Юсуп ҳаққындағы ўақылар
Юсуптиң түси
Мухаддес Китап, Жаратылыс Китабы 37:1–12 аятлар
Яқыптың он еки улы болып, улларының ҳәммеси ер жеткен еди. Оның генже улларынан тек биреўи – Бенямин еле ер жетпеген еди. Ол туўылып атырған ўақытта Яқыптың ҳаялы Раҳила қайтыс болады. Раҳиланың улы Юсуп Беняминнен үлкен еди. Ол әлле қашан өспирим болып, әкесин сүйетуғын ҳәм ҳәмме нәрседе оған бойсынатуғын еди.
Яқыптың он үлкен баласы ешки ҳәм қойларды бағатуғын еди. Олардың ис-ҳәрекетлери көбинесе надурыс болғанлықтан әкесине унамайтуғын еди. Юсуп олар менен бирге болғанында, олардың инсәпсызлығын көрип қапа болатуғын ҳәм бул ҳаққында әкесине айтып беретуғын еди. Юсуптиң бул ис-ҳәрекети әжағаларын ғәзеплендиретуғын еди. Соның ушын Юсуп ҳәм оның ағалары арасында оғада қопал мүнәсебет пайда болды. Өз гезегинде Яқып та өзиниң туңғыш улларына нахақлық қылып, Юсупти қалған балаларына қарағанда көбирек жақсы көретуғын еди. Әкениң бул ис-ҳәрекети оларда жеркениш ҳәм көре алмаўшылық сезимин оятты.
Бир күни Яқып Юсупке арналған жүдә шырайлы реңли кийим тигиўди буйырды.
Яқыптың улларының ҳеш биринде бундай кийим жоқ еди. Бул болса, туўысқанлар арасында көре алмаўшылықты және де күшейтти.
Юсуп гейде айрықша түслер көретуғын еди. Бир күни ол түсинде әжағалары менен атыздың ортасында баў баўлап атырғанлығын көрди. Әжағалары байлаған баўлар оның баўына тәжим етти. Юсуп бул түске жүдә ҳайран болып, оны әжағаларына айтып берди.
Олар қатты ашыўланып, былай деди:
– Бизлерди саған бойсынады деп ойлайсаң ба?
Көп өтпей, Юсуп және бир түс көрди. Түсинде қуяш, ай ҳәм он бир жулдыз оған тәжим етти. Бул түс оны және де ҳайран қалдырды. Бул ҳаққында ол әкесине ҳәм әжағаларына айтып берди.
Әкеси оны кейип, былай деди:
– Хақыйқаттан да, қуяш – мен, ай – анаң ҳәм он бир жулдыз болса – әжағаларың, ҳәммемиз келип, саған жерге дейин тәжим етемиз деп ойлайсаң ба?
Бирақ Яқып бул түсти есинде сақлап қалған еди.
Әжағалары барған сайын Юсупке ғәзепленип, қызғаныш пенен қараўды даўам етти. әжағалары:
– Юсуп менмен болып кетип өзин киммен деп ойлап жүр? – деп, – Хош, бизлер оған еле көрсетемиз! – деп келисип алды.
СОРАЎЛАР
1. Яқыптың неше улы бар еди?
2. Яқыптың Юсупти өзиниң сүйикли улы қылып сайлағаны дурыс болды ма?
3. Юсуптиң түслери әжағаларын не ушын ғәзеплендирди?
