Biyler 18 bob

Danlılardın' Layıshqa jaylasıwı(1-31).

¹ Sol da'wirde İzrailda patsha joq edi. Sonda Dan urıwı ma'kanlaytug'ın jer izlep atırg'an edi. O'ytkeni olarg'a İzrail urıwları arasında o'zlerine tiyisli u'les jer ele berilmegen edi.

² Solay etip, danlılar o'z urıwındag'ı barlıq tiyreleri ishinen Sora ha'm Eshtaol qalalarınan bolg'an bes batır jigitti jerlerdi ko'zden o'tkerip, olardı bilip qaytıw ushın jiberdi. Olar jigitlerge: «Barıp, jerlerdi ko'zden o'tkizin'ler», – dedi. Jigitler Efrayımnın' tawlı u'lkesinde jaylasqan Mixanın' u'yine keldi ha'm sol jerde tu'nep qaldı.

³ Olar Mixanın' u'yinin' janında turg'anda, lebiyli jas jigittin' so'ylegen so'zinen tanıdı ha'm sol ta'repke burılıp, onnan: – Seni bul jerge kim a'keldi? Bul jerde ne islep atırsan'? Ne ushın bul jerdesen'? – dep soradı.

⁴ Lebiyli jigit Mixanın' o'zine ne islegenlerin aytıp: – Mixa meni jalladı, men og'an ruwxaniylik qılaman, – dedi.

⁵ Sonda danlılar og'an: – Bizlerdin' baratırg'an bul jolımızdın' sa'tli yaki sa'tsiz ekenin Qudaydan sorap, bilip ber, – dedi.

⁶ Ruwxaniy olarg'a: – Qa'weterlenbey kete berin'ler, Jaratqan İye baratırg'an jolın'ızda yar boladı, – dep juwap berdi.

⁷ Solay etip, sol bes adam jolg'a shıg'ıp, Layıshqa keldi. Olar qala xalqının' sidonlılar sıyaqlı qa'wipsiz, tınısh ha'm biyg'am o'mir su'rip atırg'anın ko'rdi. Bul u'lkenin' xalqına hu'kimin o'tkizip, ja'bir beretug'ın hesh kim joq edi. Olar sidonlılardan uzaqta bolıp, hesh kim menen qarım-qatnas jasamaytug'ın edi.

⁸ Bes jigit Sora ha'm Eshtaolg'a, urıwlaslarının' janına qaytqanda, urıwlasları olardan: – Qanday xabar alıp keldin'ler? – dep soradı.

⁹ Jigitler olarg'a bılay dep juwap berdi: – Ju'rin'ler, sidonlılarg'a hu'jim eteyik. Bizler olardın' jerin ko'rdik, ol ju'da' jaqsı jer eken. Ne qılıp tursızlar? İrkilmey barıp, og'an iyelik eteyik.

¹⁰ Ol jerge barg'anın'ızda, biyg'am jasap atırg'an xalıqtı ha'm ju'da' ken' jerdi ko'resizler. Hesh qanday kemshiligi joq ol jerdi Quday qolın'ızg'a tapsırıp atır.

¹¹ Sonda Dan urıwınan altı ju'z adam qurallanıp, Sora ha'm Eshtaoldan jolg'a shıqtı.

¹² Olar Yahudag'a kelip, Kiryat-Yarim qalasının' janında orda qurdı. Sol sebepli Kiryat-Yarimnin' batısındag'ı bul jer bu'gingi ku'nge deyin Maxane-Dan* dep ataladı.

¹³ Danlılar sol jerden Efrayımnın' tawlı u'lkesine qaray ketip, Mixanın' u'yine keldi.

¹⁴ Layısh jurtın ko'zden o'tkeriwge ketken bes jigit urıwlaslarına: «Sizler mına u'ylerdin' birinde efod, u'y butları, bir jonılg'an ha'm bir quyma but bar ekenin bilesizler me? Endi ne islew kerekligin o'zlerin'iz sheshin'ler», – dedi.

