1 Patshalar 21 bob
1 Dawıt Nob qalasındag'ı ruwxaniy Aximelextin' janına bardı. Aximelex Dawıttı ku'tip alıp atırıp: – Nege jalg'ızsan'? Nege janın'da hesh kim joq? – dep qorqınısh penen soradı.
2 Dawıt og'an bılay dep juwap berdi: – Patsha mag'an bir tapsırma bergen edi. Ol mag'an: «Menin' seni ne ushın jibergenimdi ha'm sag'an qanday tapsırma bergenimdi hesh kim bilmesin», – degen edi. Sonlıqtan adamlarıma belgili bir jerge barıp turıwdı buyırg'an edim.
3 Ha'zir jegendey nen'iz bar? Mag'an bes nan yamasa jegendey bir na'rse berin'.
4 Ruwxaniy og'an: – A'piwayı nan joq. Eger adamların'ız hayallardan o'zlerin tıyg'an bolsa, Qudayg'a arnalg'an nan bar, – dep juwap berdi.
5 Dawıt og'an: – A'detke go're, jolg'a shıqqanımızda, adamlarımız o'zlerin pa'k saqlap, hayal adamg'a jaqınlamaydı. A'sirese, bu'gin olar o'zlerin ju'da' pa'k tuttı, – dedi.
6 Sonnan keyin, ruwxaniy Dawıtqa muxaddes nan berdi. Sebebi ol jerde Qudayg'a usınılg'an nannan basqa nan joq edi. Bul nan Jaratqan İyenin' aldınan alıng'an ku'ni onın' ornına ıssı nan a'kelip qoyıldı.
7 Sol ku'ni Shauldın' xızmetshilerinin' biri Doeg degen edomlı bas shopan Jaratqan İyenin' aldında diniy xızmetin o'tew ushın barıp, sol jerde turg'an edi.
8 Dawıt Aximelexke: – Janın'da qılısh yamasa nayza joq pa? Patshanın' tapsırması asıg'ıs bolg'anlıqtan, janıma qılısh ta, qural-jaraq ta alıp shıqpappan, – dedi.
9 Ruwxaniy og'an: – Ela oypatlıg'ında o'zin' o'ltirgen filist Goliyattın' qılıshı bar. Efodtın' artında tawarg'a orawlı tur. Bul jerde basqa qural joq. Qa'lesen', sonı al, – dedi. Dawıt og'an: – Og'an ten' keletug'ını joq, onı mag'an ber, – dedi.
10 Shauldan qashqan Dawıt sol ku'ni Gat patshası Axishke bardı.
11 Axishtin' xızmetshileri: «Bul İzraildın' patshası Dawıt emes pe? Adamlar usı adam haqqında: „Shaul mın'lag'anın, Al Dawıt on mın'lag'anın o'ltirdi“, – dep ayaq oyıng'a tu'sip, qosıq aytqan joq pa edi?» – dedi.
12 Bul so'zler Dawıttı teren' oylandırıp, ol Gat patshası Axishten qattı qorqtı.
13 Dawıt olardın' aldında o'zinin' kelbetin o'zgertip, o'zin jinli etip ko'rsetti ha'm qala da'rwazaların tırmalap, silekeyin saqalına ag'ızıp ju'rdi.
14 Axish xızmetshilerine: «Bul adamg'a qaran'lar, ol nag'ız jinli-g'o. Onı nege mag'an alıp keldin'ler?
15 O'zimizde jinliler azday, onı menin' aldımda jinlilik qılsın dep alıp keldin'ler me? Bul adamnın' sarayıma keliwi sha'rt pe edi?» – dedi.
