1 Patshalar 30 bob
1 Dawıt ha'm onın' adamları u'shinshi ku'ni Siklag qalasına jetip keldi. Sol arada amalekler Negebke ha'm Siklagqa shabıwıl jasap, Siklagtı o'rtep jibergen edi.
2 Olar hesh kimdi o'ltirmey, tek hayallardı ha'm sol jerde bolg'an u'lken-kishinin' ha'mmesin tutqın etip, o'zleri menen birge alıp ketken edi.Dawıt adamları menen ol jerge jetip barg'anda, qalanın' o'rtep jiberilgenin, hayalları, ulları ha'm qızlarının' tutqıng'a alıng'anın bildi
3 Dawıt adamları menen ol jerge jetip barg'anda, qalanın' o'rtep jiberilgenin, hayalları, ulları ha'm qızlarının' tutqıng'a alıng'anın bildi.
4 Olar haldan tayg'ansha, dad salıp jıladı.
5 Dawıttın' eki hayalı, izreelli Axinoam ha'm karmelli Nabaldın' jesiri Abigayıl da tutqın etilgen edi.
6 Dawıt qıyın jag'dayda qaldı. Sebebi ha'r bir adam ulları ha'm qızları ushın qayg'ırıp: «Dawıttı tas boran qılıp o'ltiremiz», – desti. Biraq Dawıt o'z Qudayı Jaratqan İyeden ku'sh aldı.
7 Ol Aximelex ulı ruwxaniy Abiyatarg'a: «Mag'an efodtı alıp kel», – dedi. Abiyatar efodtı alıp keldi.
8 Dawıt Jaratqan İyeden: – Bul basqınshılardı quwıp barsam, olarg'a jete alaman ba? – dep soradı. Jaratqan İye og'an: – İzinen quw, a'lbette, olarg'a jetip alıp, tutqınlardı azat etesen', – dep juwap berdi.
9 Solay etip, Dawıt janındag'ı altı ju'z adam menen jolg'a shıg'ıp, Besor sayının' jag'asına keldi. Olardın' haldan tayg'anları sol jerde qaldı.
10 Al Dawıttın' o'zi to'rt ju'z adam menen basqınshılardı quwıwdı dawam etti. Saydı kesip o'tiwge shaması kelmegen eki ju'z adam sol jerde qaldı.
11 Olar qır daladan bir mısırlını tawıp alıp, Dawıttın' aldına alıp keldi. Og'an ishiwge suw ha'm jewge azıq berdi.
12 Ja'ne de, og'an keptirip nıg'ızlang'an bir bo'lek a'njir menen eki bo'lek kishmish berdi. Sol adam jep, ha'llenip aldı. Ol u'sh ku'n, u'sh tu'n duz tatpag'an ha'm suw da ishpegen edi.
13 Dawıt onnan: – Sen kimnin' qulısan'? Qay jerdensen'? – dep soradı. Jigit bılay dep juwap berdi: – Men mısırlıman, bir amalektin' qulı edim. U'sh ku'n burın nawqaslanıp qalg'anlıg'ım sebepli, xojayınım meni taslap ketti.
14 Bizler keretlerdin' qubla shegarasına, yag'nıy Yahuda jerlerine ha'm Kalebtin' qubla ta'repine shabıwıl jasadıq. Al Siklag qalasın o'rtep jiberdik.
15 Dawıt onnan: – Meni sol basqınshılarg'a alıp bara alasan' ba? – dep soradı. Jigit og'an: – Meni o'ltirmeytug'ının'ızdı ha'm xojayınımnın' qolına tapsırmaytug'ının'ızdı aytıp, Qudaydın' aldında ant ishsen'iz, men sizdi sol basqınshılarg'a alıp baraman, – dep juwap berdi.
16 Solay etip, mısırlı Dawıtqa jol ko'rsetip ketti. Basqınshılar do'gerekke jayılıp, filistlerdin' jerinen ha'm Yahudadan basıp alg'an u'lken oljalarınan iship-jep ma'slik qurıp atırg'an edi.
17 Dawıt erten'ine tan' azannan ku'n batqang'a deyin olardı qırdı. Basqınshılardın' tu'yelerge minip qashqan to'rt ju'z jigitinen basqa birde birewi qutılıp kete almadı.
18 Dawıt amalekler alıp ketken na'rselerdin' ha'mmesin, sonday-aq o'zinin' eki hayalın da qutqardı.
19 Jaslar, g'arrılar, ullar, qızlar, oljalang'an mallar, qullası, amaleklerdin' alıp ketkenlerinen hesh biri jog'almadı. Dawıt ha'mmesin qaytarıp aldı.
20 Ol pu'tkil qoy ha'm qara mallardı da aldı. Dawıttın' adamları olardı o'z mallarının' aldına salıp, aydap baratırıp: «Bul Dawıttın' oljası», – dep aytatug'ın edi.
21 Sonnan son', Dawıt izine eriwge halları kelmey, Besor sayının' jag'asında qalg'an eki ju'z adamnın' janına bardı. Olar da Dawıttı ha'm onın' janındag'ılardı ku'tip alıwg'a shıqtı. Dawıt jaqınlasıp, olar menen amanlastı.
22 Biraq Dawıt penen ketken jaman ha'm on'bag'an adamlardın' ha'mmesi: – Bular bizler menen birge barmag'anlıqtan, oljag'a alıng'an na'rselerden olarg'a pay bermeymiz. Ha'r biri tek hayalın ha'm balaların alıp ketsin, – dedi.
23 Biraq Dawıt olarg'a bılay dedi: – Yaq, tuwısqanlarım! Jaratqan İyenin' bizge bergenlerine bulay islemen'ler. Ol bizlerdi qorg'adı ha'm bizlerge shabıwıl jasag'an basqınshılardı qolımızg'a tutıp berdi.
24 Sizlerdin' bul so'zlerin'izdi kim qabıl etedi? Sawashqa barg'anlar menen ju'klerdin' qasında qalg'anlardın' payı ten'dey boladı. Ha'r bir na'rse ten'dey bo'lip beriledi.
25 Sol ku'nnen baslap, Dawıt bunı İzrail ushın da'stu'rge aylandırıp, qag'ıyda etip bekitti. Ol ha'zirge deyin saqlanıp kelmekte.
26 Dawıt Siklagqa qaytıp kelgennen son', dosları bolg'an Yahuda aqsaqallarına alıng'an oljalardan jiberip atırıp: «Mine, bul Jaratqan İyenin' dushpanlarınan alıng'an oljalardan sizlerge sawg'a», – dedi.
27 Ol sawg'alardı Beyt-El, Negebtegi Ramot, Yattir,
28 Aroer, Sifmot, Eshtemoa,
29 ha'm Raxalda bolg'anlarg'a, Eraxmeel tiyresinin' ha'm kenlerdin' qalalarında bolg'anlarg'a,
30 Xorma, Bor-Ashan, Atax
31 ha'm Xebronda bolg'anlarg'a, sonday-aq, o'zi adamları menen birge gezgen barlıq jerdegilerge jiberdi.