¹⁵ Sonda olar lebiyli jas jigit jasap atırg'an Mixanın' u'yine kelip, lebiyliden hal-awhal soradı.

¹⁶ Al qurallang'an altı ju'z danlı adam da'rwazanın' kirer awzında turdı.

¹⁷ Jerdi ko'zden o'tkergen bes jigit u'yge kirip, efodtı, u'y butların, jonılg'an buttı ha'm quyma buttı alıp shıqtı. Ruwxaniy ha'm qurallang'an altı ju'z adam da'rwazanın' kirer awzında turg'an edi.

¹⁸ Olardın' Mixanın' u'yine kirip, efodtı, u'y butların, jonılg'an buttı ha'm quyma buttı alıp shıqqanın ko'rgen ruwxaniy olardan: – Ne qılıp atırsızlar? – dep soradı.

¹⁹ Olar ruwxaniyge: – U'nin'di o'shir, awzın'dı jap. Sen bizler menen birge ju'r de, bizlerge ken'esgo'y ha'm ruwxaniy bol. Sag'an bir adamnın' u'yinde ruwxaniylik etkenin' jaqsı ma, ya İzraildın' bir urıwı yamasa bir tiyresine ruwxaniylik etkenin' jaqsı ma? – dedi.

²⁰ Ruwxaniy quwanıp ketti. Ol efodtı, u'y butların ha'm jonılg'an buttı alıp, sol adamlar menen birge ketti. 21Danlılar balashag'aların, malların ha'm du'nya-mu'lkin aldına salıp, jolg'a shıqtı.

²¹ Danlılar balashag'aların, malların ha'm du'nya-mu'lkin aldına salıp, jolg'a shıqtı.

²² Danlılar Mixanın' u'yinen uzaqlasqanda, Mixanın' qon'sı-qobaları jıynalıp, olardı quwıp jetti.

²³ Olar danlılardın' izinen baqırg'anda, danlılar artına burılıp qarap, Mixag'a: – Ne bolıp qaldı, nege adamlardı jıynap keldin'? – dedi.

²⁴ Mixa olarg'a: – Sizler menin' ruwxaniyimdi ha'm soqtırg'an butlarımdı alıp kettin'ler. Mag'an ne qaldı o'zi? Ja'ne mennen: «Sag'an ne boldı?» – dep sorag'anın'ız nesi?! – dedi.

²⁵ Danlılar og'an: – U'nin'di o'shir! Bolmasa, adamlarımızdın' bazıları g'a'zeplenip, hu'jim etse, o'zin'di de, shan'arag'ın'dı da nabıt qılasan', – dedi.

²⁶ Sonnan keyin, danlılar jolların dawam etti. Mixa olardın' o'zinen go're ku'shlirek ekenligin ko'rip, u'yine qaytıp ketti.

²⁷ Al danlılar Mixanın' soqtırg'an zatların ha'm ruwxaniyin janına alıp, Layıshqa qaray ketti. Olar tınısh ha'm biyg'am qala xalqın qılıshtan o'tkerip, qalag'a ot berdi.

²⁸ Beyt-Rexobtın' janındag'ı oypatlıqta jaylasqan Layısh qalasına ja'rdemge keletug'ın hesh kim bolmadı. O'ytkeni Layısh Sidonnan uzaqta bolıp, basqa qalalar menen qarım-qatnas jasamaytug'ın edi. Dan urıwı qalanı jan'adan qurıp, sol jerge ornalasıp qaldı.

²⁹ Olar İzraildın' ulı bolg'an babası Dannın' hu'rmetine qalanı Dan dep atadı. Qalanın' eski atı Layısh edi.

³⁰ Danlılar jonılg'an buttı sol jerge ornattı. Muwsanın' aqlıg'ı bolg'an Gershomnın' ulı İonatan ha'm onın' ulları su'rginge deyin Dan urıwına ruwxaniylik qıldı.

³¹ Qudaydın' U'yi Shiloda bolg'an waqıt dawamında, danlılar Mixa isletken jonılg'an butqa tabındı.