1 Patshalar 11 bob
1 Ammon patshası Naxash Giladtag'ı Yabesh qalasına kelip, qalanı qamal etti. Pu'tkil yabeshliler Naxashqa: – Bizler menen kelisim du'z. Bizler sag'an xızmet etemiz, – dedi.
2 Biraq Ammon patshası Naxash: – Men bir sha'rt penen kelisim du'zemen. Pu'tkil İzrail xalqın masqara etiw ushın, ha'r birin'izdin' on' ko'zin'izdi oyıp alaman, – dedi.
3 Yabesh qalasının' aqsaqalları Naxashqa: – İzraildın' ha'mme jerine xabarshılar jiberiwimiz ushın, bizlerge jeti ku'n ma'wlet ber. Eger bizlerdi qutqaratug'ın hesh kim tabılmasa, sag'an ta'slim bolamız, – dedi.
4 Xabarshılar Shaul jasap atırg'an Giba qalasına kelip, bolıp atırg'an waqıyalardı xalıqqa xabarlag'anda, xalıq dad salıp jılay basladı.
5 Tap usı waqıtta Shaul o'gizlerin aydap, atızdan kiyatırg'an edi. Ol: «Adamlarg'a ne boldı? Nege bunsha jılap atır?» – dep soradı. Sonda yabeshlilerdin' jollag'an xabarın og'an aytıp berdi.
6 Shaul bul ga'plerdi esitken waqıtta, Qudaydın' Ruwxı onı tolıq biylep aldı. Shaul qattı ashıwg'a mindi.
7 Ol bir jup o'gizdi soyıp, olardı jilikledi de, jiliklerdi xabarshılar arqalı İzraildın' ha'mme ta'repine jiberip: «Shaul menen Samueldin' izine ermegen ha'r bir adamnın' o'gizlerine de anıq usılay islenedi», – dedi. Xalıq Jaratqan İyeden qorqqanınan qaltırap, ha'mmesi bir jag'adan bas shıg'arıp, jolg'a atlandı.
8 Shaul olardı Bezekke jıynadı. Sonda İzraildın' basqa urıwlarınan u'sh ju'z mın', al Yahuda urıwınan otız mın' adam boldı.
9 İzraillılar sol jerge kelgen yabeshli xabarshılarg'a: «Giladtag'ı Yabesh turg'ınları erten' ku'n tas to'bege ko'terilgende qutqarılatug'ının aytın'lar», – dedi. Xabarshılar barıp, bul xabardı jetkizgende, yabeshliler quwanıp ketti.
10 Olar Naxashqa: «Erten' sizlerge ta'slim bolamız. Sonda bizlerge neni maqul ko'rsen'iz, sonı islen'», – dedi.
11 en'iz, sonı islen'», – dedi. 11Erten'ine Shaul adamların u'sh toparg'a bo'ldi. Olar erte tan'da ammonlardın' ordasına bastırıp kirip, olardı ku'n qızg'ansha qırıp tasladı. Aman qalg'anları tarap ketip, dara-dara bolıp qashtı.
12 Bunnan keyin, xalıq Samuelge: «„Shaul ma bizge patsha bolatug'ın?“ – degenler kimler edi? Olardı alıp kelin'ler, o'ltiremiz», – dedi.
13 Biraq Shaul olarg'a: «Bu'gin hesh kim o'ltirilmeydi. Sebebi Jaratqan İye bu'gin İzrail xalqına qutqarılıw berdi», – dedi.
14 Al Samuel xalıqqa: «Gilgalg'a barıp, sol jerde patshalıqtı qayta tikleyik», – dedi.
15 Solay etip, pu'tkil xalıq Gilgalg'a barıp, Jaratqan İyenin' aldında Shauldı patsha etip qoydı. Sol jerde, Jaratqan İyenin' aldında tatıwlıq qurbanlıqların berdi. Shaul da, pu'tkil İzrail xalqı da jaqsılap ba'zim qurdı.
