an atın aytpadı.
7 Biraq ol mag'an: «Sen ha'miledar bolıp, bir ul tuwasan'. Endigiden bılay, sharap ta, basqa o'tkir ishimlik te ishpe ha'm hesh bir haram na'rse jeme. Sebebi bala ana qursag'ınan baslap, o'letug'ın ku'nine deyin, Qudayg'a bag'ıshlang'an boladı», – dedi.
8 Sonda Manoax Jaratqan İyege duwa etip: «O İyem, Sen jibergen sol Qudaydın' adamı ja'ne keliwin ha'm tuwılatug'ın bala ushın ne islewimiz kerekligin bizlerge u'yretiwin jalbarınıp sorayman», – dedi.
9 Quday Manoaxtın' duwasın esitti. Hayal atızda otırg'an waqıtta, Qudaydın' perishtesi og'an ja'ne keldi. Biraq Manoax hayalının' janında joq edi.
10 Hayal ku'yewine xabar beriw ushın asıg'ıs tu'rde juwırıp ketti ha'm ku'yewine:– Ana birde qasıma kelgen adam mag'an ja'ne ko'rindi! – dedi.
11 Manoax turıp, hayalının' izine erdi ha'm sol adamnın' janına kelip, onnan: – Hayalım menen so'ylesken siz be? – dep soradı. Sol adam og'an: – Awa, men, – dedi.
12 Manoax onnan: – Sizin' aytqanların'ız orınlang'anda, bala qalay jasawı ha'm ne islewi kerek? – dep soradı.
13 Jaratqan İyenin' perishtesi Manoaxqa bılay dedi: – Hayalın' aytqanlarımnın' ha'mmesin orınlasın.
14 Ol ju'zimnen islengen hesh bir na'rseni jemesin, sharap ta, basqa o'tkir ishimlik te ishpesin ha'm hesh bir haram na'rse jemesin. Buyırg'anlarımnın' ha'mmesin orınlasın.
15 Sonda Manoax Jaratqan İyenin' perishtesine: – Toqtap turın'. Siz ushın bir ılaq soymaqshımız, – dedi.
16 Jaratqan İyenin' perishtesi og'an: – Meni irikkenin' menen tayarlag'an awqatın'dı jemeymen. Eger jandırılatug'ın qurbanlıq bermekshi bolsan', onı Jaratqan İyege ber, – dedi. Al Manoax onın' Jaratqan İyenin' perishtesi ekenligin bilmegen edi.
17 Manoax Jaratqan İyenin' perishtesine: – Aytqanların'ız orınlang'anda, sizge alg'ıs aytıwımız ushın, atın'ızdın' kim ekenin aytın', – dedi.
18 Jaratqan İyenin' perishtesi Manoaxqa: – Atımdı ne ushın sorap atırsan'? Menin' atım qupıya at, – dedi.
19 Manoax bir ılaq penen g'a'lle sadaqasın alıp, bir tastın' u'stinde Jaratqan İyege qurbanlıq berdi. Sol waqıtta Manoaxtın' ha'm onın' hayalının' ko'z aldında tan' qalarlıq waqıya ju'z berdi:
20 qurbanlıq orınnan jalın ko'terilgende, Jaratqan İyenin' perishtesi jalın menen birge aspang'a ko'terilip ketti. Bunı ko'rgen Manoax ha'm onın' hayalı et-betinen jerge jıg'ıldı.
21 Sonnan keyin, Jaratqan İyenin' perishtesi Manoaxqa ha'm onın' hayalına qaytıp ko'rinbedi. Sonda Manoax onın' Jaratqan İyenin' perishtesi ekenin tu'sindi.
22 Manoax hayalına: – Bizler so'zsiz o'lemiz, o'ytkeni Qudaydı ko'rdik, – dedi.
23 Hayalı og'an: – Eger Jaratqan İye bizlerdi o'ltiriwdi qa'legende, onda jandırılatug'ın qurbanlıg'ımızdı ha'm g'a'lle sadaqamızdı qabıl etpegen bolar edi. Ol bu'gin bulardın' barlıg'ın bizlerge ko'rsetip te, aytıp ta otırmas edi, – dep juwap berdi.
24 Solay etip, hayal ul tuwıp, onın' atın Samson dep qoydı. Bala o'sip u'lkeydi ha'm Jaratqan İye onı jarılqadı.
25 Sora menen Eshtaol arasındag'ı Maxane-Danda bolg'an Samsondı Jaratqan İyenin' Ruwxı basqara basladı.
