1 Patshalar 18 bob
1 Shaul menen Dawıttın' so'ylesiwi aqırına jetkende, Shauldın' ulı İonatan Dawıttı unatıp, onı janınday jaqsı ko'rip qaldı.
2 Sol ku'nnen baslap, Shaul Dawıttı janında alıp qaldı. Og'an a'kesinin' u'yine qaytıwg'a ruxsat bermedi.
3 İonatan Dawıttı janınday jaqsı ko'rgenlikten, onın' menen doslıq kelisimin du'zdi.
4 İonatan u'stindegi shapanın sheship, onı Dawıtqa berdi. Bug'an qosa sawıtın, qılıshın, oq jayın ha'm belbewin de berdi.
5 haul Dawıttı qay jerge jiberse de, ol tabısqa eristi. Sonlıqtan Shaul og'an a'skeriy adamlar u'stinen joqarı lawazımdı berdi. Bul pu'tkil xalıqqa ha'm Shauldın' xızmetshilerine unadı.
6 Dawıt filist Goliyattı o'ltirgennen son', a'skerler u'ylerine qaytıp baratırg'anda, İzraildın' barlıq qalalarınan kelgen hayallar da'p ha'm tarlı a'sbaplardı shertip, quwanıshlı qosıqlar ayttı ha'm oyıng'a tu'sip, patsha Shauldı ku'tip alıwg'a shıqtı.
7 Olar oynap ju'rip: «Shaul mın'lag'anın, Al Dawıt on mın'lag'anın o'ltirdi», – dep qosıq ayttı.
8 Bul so'zler Shaulg'a awır battı. Ol qattı ashıwlanıp: «Dawıtqa on mın' adam, al mag'an tek mın' adam berdi. Endi og'an tek patsha bolıw g'ana jetpey tur!» – dep oyladı.
9 Solay etip, sol ku'nnen baslap, Shaul Dawıtqa qızg'anısh penen qaray basladı.
10 Erten'ine Quday jibergen jaman ruwx Shauldı biylep aldı. Shaul o'z u'yinde jinlene basladı. Dawıt burıng'ıday lira shertip otırdı. Shauldın' qolında bir nayza bar edi.
11 Shaul o'zinshe: «Dawıttı urıp, diywalg'a qadap qoyayın», – dep oylap, qolındag'ı nayzasın Dawıtqa ılaqtırıp jiberdi. Biraq Dawıt eki rette de qaymıg'ıp qaldı.
12 Shaul Dawıttan qorqatug'ın edi. O'ytkeni Jaratqan İye Dawıt penen birge bolıp, al Shauldı ta'rk etken edi.
13 Sonlıqtan Shaul Dawıttı o'zinen uzaqlastırıp, mın'bası etip qoydı. Dawıt a'skerlerge basshılıq etti.
14 Jaratqan İye onın' menen birge bolg'anlıqtan, ol ha'r bir iste tabısqa eristi.
15 Dawıttın' u'lken tabısların ko'rgende, Shauldın' qorqınıshı ja'ne de artıp bardı.
16 Biraq pu'tkil İzrail ha'm Yahuda xalqı Dawıttı su'yetug'ın edi. Sebebi Dawıt olarg'a basshılıq etetug'ın edi.
17 Shaul Dawıtqa: – Mınaw menin' u'lken qızım Merab. Onı sag'an hayallıqqa beremen. Tek mag'an ma'rtlershe xızmet etip, Jaratqan İyenin' sawashların alıp bar, – dedi. Sebebi ol: «Dawıt menin' qolımnan emes, al filistlerdin' qolınan o'lsin», – dep oylaytug'ın edi.
18 Dawıt Shaulg'a: – Patshag'a ku'yew bala bolatug'ınday, menin' o'zim, u'y-ishim ha'm a'kemnin' tiyresi İzrailda kim bolıptı? – dedi.
19 Degen menen, Shauldın' qızı Merabtın' Dawıtqa beriletug'ın waqtı kelgende, qız mexolalı Adrielge hayallıqqa berildi.
20 Sol arada Shauldın' basqa qızı Mixal Dawıttı su'yip qaldı. Bunı esitkende, Shaul quwanıp ketti.
21 Ol: «Dawıtqa Mixaldı beremen. Solay etip, Mixal ol ushın duzaq boladı. Al filistler onı o'ltiredi», – dep oyladı. Shaul Dawıtqa: «Ha'zir mag'an ku'yew bala bolıwın' ushın ja'ne bir mu'mkinshiligin' bar», – dedi.
22 Son'ınan xızmetshilerine: «Patshanın' sennen kewli toq, ha'mme xızmetshileri de seni jaqsı ko'redi. Og'an ku'yew bala bolatug'ın waqtın' keldi», – dep Dawıtqa jasırınsha aytıwdı buyırdı.
23 Shauldın' xızmetshileri bul so'zlerdi Dawıtqa jetkizdi. Dawıt olarg'a: «Mendey ka'mbag'al ha'm a'piwayı adam ushın patshag'a ku'yew bala bolıw an'sat dep oylaysızlar ma?» – dedi.
24 Xızmetshiler Dawıttın' aytqanların Shaulg'a jetkizdi.
25 Sonda Shaul Dawıtqa bılay dep aytıwdı buyırdı: «Patsha o'z dushpanlarınan o'sh alıw ushın, qalın' mal retinde ju'z filisttin' su'nnet terisinen basqa hesh na'rseni qa'lemeydi». Shaul Dawıttın' filistlerdin' qolına tu'sip o'liwin rejelestirgen edi.
26 Xızmetshiler Shauldın' aytqanların Dawıtqa jetkizdi. Dawıt patshag'a ku'yew bala bolıwdı maqul ko'rdi. Belgilengen ku'n bolmastan aldın,
27 Dawıt ha'm onın' adamları barıp, eki ju'z filistti o'ltirdi. Patshag'a ku'yew bala bolıw ushın, Dawıt o'ltirilgen filistlerdin' su'nnet terilerinin' birde birewin qaldırmastan patshag'a a'kelip berdi. Sonda Shaul qızı Mixaldı Dawıtqa hayallıqqa berdi.
28 Shaul Jaratqan İyenin' Dawıt penen birge ekenin ha'm qızı Mixaldın' onı su'yetug'ının anıq bildi.
29 Sol sebepten Shaul Dawıttan ja'ne de qattıraq qorqtı ha'm o'mirinin' aqırına shekem og'an dushpan bolıp qaldı.
30 Filist a'skerbasıları urısqa shıg'ıwın dawam etti. Ha'r urısta Dawıt Shauldın' basqa a'skerbasılarına qarag'anda ko'birek tabısqa erisetug'ın edi. Sonlıqtan Dawıt u'lken dan'qqa bo'lendi.
