1 Patshalar 15 bob
1 Bir ku'ni Samuel Shaulg'a bılay dedi: «Jaratqan İye seni maylap, O'z xalqı İzrail u'stinen patsha etip qoyıw ushın meni jibergen edi. Endi Jaratqan İyenin' so'zlerin tın'la.
2 A'lemnin' Jaratqan İyesi bılay deydi: „İzraillılarg'a islegen jamanlıg'ı ushın amaleklerdi jazalamaqshıman. O'ytkeni olar Mısırdan shıqqan İzrail xalqına qarsı shıqqan edi.
3 Endi barıp, amaleklerge hu'jim qıl ha'm olarg'a tiyisli barlıq na'rseni tolıq joq qıl. Olardı ayama. Erkegin de, hayalın da, balaların da, na'restelerin de, o'gizin de, qoyın da, tu'yesin de, eshegin de, ha'mmesin o'ltir“».
4 Shaul a'skerlerin toplap, olardı Telaim qalasında sanaqtan o'tkizdi. Ol jerde eki ju'z mın' piyada a'sker bolıp, Yahuda urıwınan da on mın' a'sker bar edi.
5 Shaul amaleklerdin' qalasına barıp, oypatlıqta buqqı jasadı.
6 Son'ınan ol ken xalqına: «Sizlerdi de amalekler menen birge qırıp taslamawım ushın, bo'linip, olardın' arasınan shıg'ıp ketin'ler. Sebebi sizler Mısırdan shıqqan İzrail xalqına jaqsılıq islegen edin'ler», – dep xabar jiberdi. Sonda kenler amaleklerden ayırılıp shıqtı.
7 Shaul Xawiladan Mısırdın' shıg'ısındag'ı Shurg'a shekemgi amaleklerdi qıyrattı.
8 Ol amalek patshası Agagtı tiriley qolg'a aldı, al onın' pu'tkil xalqın qılıshtan o'tkerip, qırıp tasladı.
9 Biraq Shaul ha'm onın' adamları Agagtı, onın' en' jaqsı qoyların, sıyırların, en' semiz tanaların ha'm qozıların, ulıwma jaqsı na'rselerdi ayap, olardı tolıq qırıp taslawdı qa'lemedi. Al a'hmiyetsiz ha'm ha'lsizlerin qırıp tasladı.
10 Sonda Jaratqan İye Samuelge bılay dep ayan berdi:
11 «Men Shauldı patsha etip tayınlag'anıma o'kinemen. Ol Mennen ju'z burıp, buyrıqlarımdı orınlamadı». Samuel ashıwlandı ha'm tu'ni menen Jaratqan İyege jalbarındı.
12 Erten'ine Samuel azanda erte turıp, Shaul menen ushırasıwg'a bardı. Biraq ol Shauldın' Karmelge ketkenin, sol jerde o'zine bir eskertkish ornatqannan son', to'men tu'sip Gilgalg'a qaytqanın bildi.
13 Samuel Shaulg'a kelgende, Shaul og'an: – Seni Jaratqan İye jarılqasın. Men Jaratqan İyenin' buyrıg'ın orınladım, – dedi.
14 Biraq Samuel onnan: – Onda nege qulag'ıma qoydın' man'ırag'anı ha'm sıyırdın' mo'n'iregeni esitilip tur? – dep soradı.
15 Shaul og'an: – Adamlarım olardı amaleklerden alıp keldi. Qudayın' Jaratqan İyege arnap qurbanlıqqa shalıw ushın, qoy ha'm sıyırlardın' en' jaqsıların ayap alıp qaldı, qalg'anların tolıq joq qıldıq, – dep juwap berdi.
16 Sonda Samuel Shaulg'a: – Toqtay tur, bu'gin tu'nde Jaratqan İyenin' mag'an nelerdi aytqanın sag'an bildireyin, – dedi. – Ayt, – dedi Shaul.
17 Samuel so'zin dawam etip bılay dedi: – O'zin'di pa's sanap ju'rgenin'de, İzrail urıwlarının' basshısına aylanbadın' ba? Jaratqan İye seni maylap, İzrailg'a patsha etip qoymadı ma?
