Biyler 20 bob
1 Dannan Beer-Shebag'a deyingi aralıqta ha'm Gilad jerinde jasaytug'ın pu'tkil İzrail xalqı jolg'a shıqtı. Olar bir jag'adan bas shıg'arıp, Mispag'a, Jaratqan İyenin' aldına jıynaldı.
2 Qudaydın' xalqının' bul jıyınına İzrail xalqının' ha'm pu'tkil urıwlarının' basshıları qatnasıwg'a keldi. Ol jerde qurallang'an to'rt ju'z mın' a'sker bar edi.
3 Sol arada Benyamin urıwı izraillılardın' Mispag'a jıynalg'anın esitken edi. İzraillılar: – Bul jawızlıqtın' qalay bolg'anın bizlerge tu'sindirip berin', – dedi.
4 O'ltirilgen hayaldın' lebiyli ku'yewi bılay dep juwap berdi: – Men tu'new ushın toqalım menen birge benyaminlilerdin' Giba qalasına keldim.
5 Sonda Gibanın' adamları meni o'ltirmekshi bolıp, tu'nde u'ydi qorshap aldı ha'm olar toqalımdı zorladı. Toqalım sol sebepli o'ldi.
6 Men onın' o'ligin alıp bo'lekledim ha'm ha'r bir bo'lekti pu'tkil İzrail jeri boylap jiberdim. Sebebi olar İzrailda jawız ha'm uyat isti isledi.
7 Ha'y, İzrail xalqı! Minekey, ha'mmen'iz usı jerdesiz, endi sizler bul isti qarap shıg'ıp, sheshimin'izdi aytın'lar.
8 Sol jerdegi pu'tkil xalıq bir awızdan bılay dedi: – Bizlerdin' hesh birimiz shatırlarımızg'a ketpeymiz, u'ylerimizge qaytpaymız.
9 Endi bizler Gibag'a bılay isleymiz: og'an shek boyınsha hu'jim jasaymız.
10 A'skerlerdi azıq-awqat penen ta'miyinlew ushın, pu'tkil İzrail urıwlarınan ha'r ju'z adamnan on, mın' adamnan ju'z, on mın' adamnan mın' adam saylap alınadı. Al qalg'anları benyaminlilerdin' Giba qalasına barıp, olardı İzrailda islegen uyat isi ushın jazalaydı.
11 Solay etip, pu'tkil izraillılar bir jag'adan bas shıg'arıp, Gibag'a qarsı jıynaldı.
12 İzrail urıwları Benyamin urıwına adamların jiberip: «Aran'ızda bunday jawızlıq nege islendi?
13 Gibadag'ı sol buzıq adamlardı ha'zir-aq qolımızg'a tapsırın'. Bizler olardı o'ltirip, İzraildan jawızlıqtı joq eteyik», – dedi. Biraq benyaminliler izraillı tuwısqanlarına qulaq salmadı.
14 zraillılarg'a qarsı urısıw ushın, benyaminliler o'z qalalarınan Gibag'a keldi.
15 Sol ku'ni Giba xalqınan bolg'an jeti ju'z ag'la jawıngerden tısqarı, benyaminlilerdin' basqa qalalarınan kelgen, qurallang'an jigirma altı mın' adam jıynaldı.
16 Olardın' arasında solaqay bolg'an jeti ju'z ag'la jawınger bar edi. Olardın' ha'mmesi, ha'tte, bir tal shashtı nıshan qılıp qoyg'anda da, saqpan menen urıp tiygize alatug'ın edi.
17 Benyaminlilerden basqa, izraillılardan qurallang'an to'rt ju'z mın' adam jıynaldı. Olardın' ha'mmesi urısqa jaramlı edi.
18 İzraillılar Beyt-Elge barıp, Qudaydan: «Benyaminliler menen urısıwg'a bizlerden birinshi bolıp kim baradı?» – dep soradı. Jaratqan İye olarg'a: «Birinshi bolıp yahudalılar urısqa shıg'adı», – dedi.
19 İzraillılar azanda jolg'a shıg'ıp, Gibanın' qarsı aldına a'skeriy orda qurdı.
20 İzraillılar Benyamin urıwı menen sawashqa tu'siw ushın, Gibada sap tartıp turdı.
21 Gibadan shıqqan benyaminliler sol ku'ni izraillılardan jigirma eki mın' adamdı o'ltirdi.
22 Biraq İzrail xalqı bir-birin jigerlendirip, aldıng'ı ku'ni turg'an jerinde ja'ne sap tartıp turdı.
23 Sonda izraillılar Beyt-Elge barıp, Jaratqan İyenin' aldında keshke deyin jıladı ha'm Jaratqan İyeden: – Tuwısqanlarımız bolg'an benyaminliler menen ja'ne urısıwg'a shıg'ayıq pa? – dep soradı. Jaratqan İye olarg'a: – Awa, olarg'a qarsı urısın'lar, – dedi.
24 Solay etip, izraillılar ekinshi ku'ni ja'ne benyaminlilerge qarsı ju'ris qıldı.
25 Sol ku'ni Benyamin urıwı da Gibadan olarg'a qarsı atlanıp, izraillılardan qolına qılısh ko'tergen ja'ne on segiz mın' adamdı o'ltirdi.
