Biyler 2 bob

Jaratqan İyenin' perishtesi Boximde (1-5), Eshuanın' o'limi (6-9), İzraillılardın' Jaratqan İyeden uzaqlasıwı (10-23).

¹ Jaratqan İyenin' perishtesi Gilgaldan Boximge kelip, izraillılarg'a bılay dedi: – Sizlerdi Mısırdan shıg'arıp, ata-babaların'ızg'a beremen dep ant ishken jerge alıp keldim. Men sizlerge: «Sizler menen du'zgen kelisimimdi hesh qashan buzbayman.

² Al sizler bul jerlerde jasap atırg'anlar menen kelisim du'zben'ler ha'm olardın' qurbanlıq orınların qıyratıp taslan'lar», – degen edim. Biraq sizler so'zime qulaq salmadın'lar. Ne ushın bunday isledin'ler?

³ Ja'ne de, Men sizlerge: «Bul xalıqlardı sizlerdin' aran'ızdan quwıp shıg'armayman. Olardın' o'zleri sizlerge dushpan, al qudayları duzaq boladı», – dep aytqan edim.

⁴ Jaratqan İyenin' perishtesi usı so'zlerdi aytqanda, pu'tkil İzrail xalqı dad salıp jılay basladı.

⁵ Sonlıqtan olar sol jerdi Boxim dep atadı ha'm sol jerde Jaratqan İyege arnap qurbanlıq shaldı.

⁶ Eshua xalıqtı tarqatıp jibergennen son', olardın' ha'r qaysısı o'z payına tiygen jerlerdi iyelep alıw ushın jolg'a shıqtı.

⁷ Eshuanın' tiri waqtında ha'm Jaratqan İyenin' İzrail ushın islegen ullı islerin ko'rip, Eshuadan keyin o'mir su'rgen aqsaqallar da'wirinde, İzrail xalqı Jaratqan İyege xızmet etti.

⁸ Jaratqan İyenin' qulı Nun ulı Eshua bir ju'z on jasında qaytıs boldı.

⁹ Onı Efrayımnın' tawlı u'lkesindegi Gaash tawının' arqa ta'repine, o'zinin' payına tiygen Timnat-Xeres degen jerge jerledi.

¹⁰ Bul a'wladtan bolg'anlardın' ha'mmesi o'lip, ata-babalarına qosılg'annan son', Jaratqan İyeni tanımaytug'ın ha'm Onın' İzrail xalqı ushın islegen islerin bilmeytug'ın basqa bir a'wlad o'sip jetisti.

¹¹ zrail xalqı Jaratqan İyenin' na'zerinde jaman bolg'an islerdi islep, Baallarg'a tabına basladı.

¹² Olar o'zlerin Mısırdan alıp shıqqan ata-babalarının' Qudayı, Jaratqan İyeden ju'z burıp, a'tiraptag'ı xalıqlardın' qudaylarına awıp ketti ha'm olarg'a tabındı. Bul Jaratqan İyenin' qa'ha'rin keltirdi.

¹³ O'ytkeni olar Jaratqan İyeden ju'z burıp, Baal ha'm Ashtarta butlarına tabına baslag'an edi.

¹⁴ Sonlıqtan Jaratqan İyenin' İzrail xalqına g'a'zebi qaynap, olardı mu'liklerin tonaytug'ın basqınshılardın' qolına tapsırdı. Jaratqan İye olardı a'tiraptag'ı dushpanlarg'a ta'slim etti. Solay etip, artıq olar dushpanlarına qarsı tura almadı.

¹⁵ Jaratqan İyenin' aytqanınday ha'm ant ishkenindey, İzrail xalqı ha'r sapar sawashqa tu'skende, Jaratqan İyenin' O'zi olarg'a qarsı boldı ha'm olar awır awhalda qaldı.

¹⁶ Sonda Jaratqan İye olardı tonawshılardın' qolınan qutqaratug'ın biylerdi jiberdi.

¹⁷ Biraq olar biylerdi de tın'lamadı ha'm Jaratqan İyege opasızlıq etip, basqa qudaylarg'a tabınıp ketti. Olar Jaratqan İyenin' buyrıqların orınlag'an ata-babaları sıyaqlı bolmay, ata-babaları ju'rgen joldan tez azg'ırıldı.

¹⁸ Jaratqan İye olar ushın bir biy tan'lap shıg'arg'anda, Ol sol biy menen birge boldı ha'm sol biy jasag'an waqıtta olardı dushpanlarının' qolınan qutqaratug'ın edi. Sebebi olar eziwshilik ha'm zulım astında nala shekkende, Jaratqan İyenin' olarg'a rehimi keletug'ın edi.

¹⁹ Degen menen, biyler o'liwden-aq, olar ata-babalarınan da beter bolıp, ja'ne basqa qudaylardın' izine eretug'ın, olarg'a xızmet etip, tabınatug'ın edi. Olar islegen jaman is-ha'reketlerinen ha'm qaysarlıqtan waz keshpedi.

²⁰ Solay etip, Jaratqan İyenin' İzrailg'a g'a'zebi qaynap, bılay dedi: «Bul xalıq Menin' ata-babalarına orınlan' dep buyırg'an kelisimimdi buzıp, so'zime qulaq salmadı.

²¹ Sonlıqtan endi Men de Eshua o'lgende, usı jerlerde qalg'an xalıqlardın' hesh birin olardın' aldınan quwıp shıg'armayman.

²² Ata-babaları sıyaqlı Jaratqan İyenin' jolınan ju'retug'ının yamasa ju'rmeytug'ının ko'riw ushın, olardı usı milletler arqalı sınayman».

²³ Solay etip, Jaratqan İye sol milletlerdi da'rhal quwıp shıg'armag'an ha'm olardı Eshuag'a ta'slim ettirmey, elde qalıwg'a ruxsat bergen edi.