1 Son'ınan Samuel za'ytu'n mayı quyılg'an ıdısın alıp, maydı Shauldın' basına quydı ha'm onı su'yip, bılay dedi: «Jaratqan İye seni maylap, O'z xalqı u'stinen hu'kimdar etip qoydı.
2 Bu'gin menin' janımnan ketkenin'nen son', Benyamin jerinin' shegarasındag'ı Selsaxtag'ı Rahilanın' mazarı janında eki adamdı ushıratasan'. Olar sag'an: „Sen izlep ketken eshekler tabıldı. A'ken' esheklerdi oylag'andı qoyıp, balama ne boldı eken dep, seni qayg'ırıp atır“, – deydi.
3 Onnan arman qaray ju'rip, Tabordag'ı terebinf ag'ashına barasan'. Ol jerde u'sh adamdı ushıratasan'. Olardın' birewi u'sh ılaq, ekinshisi u'sh nan, al u'shinshisi sharap quyılg'an mes alıp, Qudaydın' u'yine, Beyt-Elge baratırg'an boladı.
4 Olar sa'lemlesip, sag'an eki nan beredi, sen olardı alasan'.
5 Son'ınan filistlerdin' saqshılar bo'limshesi ornalasqan GibatElohimge barasan'. Qalag'a kirgenin'de, sıyınıw ornınan tu'sip kiyatırg'an payg'ambarlar toparın ushıratasan'. Olar arfa, da'p, sırnay ha'm lira shertkenlerge qosılıp, payg'ambarshılıq etip kiyatırg'an boladı.
6 Sonda Jaratqan İyenin' Ruwxı seni tolıq biylep alıp, sen de olar menen birge payg'ambarshılıq etesen' ha'm pu'tkilley basqa adamg'a aylanasan'.
7 Bul belgiler orınlang'anda, jag'dayg'a qaray is tut. O'ytkeni Quday senin' menen birge boladı.
8 Endi mennen aldın Gilgalg'a barıp, sol jerde meni jeti ku'n ku't. Men jandırılatug'ın qurbanlıqlardı ha'm tatıwlıq qurbanlıqların beriw ushın senin' janın'a baraman. Men janın'a barg'anımda, ne islew kerekligin bildiremen».
9 Shaul Samueldin' janınan ketiw ushın burılıwdan-aq, Quday Shauldın' ju'regin o'zgertip jiberdi. Sol ku'ni Samuel aytqan ha'mme na'rse orınlandı.
10 Olar Gibag'a kelgende, Shauldı payg'ambarlar toparı qarsı aldı. Sonda Qudaydın' Ruwxı Shauldı tolıq biylep alıp, Shaul olar menen birge payg'ambarshılıq ete basladı.
11 Onı burınnan tanıytug'ınlardın' ha'mmesi onın' payg'ambarlar menen birge payg'ambarshılıq etip ju'rgenin ko'rgende, bir-birine: «Kishtin' ulına ne bolg'an? Shaul da payg'ambarlardın' arasında ma?» – desti.
12 Sol jerde otırg'anlardın' biri: «Al olardın' a'kesi kim eken?» – dedi. «Shaul da payg'ambarlardın' arasında ma?» – degen ga'p usıdan qalg'an eken.
13 Shaul payg'ambarshılıq etip bolg'annan son', sıyınıw ornına ko'terildi.
14 Sonda ag'ası Shauldan ha'm onın' xızmetshisinen: – Sizler qay jerge bardın'lar? – dep soradı. Shaul og'an: – Bizler esheklerdi izledik. Olardı taba almag'annan son', Samuelge bardıq, – dep juwap berdi.
15 Ag'ası Shaulg'a: – Samuel sag'an ne ayttı, mag'an da aytıp ber, – dedi.
16 Shaul og'an: – Ol bizlerge esheklerdin' tabılg'anın anıq aytıp berdi, – dedi. Biraq ol Samueldin' o'zine patshalıq tuwralı aytqan so'zleri haqqında tis jarmadı.
17 Samuel İzrail xalqın Mispag'a, Jaratqan İyenin' aldına jıynap,
18 8olarg'a bılay dedi: «İzraildın' Qudayı Jaratqan İye bılay deydi: „Men izraillılardı, yag'nıy sizlerdi Mısırdan alıp shıqtım. Mısırlılardın' ha'm o'zlerin'izdi ezgen barlıq patshalardın' qolınan sizlerdi qutqardım.
19 Biraq sizler bu'gin o'zlerin'izdi barlıq mu'siybet ha'm qıyınshılıqların'ızdan qutqarg'an Qudayın'ızdan ju'z burıp, o'zlerin'izge bir patsha qoyıp beriwdi talap ettin'iz“. Endi Jaratqan İyenin' aldında urıwların'ız ha'm tiyrelerin'iz boyınsha dizilin'ler».
20 Samuel pu'tkil İzrail urıwların birme-bir aldıg'a shıg'ardı. Shek boyınsha olardan Benyamin urıwı tan'landı.
21 Son'ınan Benyamin urıwı tiyreleri boyınsha shaqırılg'anda, Matriydin' tiyresi tan'landı. En' son'ında Matriydin' tiyresinen Kishtin' ulı Shaul tan'landı. Biraq onı izlegende, taba almadı.
22 Sonda xalıq Jaratqan İyeden: – Ol adam ele bul jerge kelmedi me? – dep soradı. Jaratqan İye olarg'a: – Ol usı jerde, ju'klerdin' arasında jasırınıp jatır, – dep juwap berdi.
23 Olar juwırıp barıp, Shauldı sol jerden alıp keldi. Shaul xalıqtın' arasında turg'anda, ha'mmenin' boyı onın' iynine kelip turdı.
24 Samuel xalıqqa: «Jaratqan İyenin' tan'lag'an adamın ko'rip tursızlar ma? Pu'tkil xalıq arasında og'an ten' keletug'ını joq», – dedi. Sonda xalıq: «Jasasın patsha!» – dep baqırdı.
25 Samuel xalıqqa patshalıqtın' huqıqları tuwralı bayanlap berdi. Olardı bir kitap qılıp jazıp, Jaratqan İyenin' aldına qoydı. Son'ınan ha'mmeni u'yine qaytardı.
26 Shaul da Gibag'a, o'z u'yine qayttı. Quday ju'reklerine tu'rtki salg'an ma'rt adamlar og'an joldas boldı.
27 Biraq geybir jaramas adamlar: «Ol bizlerdi qalay qutqara aladı?» – dep Shauldı mensinbey, og'an sıylar bermedi. Al Shaul o'zin sezbegenge aldı.
