Biyler 15 bob
1 Bir neshe ku'nnen keyin, biyday orag'ının' waqtında Samson bir ılaq alıp, hayalın ko'riwge bardı ha'm ol: «Hayalımnın' bo'lmesine kirmekshimen», – dedi. Biraq hayaldın' a'kesi Samsonnın' kiriwine ruxsat bermedi
2 ha'm og'an: – Seni qızımdı taslap ketti dep oylap, onı senin' ku'yew joraların'nın' birine uzatıp jiberdim. Kishkene qızım onnan go're sulıwıraq emes pe? Onın' ornına sol qızımdı ala g'oy, – dedi.
3 Sonda Samson: – Endi filistlerge jamanlıq qılsam da, haqım bar, – dedi.
4 Son'ınan Samson dalan'lıqqa shıg'ıp, u'sh ju'z tu'lki usladı. Ol ha'r eki tu'lkinin' quyrıqların bir-birine baylap, quyrıqlarının' arasına bir shomnan baylap shıqtı.
5 Samson shomlardı jag'ıp, tu'lkilerdi filistlerdin' eginlerinin' arasına jiberdi. Solay etip, filistlerdin' gu'dileri, orılmag'an biydayları, ju'zim ha'm za'ytu'n bag'ları janıp ketti.
6 Filistler: «Bunı kim isledi?» – dep sorastırg'anda, olarg'a: «Bunı timnalının' ku'yew balası Samson isledi. O'ytkeni qa'yin atası onın' hayalın ku'yew joralarının' birine uzatıp jiberipti», – degen xabar jetti. Filistler bardı da, hayaldı ha'm onın' a'kesin jag'ıp jiberdi.
7 Sonda Samson olarg'a: – Usılay islegenin'iz ushın, sizlerden o'sh almay qoymayman! – dedi.
8 Samson olarg'a ayawsız tu'rde hu'jim jasap, olardın' ko'bisin o'ltirdi. Son'ınan ol Etam jar tasına barıp, sol jerdegi bir u'n'girdi panaladı.
9 Filistler de Yahudag'a barıp, sol jerge orda qurdı da, Lexiyge shabıwıl jasadı.
10 Sonda yahudalılar olarg'a: «Ne ushın bizler menen urısıwg'a keldin'ler?» – dep soradı. Filistler olarg'a: «Bizlerge qılg'anın o'zine islew ushın, Samsondı tutıp alıwg'a keldik», – dep juwap berdi.
11 Yahudalılardan u'sh mın' adam Etam jar tasındag'ı u'n'girge barıp, Samsong'a: – Filistlerdin' bizlerge hu'kimdarlıq qılatug'ının bilmeysen' be? Sen ne ushın bizlerge bulay isledin'? – dedi. Samson olarg'a: – Olar mag'an ne islegen bolsa, men de olarg'a sonı isledim, – dep juwap berdi.
12 Olar Samsong'a: – Bizler seni baylap, filistlerdin' qolına tapsırıw ushın keldik, – dedi. Samson olarg'a: – Meni o'ltirmeytug'ının'ızdı aytıp, ant ishin'ler, – dedi.
13 Olar Samsong'a: – Boladı, bizler seni tek baylap, olardın' qolına tapsıramız. So'z beremiz, seni o'ltirmeymiz, – dedi. Sonnan keyin, olar Samsondı eki taza arqan menen baylap, u'n'girden shıg'ardı.
14 Samson Lexiyge jaqınlasqanda, filistler onı qıshqırısıp ku'tip aldı. Sonda Jaratqan İyenin' Ruwxı Samsonnın' u'stine tu'sti ha'm onın' qollarına baylang'an arqanlar jang'an saban sıyaqlı u'zilip tu'sti.
15 Samson jan'a o'lgen bir eshektin' jaq su'yegin tawıp, onı qolına aldı da, onın' menen mın' adamdı o'ltirdi.
16 Son'ınan ol bılay dedi: «Bir eshektin' jaq su'yegi menen, Olardı u'yindilerge aylandırdım, Bir eshektin' jaq su'yegi menen, Mın' adamdı o'ltirdim».
17 Samson bulardı aytıp bolg'annan son', jaq su'yekti ılaqtırıp tasladı. Sol jer Ramat-Lexiy dep ataldı.
18 Biraq Samson qattı sho'llegenlikten, Jaratqan İyeni shaqırıp: «Sen O'z qulın'a ullı bir jen'is berdin'. Biraq endi men sho'lden o'lip, su'nnetsizlerdin' qolına tu'semen be?» – dedi.
19 Sonda Jaratqan İye Lexiydegi shuqırlıqtı jardı ha'm onnan suw shıqtı. Samson suw iship, ha'llenip aldı. Sonlıqtan suw shıqqan jerge En-Haqqore degen at berildi. Bulaq bu'gin de Lexiyde tur.
20 Samson filistlerdin' hu'kimdarlıq da'wirinde izraillılarg'a jigirma jıl biylik qıldı.
