Biyler 19 bob
1 İzrailda patsha bolmag'an da'wirde, Efrayımnın' tawlı u'lkesinin' alıs tu'pkirinde lebiyli bir adam jasaytug'ın edi. Sol lebiyli adam Yahudanın' Beytlehem qalasınan o'zine bir toqal aldı
2 Biraq toqalı og'an opasızlıq etti ha'm onı taslap, a'kesinin' u'yine, Yahudanın' Beytlehem qalasına ketip qaldı. Hayal sol jerde to'rt ay bolg'anda,
3 ku'yewi onın' kewlin tawıp, qaytarıp alıp keliw ushın izinen keldi. Ol o'zi menen birge xızmetshisin ha'm eki eshegin alıp kelgen edi. Hayal olardı a'kesinin' u'yine kirgizdi ha'm hayaldın' a'kesi lebiylini ko'rgende, onı quwanısh penen ku'tip aldı.
4 Lebiylinin' qa'yin atası, yag'nıy toqalının' a'kesi onı u'sh ku'n qonaq qıldı. Olar sol jerde iship-jedi ha'm tu'nep qaldı.
5 To'rtinshi ku'ni olar erte turdı. Qızdın' a'kesi ketiwge tayarlanıp atırg'an ku'yew balasına: – Nan-pan jep, ha'llenip al, son'ınan qaytarsızlar, – dedi.
6 Ekewi birge otırıp, iship-jep bolg'annan keyin, qa'yin atası og'an: – Bu'gin de tu'nep qalıp, kewlin'di xoshla, – dedi.
7 Lebiyli ketpekshi bolıp ornınan turdı, biraq qa'yin atası onı ja'ne tu'nep qalıwg'a ko'ndirdi.
8 Besinshi ku'ni lebiyli ketpekshi bolıp, azanda erte turdı. Sonda qa'yin atası: – İship-jep, ha'llenip al, ku'n awg'ansha ku'tin', – dedi. Solay etip, ekewi birge otırıp, iship-jep aldı.
9 Sol adam toqalı ha'm xızmetshisi menen birge qaytpaqshı bolg'anda, qa'yin atası og'an: – Qara, ku'n awıp, kesh bolayın dep tur. Endi bu'gin de usı jerde qonıp qalıp, kewlin'di xoshla. Erten' erte turıp, jolg'a atlanıp, u'yin'izge qaytarsızlar, – dedi.
10 Biraq sol adam ol jerde ja'ne tu'nep qalıwdı qa'lemedi. Ol toqalın alıp, ju'k artılg'an eki eshegi menen jolg'a shıqtı ha'm Ebusqa, yag'nıy Erusalimge jaqın jerge jetip keldi.
11 Olar Ebusqa jaqınlasqanda, ku'n batayın dep turg'an edi. Sonda xızmetshi xojayınına: – Ebuslılardın' bul qalasına kirip, usı jerde tu'nep qalayıq, – dedi.
12 Xojayını og'an: – Yaq, xalqı izraillılar bolmag'an jat qalag'a kirmeymiz, al Gibag'a baramız, – dedi.
13 Keyin lebiyli so'zin dawam etip, xızmetshisine: – Ju'r, Gibag'a yamasa Ramag'a jetip qalayıq. Ekewinin' birewinde tu'nep qalarmız, – dedi.
14 Solay etip, olar jolın dawam etti ha'm Benyamin urıwının' Giba qalasına jaqınlasqanda, quyash ta batıp qalg'an edi.
15 Olar tu'nep qalıw ushın, Gibag'a qaray burıldı da, barıp, qala maydanında otırdı. Biraq hesh kim olardı u'yine mira't etpedi.
16 Keshte, bir g'arrı atız jumısınan qaytıp kiyatır edi. Ol Efrayımnın' tawlı u'lkesinen bolıp, Gibada jasaytug'ın edi. Al qala xalqı bolsa, benyaminliler edi.
17 G'arrı qala maydanındag'ı jolawshılardı ko'rip, lebiyliden: – Qay jerden kelip, qay jerge baratırsızlar? – dep soradı.
18 Lebiyli adam g'arrıg'a bılay dep juwap berdi: – Yahudanın' Beytlehem qalasınan kiyatırmız. Efrayımnın' tawlı u'lkesindegi uzaq bir jerge, o'zim jasaytug'ın jerge ketip baratırmız. Men Beytlehem qalasına barg'an edim, endi Jaratqan İyenin' u'yine qaytıp baratırman. Biraq hesh kim meni u'yine mira't etpedi.
19 Bizlerde esheklerimiz ushın ot-jem, o'zim, toqalım ha'm xızmetshim ushın awqat ha'm sharap bar. Bizler hesh na'rsege mu'ta'j emespiz.
20 G'arrı og'an: – Kewlin' toq bolsın. Barlıq kerekli na'rselerdi o'zim bereyin, tek g'ana ko'shede qonıp qalma, – dedi.
21 G'arrı olardı u'yine alıp barıp, esheklerine jem berdi. Qonaqlar ayaqların juwıp, son'ınan iship-jedi.
22 Olar jan'a kewillerin jazıp otırg'anda, qalada jasawshı buzıq adamlar u'ydi qorshap aldı. Olar qapını qag'ıp, u'ydin' iyesi bolg'an g'arrıg'a: – U'yin'e kelgen adamdı sırtqa shıg'ar, bizler onın' menen jatayıq, – dep baqırıstı.
23 U'y iyesi sırtqa shıg'ıp, olarg'a bılay dedi: – Yaq, tuwısqanlarım, bunday jawızlıq qılman'lar. Bul adam menin' u'yime kelgen qonag'ım-g'o, og'an bunday masqarashılıqtı islemen'ler.
24 Mine, u'yimde erkek qolı tiymegen qızım ha'm bul adamnın' toqalı bar. Men olardı sırtqa shıg'arıp bereyin. Sizler olar menen jatın'lar ha'm olarg'a qa'legenin'izdi islen'ler. Biraq bul adamg'a bunday masqarashılıqtı islemen'ler.
25 Biraq adamlar onı tın'lamadı. Sonda lebiyli toqalın iyterip sırtqa shıg'ardı da, olardın' qolına tapsırdı. Adamlar tu'n boyı hayaldı zorlap, onın' namısına tiydi ha'm tan'g'a shamalas onı jiberdi.
26 Hayal tan' sa'ha'rde xojayını qonıp qalg'an u'ydin' qapısına kelip jıg'ıldı ha'm quyash shıqqansha, sol jerde jattı.
28 Hayaldın' xojayını jolın dawam etiw ushın azanda turıp, esikti ashtı. Sonda ol qolların bosag'ag'a qoyıp jatırg'an toqalın ko'rdi.
