1 Patshalar 27 bob
1 Dawıt ishinen: «Bir ku'ni Shauldın' qolınan o'lip ketermen. Jaqsısı, tezirek filistlerdin' jerine qashıp keteyin. Sonda Shaul İzraildın' ha'r jerinen meni izlegendi qoyar, men de onnan qutılarman», – dep oyladı.
2 Usılayınsha Dawıt ha'm onın' janındag'ı altı ju'z adam jolg'a shıg'ıp, Gat patshası Maox ulı Axishtin' ta'repine o'tip ketti.
3 Olar xojalıg'ındag'ılar menen birge Gat qalasına, Axishtin' janına ornalastı. Dawıttın' eki hayalı: izreelli Axinoam ha'm karmelli Nabaldın' jesiri Abigayıl da onın' janında edi.
4 Shaul Dawıttın' Gatqa qashıp ketkenin esitkende, endi onı izlewden waz keshti.
5 Dawıt Axishke: «Eger maqul ko'rsen'iz, a'tiraptag'ı qalalardın' birinen mag'an bir jer berilsin, men sol jerde jasayın. Sebebi qulın'ız bolg'an mag'an sizin' menen birge patshanın' qalasında jasawdın' nege keregi bar?» – dedi.
6 Axish sol ku'ni Dawıtqa Siklag qalasın berdi. Sol sebepten Siklag ha'zirge deyin Yahuda patshalarına tiyisli qala bolıp qaldı.
7 Dawıt filistler elinde bir jıl to'rt ay jasadı.
8 Sol waqıt ishinde Dawıt ha'm onın' adamları geshur, gizer ha'm amalek xalıqlarına shabıwıl jasadı. Bul xalıqlar uzaq waqıtlardan beri Shurg'a, ha'tte, Mısırg'a shekem sozılg'an jerlerde jasaytug'ın edi.
9 Dawıt qay jerge shabıwıl jasasa da, erkekti de, hayaldı da, hesh kimdi tiri qaldırmay, tek olardın' qoyların, o'gizlerin, esheklerin, tu'yelerin ha'm kiyim-kensheklerin alıp, patsha Axishke qaytıp keletug'ın edi.
10 Eger Axish Dawıttan: «Bu'gin qay jerlerge shabıwıl jasadın'ız?» – dep sorasa, Dawıt og'an: «Yahudanın' qubla ta'repine, Eraxmeel tiyresinin' ha'm kenlerdin' qubla ta'repine shabıwıl jasadıq», – dep juwap beretug'ın edi.
11 Dawıt hesh bir adamnın' Gatqa kelip: «Dawıt olay isledi yamasa Dawıt bulay isledi», – dep aytpawı ushın, erkekti de, hayaldı da, hesh kimdi tiri qaldırmaytug'ın edi. Dawıt filistlerdin' elinde jasag'an waqtının' ha'mmesinde usılay isledi.
12 Axish Dawıtqa isenip: «Dawıt o'z xalqı bolg'an izraillılarg'a jek ko'rinshi boldı. Bunnan bılay, ol ma'n'gige menin' xızmetimde boladı», – dep oyladı.