18 Ol seni: «Barıp, sol gu'nakar amaleklerdi pu'tkilley qırıp tasla. Ha'mmesin joq qılmag'ansha, olar menen urıs», – degen tapsırma menen jibergen edi.
19 Olay bolsa, nege Jaratqan İyenin' so'zine qulaq aspadın'? Nege oljag'a taslanıp, Jaratqan İyenin' na'zerinde jawız bolg'an isti isledin'?
20 Shaul Samuelge bılay dep juwap berdi: – Biraq men Jaratqan İyenin' so'zine qulaq astım. Men Onın' jibergen jerine bardım. Amalek xalqın tolıq qırıp taslap, olardın' patshası Agagtı usı jerge alıp keldim.
21 Adamlarım bolsa, Gilgalda Qudayın' Jaratqan İyege arnap qurbanlıqqa shalıw ushın qırıp taslanıwı kerek bolg'an oljadan en' jaqsı qoy ha'm mallardı aldı.
22 Sonda Samuel Shaulg'a bılay dep juwap berdi: – Jandırılatug'ın ha'm basqa qurbanlıqlar bergennen go're, O'zine qulaq asqanlarg'a Jaratqan İye ko'birek quwanbay ma? Qulaq asıw qurbanlıqtan, boysınıw qoshqardın' mayınan artıg'ıraq.
23 Sebebi boysınbawshılıq palkerlik sıyaqlı gu'na, al menmenlik butparazlıq penen barabar. Sen Jaratqan İyenin' buyrıg'ın orınlawdan bas tartqanın' ushın, Jaratqan İye de seni patsha etiwden bas tarttı.
24 Shaul Samuelge: – Men gu'na isledim! Awa, Jaratqan İyenin' buyrıg'ına da, senin' so'zlerin'e de boysınbay, adamlarımnan qorqqanım ushın, olarg'a qulaq saldım.
25 Biraq endi o'tinemen, menin' gu'namdı keshir. Jaratqan İyege sıyınıwım ushın menin' menen birge qayt, – dedi.
26 Al Samuel Shaulg'a: – Men senin' menen birge qaytpayman. O'ytkeni sen Jaratqan İyenin' buyrıg'ın orınlawdan bas tarttın', Jaratqan İye de seni İzrailg'a patsha etiwden bas tarttı, – dedi.
27 Samuel ketpekshi bolıp burılg'anda, Shaul onın' shapanının' eteginen uslap qaldı. Shapan jırtıldı.
28 Sonda Samuel: – Bu'gin Jaratqan İye İzraildın' patshalıg'ın senin' qolın'nan aldı ha'm sennen jaqsırag'ına berdi.
29 İzraildın' ullı Qudayı jalg'an so'ylemeydi, pikirin de o'zgertpeydi. Pikirin o'zgertetug'ınday Ol adam emes, – dedi.
30 Shaul Samuelge: – Men gu'na isledim. Biraq xalqımnın' aqsaqalları ha'm basqa izraillılardın' aldında mag'an hu'rmet ko'rset. Qudayın' Jaratqan İyege sıyınıwım ushın, menin' menen birge qayt, – dedi.
31 Solay etip, Samuel Shaul menen birge qayttı ha'm Shaul Jaratqan İyege sıyındı.
32 Son'ınan Samuel: «Amaleklerdin' patshası Agagtı menin' aldıma alıp kelin'ler», – dep buyırdı. Agagtı baylawlı halda Samueldin' aldına alıp keldi. Al Agag ishinen: «O'lim qa'wpinin' shetlep o'tkeni anıq», – dep oyladı.
33 Biraq Samuel og'an: «Qılıshın' analardı balalarınan qalay ayırg'an bolsa, senin' anan' da hayallar arasında balasınan ayırılsın», – dedi de, Agagtı Gilgalda, Jaratqan İyenin' aldında qılısh penen shawıp tasladı.
34 Keyin Samuel Ramag'a, al Shaul Gibadag'ı o'z u'yine qayttı.
35 Sol ku'nnen baslap o'mirinin' aqırına shekem Samuel Shauldı qaytıp ko'rmedi. Biraq onın' ushın qayg'ırıp ju'rdi. Al Jaratqan İye bolsa, Shauldı İzrailg'a patsha etip tayınlag'anına pushayman edi.
