Biyler 4 bob
1 Ehudtın' o'liminen keyin, İzrail xalqı Jaratqan İyenin' na'zerinde jawız bolg'an islerdi ja'ne isley basladı.
2 Sonlıqtan da Jaratqan İye izraillılardı Xasorda hu'kimdarlıq etip atırg'an kenaanlı patsha Yabinge ta'slim qıldı. Yabinnin' Sisera degen bir sa'rka'rdası bolıp, ol XaroshetGoyımda jasaytug'ın edi.
3 Yabinnin' tog'ız ju'z temir sawash arbası bar edi. Ol izraillılardı jigirma jıl ayawsız ezgenlikten, izraillılar Jaratqan İyege nala shekti.
4 Sol waqıtları payg'ambar hayal, Lappidottın' hayalı Debora izraillılarg'a biylik qılatug'ın edi.
5 Debora Efrayımnın' tawlı u'lkesinde, Rama menen Beyt-El arasındag'ı palma ag'ashının' astında otırıp, aldına kelgen izraillılardın' dawların sheshetug'ın edi.
6 Bir ku'ni Debora Abinoam ulı Baraqtı Kedesh-Naftaliyden shaqırtıp alıp, og'an: – İzraildın' Qudayı Jaratqan İye qasın'a Naftaliy ha'm Zebulon urıwlarınan on mın' adamdı alıp, Tabor tawına barıwın'dı buyıradı.
7 Ol patsha Yabinnin' sa'rka'rdası Siseranı, onın' sawash arbaların ha'm a'skerlerin Kishon sayına, senin' aldın'a aparıp, sag'an ta'slim qıladı, – dedi.
8 Baraq Deborag'a: – Eger menin' menen birge barsan', baraman. Al birge barmasan', barmayman, – dedi.
9 Debora: – A'lbette, senin' menen birge baraman, biraq sen tutqan bul jol o'zin'e dan'q alıp kelmeydi. Sebebi Jaratqan İye Siseranı bir hayalg'a ta'slim etejaq, – dedi. Solay etip, Debora Baraq penen birge Kedeshke ketti.
10 Baraq Zebulon ha'm Naftaliy urpaqların Kedeshke jıynadı. Baraqtın' izine on mın' adam erdi. Debora da onın' menen birge ketti.
11 Ken tiyresinen bolg'an Xeber Muwsanın' qa'yin atası Xobabtın' urpag'ınan bolg'an tiyreleslerinen bo'lek shıg'ıp, Kedeshke jaqın jerdegi Saanannimdegi terebinf ag'ashının' janına shatırın tikken edi.
12 Abinoam ulı Baraqtın' Tabor tawına shıqqanın esitken Sisera
13 tog'ız ju'z temir sawash arbasın ha'm qasındag'ı barlıq a'skerlerin XaroshetGoyımnan shıg'arıp, Kishon sayına topladı.
14 Debora Baraqqa: – Qa'ne, atlan! Sebebi bul ku'n – Jaratqan İyenin' Siseranı sag'an ta'slim etetug'ın ku'ni. Jaratqan İye senin' aldın'da baradı, – dedi. Solay etip, Baraq on mın' adamdı ertip, Tabor tawınan tu'sti.
15 Baraq hu'jim qılg'anda, Jaratqan İye Siseranı, onın' sawash arbaların ha'm a'skerlerin albırattı. Sonda Sisera sawash arbasınan tu'sip, jayaw qashıp ketti.
16 Baraq onın' sawash arbaların ha'm a'skerlerin Xaroshet-Goyımg'a deyin quwıp bardı. Siseranın' pu'tkil a'skerleri qılısh ju'zinen o'tkerildi. Hesh biri aman qalmadı.
17 Al jayaw qashıp ketken Sisera bolsa, kenlerden bolg'an Xeberdin' hayalı Yaeldin' shatırına keldi. O'ytkeni Xasordın' patshası Yabin menen Xeberdin' shan'arag'ı arasındag'ı qarım-qatnas jaqsı edi.
18 Yael Siseranı ku'tip alıwg'a shıg'ıp, og'an: – Qorqpan', mırzam. Kelin', shatırıma kirin', – dedi. Sisera hayaldın' shatırına kirgende, hayal onın' u'stine bir japqıshtı jawıp qoydı.
19 Sisera: – Sho'lledim, iltimas, ishiwge az-maz suw ber, – dedi. Yael su't mesin ashıp, Siserag'a su't ishkizgennen keyin, onın' u'stin ja'ne jawıp qoydı.
20 Sisera hayalg'a: – Shatırdın' kirer awzında tur. Eger birew kelip: «Shatırın'da kim bar?» – dep sorasa, «Hesh kim joq», – dep juwap ber, – dedi.
21 Xeberdin' hayalı Yael qolına shatırdın' bir qazıg'ı menen balg'anı aldı. Ol sharshag'anlıqtan qattı uyqıg'a ketken Siseranın' qasına a'ste jaqınlap bardı da, qazıqtı onın' shekesine qaqtı ha'm qazıq tesip o'tip, jerge kirip ketti. Sisera sol zamatta-aq o'ldi.
22 Sol waqıtta Baraq Siseranı quwıp kiyatırg'an edi. Yael Baraqtın' aldınan shıg'ıp, og'an: – İshke kir, izlep kiyatırg'an adamın'dı sag'an ko'rseteyin, – dedi. Baraq hayaldın' shatırına kirip barg'anda, shekesine qazıq qag'ılıp, o'lip atırg'an Siseranı ko'rdi.
23 Solay etip, Quday sol ku'ni kenaanlı patsha Yabindi İzrail xalqına boysındırdı.
24 İzrail xalqı kenaan patshası Yabinge ku'nnen-ku'nge qarsı turıp, aqırında onı joq qıldı.
