1 Patshalar 20 bob
1 Dawıt Ramanın' Nayot degen jerinen qashıp, İonatang'a bardı. Dawıt onnan: – Men ne qıldım? Ayıbım ne? Meni o'ltiretug'ınday, a'ken'e qarsı ne gu'na isledim? – dep soradı.
2 İonatan og'an: – Hasla, sen o'lmeysen'. Qanday is bolsa da, a'kem mag'an aytpay hesh na'rse islemeydi. Bunı nege mennen jasırar eken? Bunday na'rse bolmaydı, – dep juwap berdi.
3 Biraq Dawıt og'an: – Senin' meni jaqsı ko'retug'ının'dı a'ken' jaqsı biledi. Ol: «İonatan ne isleytug'ınımdı bilmesin. Bilse, qapa boladı», – dep oylaydı. Tiri Jaratqan İye haqı aldın'da ant iship aytaman: men jar jag'asında turman, – dedi.
4 İonatan Dawıtqa: – Tile tilegin'di, sen ushın orınlayman, – dedi.
5 Dawıt İonatang'a bılay dedi: – Minekey, erten' Jan'a ay bayramı boladı. Men patsha menen birge dasturxang'a otırıwım kerek. Biraq mag'an ruxsat ber, men erten'nin' arg'ı ku'ni keshke deyin atızda jasırınıp turayın.
6 Eger a'ken' menin' joqlıg'ımdı sezip qalsa, og'an: «Dawıt asıg'ıs tu'rde o'z qalası Beytlehemge ketetug'ın bolıp, mennen jalınıp ruxsat soradı. Ol jerde pu'tkil tiyresi jıllıq qurbanlıq beredi eken», – dersen'.
7 Eger a'ken': «Yaqshı», – dese, onda menin' qa'wip-qa'terden aman bolg'anım. Eger g'a'zeplense, bilip qoy, onın' meni o'ltiriwdi qarar etkeni.
8 Al sag'an kelsek, sen mag'an jaqsılıq isle. Sebebi Jaratqan İyenin' aldında menin' menen kelisim du'zgensen'. Eger ayıplı bolsam, meni o'zin' o'ltir. Meni a'ken'e aparıwın'nın' nege keregi bar?
9 İonatan Dawıtqa: – Sag'an hasla onday bolmaydı. Eger a'kemnin' seni o'ltiriwdi qarar etkenin bilgenimde, sag'an aytpas pa edim? – dedi.
10 Dawıt İonatannan: – Eger a'ken' sag'an qatal juwap berse, onı mag'an kim xabarlaydı? – dep soradı.
11 İonatan Dawıtqa: – Ju'r atızg'a barayıq, – dedi de, olar ekewi atızg'a ketti.
12 İonatan so'zin dawam etip, Dawıtqa bılay dedi: – İzraildın' Qudayı Jaratqan İye gu'wa bolsın! Erten' yamasa arg'ı ku'ni usınday waqıtqa deyin a'kemnin' niyetin bilip alaman. Eger a'kemnin' sag'an degen niyeti jaqsı bolsa, sag'an xabar jiberemen.
13 Eger a'kem seni o'ltiriwdi niyet etken bolsa, al men seni xabardar etip, qa'wipsiz ketiwin'di ta'miyinlemesem, onda Jaratqan İye meni jazalag'an u'stine jazalasın. Jaratqan İye burın menin' a'keme yar bolg'anı sıyaqlı, sag'an da yar bolsın.
14 Biraq sen ko'zimnin' tirisinde mag'an Jaratqan İyenin' miyrimin ko'rset.
15 Eger men o'lip qalsam, Jaratqan İye senin' barlıq dushpanların'dı jer betinen joq qılıp jiberse de, sen menin' u'y-ishimnen ma'n'gige o'z miyrimin'di ayama.
16 Solay etip, İonatan Dawıttın' na'sili menen kelisim du'zip: «Jaratqan İye Dawıttın' dushpanların jazalasın», – dedi.
17 Dawıtqa degen su'yispenshiligi sebepli, İonatan og'an ja'ne bir ma'rte ant ishtirdi. O'ytkeni İonatan Dawıttı janınday jaqsı ko'retug'ın edi.
18 İonatan Dawıtqa bılay dedi: «Erten' Jan'a ay bayramı. Senin' joqlıg'ın' bilinedi, sebebi ornın' bos turadı.
19 Arg'ı ku'ni keshte to'men tu'sip, tez burın jasırıng'an jerin'e bar da, Ezel tasının' janında ku'tip tur.
20 Men bir nıshandı go'zlegendey bolıp, tas betke qaray u'sh ret oq ataman.
21 Son'ınan xızmetshime: „Barıp, oqlardı tawıp, alıp kel“, – dep buyıraman. Eger xızmetshime: „Qara, oqlar senin' art jag'ın'da, olardı alıp kel“, – desem, onda sen menin' janıma kel. Tiri Jaratqan İye haqı ant ishemen: sen qa'wip-qa'terden awlaqsan'.