26 Sonda pu'tkil İzrail xalqı Beyt-Elge barıp, ol jerde Jaratqan İyenin' aldında otırıp jıladı ha'm sol ku'ni keshke deyin oraza tuttı. Ja'ne de, olar Jaratqan İyege jandırılatug'ın qurbanlıqlar ha'm tatıwlıq qurbanlıqların usındı.
27 Sol waqıtta Qudaydın' Kelisim sandıg'ı Beyt-Elde edi. Xaronnın' aqlıg'ı, Elazardın' ulı bolg'an Pinexas sol jerde, sandıqtın' janında ruwxaniy bolıp xızmet etetug'ın edi. İzraillılar Jaratqan İyeden:
28 – Tuwısqanlarımız bolg'an benyaminliler menen urısıwdı dawam eteyik pe yamasa toqtatayıq pa? – dep soradı. Jaratqan İye olarg'a: – Urıstı dawam etin'ler. Sebebi erten' olardı sizlerge ta'slim qılaman, – dedi.
29 İzraillılar Gibanın' aynalasında buqqı taslap jattı.
30 Olar u'shinshi ku'ni benyaminlilerge qarsı ha'reketke o'tip, burıng'ıday qala qarsısında sapqa dizilip turdı.
31 Benyaminliler de olarg'a qarsı shıg'ıp, qaladan uzaqlasıp ketti. Olar Beyt-Elge ha'm Gibag'a baratug'ın jollarda, ashıq maydanlarda aldıng'ısı sıyaqlı izraillılardı o'ltire basladı. İzraillılardan otızg'a shamalas adam o'ltirildi.
32 Benyaminliler: «O'tken sapardag'ıday olardı ja'ne jen'iliske ushıratamız», – desti. Al izraillılar bolsa: «Olardan qashayıq ha'm olardı qaladan uzaqlastırıp, jollarg'a shıg'arayıq», – desti.
33 Sonda izraillılardın' barlıg'ı o'z orınlarınan shıg'ıp, Baal-Tamarda sapqa dizilip turdı. Gibanın' a'tirapında buqqıda jatırg'an izraillılar da orınlarınan atlıg'ıp shıqtı.
34 Solay etip, İzraildın' on mın' ag'la jawıngeri Gibag'a hu'jim jasadı. G'ıjlag'an urıs baslandı. Benyaminliler basına tu'setug'ın apattan xabarsız edi.
35 Jaratqan İye benyaminlilerdi izraillılar aldında jen'iliske ushırattı. İzraillılar sol ku'ni benyaminlilerden qolına qılısh uslag'an jigirma bes mın' bir ju'z adamdı o'ltirdi.
36 Sonda benyaminliler jen'iliske ushırag'anın tu'sindi. Al izraillılar artqa sheginip, benyaminlilerge jol berdi. O'ytkeni olar Giba aynalasında buqqıda jatırg'anlarg'a isenetug'ın edi.
37 Buqqıdag'ılar tosattan Gibag'a hu'jim jasap, qaladag'ı pu'tkil xalıqtı qılıshtan o'tkerdi.
38 Buqqıdag'ılar menen izraillılar arasında kelisilgen bir belgi bar edi. Qalag'a ot berilip, qoyıw tu'tinnin' aspang'a ko'teriliwi – hu'jimge o'tiwdin' belgisi edi.
39 Sol waqıtta izraillılar sawash maydanınan artqa burılıp, hu'jimge o'tiw kerek edi. Sol arada benyaminliler izraillılardın' otızg'a jaqın adamın o'ltirgen edi. Sol sebepten benyaminliler: «Burıng'ı sawashtag'ı sıyaqlı, izraillılar bizlerden ja'ne jen'iledi», – dedi.
40 Biraq qaladan qoyıw tu'tin ko'terile baslag'anda, benyaminliler artına burılıp qarap, pu'tkil qaladan aspang'a tu'tin ko'terilip atırg'anın ko'rdi.
41 Olar izine burılıp kiyatırg'an izraillılardı ko'rgende, albırasıp qaldı. O'ytkeni olar baslarına apat tu'skenin bilgen edi.
42 Benyaminliler izraillılardan jol boylap, sho'lge qaray qashsa da, urıstan qashıp qutıla almadı. Al qalalardan shıqqan izraillılar da olardı qıra baslag'an edi.
43 Solay etip, izraillılar benyaminlilerdi qorshap aldı ha'm olardı Gibanın' shıg'ısındag'ı jerlerge deyin quwıp, qıyrattı.
44 Benyaminlilerden on segiz mın' adam o'ltirildi. Olardın' ha'mmesi de ma'rt a'skerler edi.
45 Olardın' aman qalg'anları sho'lge, Rimmon jartasına qaray qasha basladı. İzraillılar jol-jo'nekey olardan ja'ne bes mın' adamdı o'ltirdi. Olardı Gidomg'a deyin quwıp barıp, ja'ne eki mın'ın o'ltirdi.
46 Sol ku'ni benyaminlilerden ha'mmesi bolıp jigirma bes mın' adam o'ltirildi. Olardın' ha'mmesi de qolına qılısh uslag'an ma'rt a'skerler edi.
47 Biraq altı ju'z adam sho'lge qashıp barıp, Rimmon jartasın panaladı. Olar sol u'n'girde to'rt ay qaldı.
48 zraillılar benyaminlilerge qaytıp barıp, qalalardag'ı adamlardı, mallardı ha'm dus kelgennin' ha'mmesin qılıshtan o'tkerdi. Aldılarınan shıqqan barlıq qalalarg'a ot berdi.
