1 Patshalar 24 bob
1 Dawıt sol jerden ketip, En-Gediy u'lkesindegi adam bara almaytug'ın jerlerde jasırınıp ju'rdi.
2 Shaul filistler menen bolg'an urıstan qaytıp kelgende, Dawıttın' En-Gediy sho'linde ju'rgeninen xabar taptı.
3 Shaul Dawıttı ha'm onın' adamların «Taw eshkisi» jartaslıg'ınan izlew ushın, pu'tkil İzraildan u'sh mın' ag'la a'sker alıp, jolg'a shıqtı.
4 Jol jiyeginde qoy qorası bolıp, onın' janında bir u'n'gir bar edi. Shaul maydanlaw ushın u'n'girge kirdi. Al sol u'n'girdin' en' tu'pkirinde Dawıt penen onın' adamları otırg'an edi.
5 Adamları Dawıtqa: «Jaratqan İye sag'an: „Dushpanların'a qa'legenin'di isley alıwın' ushın, olardı sag'an ta'slim etemen“, – degen edi. Mine, bu'gin sol ku'n keldi», – dedi. Sonda Dawıt ornınan turıp, bildirmey Shauldın' shapanının' shalg'ayınan kesip aldı.
6 Biraq Dawıt keyin ala Shauldın' shalg'ayınan kesip alg'anı ushın, o'zin ayıplı sezdi.
7 Dawıt o'z adamlarına: «Taqsırıma, Jaratqan İyenin' maylag'an adamına qol ko'terip, og'an bir na'rse islewden Jaratqan İyenin' O'zi saqlasın! Sebebi ol Jaratqan İyenin' maylag'an adamı», – dedi.
8 Dawıt usı so'zleri menen adamlarına tıyım salıp, Shaulg'a qol tiygiziwge ruxsat bermedi. Al Shaul u'n'girden shıg'ıp, jolg'a tu'sti.
9 Dawıt ta Shauldın' izinshe u'n'girden shıg'ıp: «Taqsır!» – dep baqırdı. Shaul artına qarag'anda, Dawıt et-betinen jerge jıg'ılıp, og'an ta'jim etti.
10 Son'ınan ol Shaulg'a bılay dedi: – «Dawıt sag'an jamanlıq qılajaq», – degenlerdin' so'zlerine nege qulaq salasız?
11 Bu'gin Jaratqan İyenin' sizdi qolıma tutıp bergenin ko'zin'iz benen ko'rip turıpsız. Bazılar menin' sizdi o'ltiriwimdi qa'legen edi. Biraq menin' sizge janım ashıp: «Taqsırıma qol tiygizbeymen, o'ytkeni ol Jaratqan İyenin' maylag'an adamı», – dedim.
12 Ha'y a'ke, minekey, shapanın'ızdın' shalg'ayınan kesip alıng'an qolımdag'ı mına qıyındıg'a qaran'! Men sizin' shapanın'ızdın' shalg'ayınan kesip aldım, biraq sizdi o'ltirmedim. Bunnan kewlimde jamanlıqtın' ha'm zulımlıqtın' joq ekenin bilip alın'. Men sizge jamanlıq qılmasam da, siz meni o'ltirmekshi bolıp atırsız.
13 Jaratqan İye aramızda to'relik etsin ha'm menin' o'shimdi sizden Ol alsın. Biraq men sizge qol ko'termeymen.
14 Ata-babalarımız: «Jamanlıq jaman adamlardan shıg'adı», – degeni sıyaqlı, men sizge qol ko'termeymen.
15 İzrail patshası kimge qarsı shıqtı? Siz kimdi quwdalap atırsız? O'lgen iytti yamasa bir bu'rgeni emes pe?
16 Jaratqan İye bizlerge qazılıq etip, qay birimizdin' haq ekenimizdi sheship bersin. Jaratqan İye dawımdı qarap shıqsın ha'm meni jaqlap, sizin' qolın'ızdan qutqarsın.
17 Dawıt so'zin tamamlag'anda, Shaul og'an: – Dawıt, ulım! Bul senin' dawısın' ba? – dep soradı ha'm o'kirip jılay basladı.
18 Son'ınan ol bılay dedi: – Sen mag'an qarag'anda a'dilireksen'. Men sag'an jamanlıq islesem de, sen mag'an jaqsılıq penen juwap berdin'.
19 Bu'gin sen mag'an jaqsı qatnasta ekenligin'di da'lilledin'. Jaratqan İye meni qolın'a tutıp berse de, meni o'ltirmedin'.
20 Dushpanın tutıp alg'an qaysı bir adam onı aman jiberedi? Bu'gin mag'an islegen jaqsılıg'ın' ushın, Jaratqan İye sag'an jaqsılıq sıylasın!
21 Endi men senin' so'zsiz patsha bolatug'ının'dı bildim. İzrail patshalıg'ı senin' qolın'da bekkem boladı.
22 Endi mennen keyin urpaqlarımdı joq qılmaytug'ının'dı, a'kemnin' xojalıg'ınan atımdı o'shirmeytug'ının'dı aytıp, Jaratqan İyenin' aldında ant ish.
23 Dawıt Shaulg'a ant berdi. Sonnan keyin, Shaul u'yine qayttı, al Dawıt ha'm onın' adamları panalag'an jerlerine ketti.
