Rut 3 bob
1 ir ku'ni qa'yin enesi Nag'ıyma Rutqa bılay dedi: – Qızım, o'zin'e jaqsı bolıwı ushın, senin' u'yli-jaylı bolıp ketiwin'e men ja'rdem beriwim kerek emes pe eken?
2 Aytpaqshı, sen o'zin' xızmetshileri menen birge jumıs islegen sol Boaz bizlerdin' jaqın ag'ayinimiz-g'o. Minekey, bu'gin tu'nde ol qırmanda arpasın suwıradı.
3 Endi sen juwınıp, u'stin'e a'tir sewip, shıraylı kiyimin'di kiyip al, sonnan keyin qırmang'a bar. Biraq Boaz qashan iship-jep bolmag'ansha, og'an ko'rinbe.
4 Ol uyıqlawg'a jatqanda, jatqan jayın bilip al. Sonnan keyin bar da, onın' ayaq ush betin ashıp, sol jerde jat. Ol sag'an ne islewin' kerekligin o'zi aytadı.
5 Rut enesine: – Mag'an aytqanların'nın' ha'mmesin orınlayman, – dedi.
6 Sonnan keyin Rut qırman basına barıp, enesinin' tapsırg'anlarının' ha'mmesin orınladı.
7 Boaz iship-jep, kewli ko'terildi ha'm gu'dinin' qasına barıp, uyıqlawg'a jattı. Rut a'sten sezdirmey keldi de, onın' ayaq ush betin ashın'qırap jattı.
8 Tu'nnin' ortasında Boaz shorshıp oyanıp ketti. Ol burılıp qarap, ayaq ush betinde bir hayaldın' jatırg'anın ko'rdi ha'm onnan:
9 – Sen kimsen'? – dep soradı. Rut og'an: – Men sizin' shorın'ız Rutpan. Shorın'ızdı o'z panan'ızg'a alsan'ız, sebebi siz a'mengerimiz bolasız, – dedi.
10 Boaz og'an bılay dedi: – Qızım, seni Jaratqan İye jarılqasın! Senin' bul son'g'ı jaqsılıg'ın' aldıng'ısınan da ullı. Sebebi sen ya ka'mbag'al bolsın, ya bay bolsın, jas jigitler arasınan o'zin'e ku'yew izlemedin'.
11 Endi qa'weterlenbe, qızım. Aytqanların'nın' ha'mmesin orınlayman. Pu'tkil qala xalqı senin' adamgershilikli hayal ekenin'di biledi.
12 Menin' sizlerge a'menger ekenligim durıs, biraq mennen de jaqınıraq a'mengerin'iz bar.
13 Bu'gin tu'nde usı jerde qonıp qal. Erten' azanda sol ag'ayinin' a'mengerlik wazıypasın orınlawg'a ırazı bolsa, onda ju'da' jaqsı. Eger de ol a'mengerlik wazıypasın orınlawdı qa'lemese, tiri Jaratqan İye haqı ant ishemen, bul wazıypanı men orınlayman. Endi tan'g'a deyin jata tur.
14 Solay etip, Rut Boazdın' ayaq ush betinde tan' atqansha jatıp qaldı. Biraq ol tan' saz berip, adamlar bir-birin tanımaytug'ın waqıtta turdı. O'ytkeni Boaz: «Qırmang'a hayal adamnın' kelgenin hesh kim bilmesin», – degen edi.
15 Boaz Rutqa: – Jawlıg'ın'dı jayıp, uslap tur, – dedi. Rut jawlıg'ın jayıp, uslap turdı. Boaz jawlıqqa altı o'lshem* arpanı o'lshep salıp, iynine arqalatıp jiberdi. Keyin o'zi de qalag'a qaray ju'rip ketti.
16 Rut u'yine qaytıp kelgende, enesi onnan: – Qızım, ne boldı? – dep soradı. Rut o'zine Boazdın' ne islegeninin' ha'mmesin aytıp berdi.
17 Son'ınan Rut: «Ol mag'an: „Qa'yin enen'nin' aldına qurı qol barma“, – dep mına altı o'lshem arpanı berip jiberdi», – dedi.
18 Enesi og'an: – Qızım, usı istin' aqırı ne bolatug'ının bilgenin'she ku'tip tur. Sebebi ol adam bul isti bu'gin aqırına jetkermegenshe tınım tappaydı, – dedi.