22 Eger xızmetshime: „Qara, oqlar aldı betin'de“, – desem, sen ket. O'ytkeni Jaratqan İye seni uzaqlarg'a jiberip atır.
23 Al bir-birimizge bergen antımızg'a kelsek, Jaratqan İye bizlerge ma'n'gige gu'wa bolsın».
24 Solay etip, Dawıt atızg'a jasırındı. Jan'a ay bayramı baslang'anda, patsha Shaul dasturxang'a otırdı.
25 Ol a'dettegidey diywal janındag'ı o'z ornına otırdı. İonatan Shauldın' qarsı aldına, Abner onın' qasındag'ı o'z ornına otırdı. Al Dawıttın' ornı bos qaldı.
26 Biraq Shaul sol ku'ni hesh na'rse demedi. Ol: «Dawıttın' qanday da bir jag'dayı shıg'ıp, tazalanıw ra'simin orınlay almay qalıp, pa'klenbegen shıg'ar», – dep oyladı.
27 Degen menen, erten'ine, bayramnın' ekinshi ku'ni de Dawıttın' ornı ja'ne bos turdı. Sonda Shaul ulı İonatannan: – İshaydın' ulı nege keshe de, bu'gin de awqatlanıwg'a kelmedi? – dep soradı.
28 İonatan a'kesine:– Dawıt Beytlehemge barıw ushın mennen jalınıp ruxsat sorag'an edi.
29 Ol mag'an: «İltimas, mag'an ruxsat ber. Sebebi tiyremiz qalada qurbanlıq bermekshi edi. A'jag'am mag'an sol jerde bolıwımdı buyırg'an edi. Eger maqul ko'rsen', barıp, tuwısqanlarımdı ko'rip keleyin», – degen edi. Sonlıqtan ol patsha dasturxanına kele almadı, – dep juwap berdi.
30 Sonda Shaul g'a'zeplenip, İonatang'a bılay dep baqırdı: – Ha'y sen, naysap! İshaydın' balası menen doslasıp alg'anın'dı bilmeydi deysen' be? Bul isin' menen o'zin'di de, seni tuwg'an anan'dı da uyatqa qaldırıp atırsan'.
31 Eger İshaydın' ulı jer betinde tiri tursa, o'zin' de, patshalıg'ın' da saqlanıp qalmaydı. Endi adam jiberip, onı mag'an a'keldir. Ol o'liwi tiyis.
32 İonatan a'kesine: – Ol ne ushın o'liwi kerek? Ol ne isledi, aqırı? – dedi.
33 Biraq Shaul İonatandı o'ltirmekshi bolıp, og'an qaray nayzasın ılaqtırıp jiberdi. Sonda İonatan a'kesinin' Dawıttı o'ltiriwge anıq qarar qılg'anın tu'sindi.
34 İonatan qattı ashıwlanıp, dasturxan basınan turdı. Ol aydın' ekinshi ku'ni hesh duz tatpadı. Sebebi a'kesinin' Dawıttı xorlag'anına qayg'ırdı.
35 Erten'ine azanda İonatan Dawıt penen ko'risiw ushın atızg'a ketti. Ol janına bir jas balanı aldı.
36 İonatan balag'a: «Juwır, men atqan oqlardı izle», – dedi. Bala juwırıp baratırg'anda, İonatan onın' aldına qaray bir oq attı.
37 Bala İonatannın' atqan og'ı tu'sken jerge barg'anda, İonatan og'an: «Oq aldı betin'de», – dep baqırdı.
38 Son'ınan İonatan ja'ne: «Tez bol, juwır, toqtap turma», – dep baqırdı. Bala oqtı alıp, mırzasına a'kelip berdi.
39 Bala hesh na'rseden xabarsız edi. Bul istin' ma'nisi tek İonatan menen Dawıtqa ayan edi.
40 İonatan qural-jaraqların balag'a berip: «Mınalardı qalag'a apar», – dedi.
41 Bala ketiwden-aq, Dawıt tastın' qubla ta'repinen shıg'ıp keldi de, ju'zi jerge tiygenshe iyilip, u'sh ret ta'jim etti. Eki dos bir-birin su'yip jıladı, biraq Dawıt qattıraq jıladı.
42 Aqırında İonatan Dawıtqa: «Aman-esen jolın'a tu's. Ekewimiz Jaratqan İyenin' atı menen ant ishkenbiz. Jaratqan İye bizlerdin' ha'm urpaqlarımızdın' arasında ma'n'gige gu'wa bolsın», – dedi.
43 Sonnan keyin, Dawıt o'z jolına tu'sti. Al İonatan qalag'a qayttı.
