Қызыл теңиз суўлары арқалы
Мухаддес Китап, Шығыў китабы 13:20–22; 14; 15:1, 22– баплар ҳәм аятлар
Израил халқы кетиўи менен фараон Мысырдан шығып кетиўине оларға рухсат бергенине пушайман болған еди.
– Бизлер оларға жетип алыўымыз керек! – деди ол әскерлерине, – Бизлер оларды қайтарып алып келип, қатты жазалаймыз. Тез шабатуғын атларға жегилген еки дөңгелекли саўаш арбаларда, басшылары қасында турған арбаларға жайласқан оқжайшылар жәрдеминде мысырлылар олардың излерине қарай атланды.
Израил уллары Қанан елине қарай жүрип кетти. Қудайдың Өзи оларға жол көрсетти. Ол күндиз минара сыяқлы булт көринисинде олардың алдында жүрген болса, ал түнде сондай минара сыяқлы от көринисинде, олардың жолларына жақтылық пенен тәмийинлеп жүрди. Булт тоқтағанда, Муўсаның буйрығы менен халық шатырларын тигип, дем алды. Бирақ булт ҳәрекетлене баслаған ўақытта, израиллылар және жолға түсти.
Солай етип, олар Қызыл теңизге жетип келип, теңиз жағасына жайласты. Олар шатырларын еле тигиўге үлгермей атырғанда, ойламағанда арқадан атлардың даўысын ҳәм дүбирлисин еситти. Мысыр тәрепке қарап, Израиллылар узақтан фараонды, оның атлы арбаларын ҳәм атлы болған көп әскерлерин көрди. Фараон оларды Мысырға қайтарыў ушын қуўып киятырған еди.
Израиллылар албырап, жақынласып киятырған арбаларға қарап қатып қалды. Не ислеў керек? Алдында теңиз, артында фараон өз әскерлери менен. Израил халқы жүдә қорқып, Муўсаны былай деп айыплай баслады:
– Неге бизлерди шөлде өлиўге алып келдиң? Бул жерде өлгенимизден гөре, мысырлыларға қул болып қалғанымыз жақсы еди.
Бул сөзлери менен олар шүкирликсизлик қылды, бирақ Муўса оларды мүләйимлилик пенен исендирип, былай деди:
– Қорқпаңлар! Бүгин Жаратқан Ийе сизлерге қалай жәрдем беретуғынын көресиз! Ол сизлер ушын гүреседи, сонлықтан, сизлер өзиңизди басып, тынышланың!
Соңынан, ғайрытәбийий бир ўақыя жүз берди: күндизи израил халқының алдында жүрип, оларға жол көрсетип жүрген булт Израил халқы менен Мысыр әскерлери ортасына жайласып турып алды. Мысырлылар тосаттан өзлериниң алдында қалың бултлы дийўалды көрди. Бул оларды қорқынышқа салды ҳәм фараон оларға булт кеткенше күтиўди буйырды.
Бул булт мысырлылар тәрепинде қаншелли қараңғы болса, Израил уллары тәрепинде жолға соншелли жақтылық таратып туратуғын еди. Израиллылардың қорқынышы бираз кемейди. Бирақ олар енди не ислеў керек еди? Ҳәмме Муўсаға қарады, сол ўақытта Қудай оған былай деди:
– Таяғыңды көтер, қолыңды теңизге соз ҳәм Израил халқы қурғақлықтан, теңиздиң ортасынан өтеди.
Муўса теңиз бойында турып, қолын суўға қарай көтерди. Теңиз көбикленип, самал көтерилип, ол барған сайын күшейип бара берди. Самал соншелли күшли ескенликтен, ҳәттеки, суўды жән-жаққа ысырып жиберди. Теңиз ортасында кең қурғақлық пайда болды. Ақырында, олардың алдында өтиў ушын жол пайда болды. Жолдың еки тәрепинде суў дийўалдай болып, самал тәрепинен услап турылды. Қудай кәрамат көрсетти!
Израиллыларға батырлық қайтып келди. Олар шаңарақ изинен шаңарақ болып, теңиздиң ызғар ултаны менен жүрип баратырған Муўсаның изинен жүре баслады.
Бултлар мысырлылар алдынан әсте көтерилгенинде, олар асығыслық пенен атларын шаба баслады. Теңизден өтип атырған жолды көрип, олар сол жол бойлап жуўырды. Көп өтпей, арбалардың дөңгелеклери ызғар болған қумға бата баслады, бирақ фараон ары келип өз әскерлерин алдыға илгерилей бериўге шақырды. Усы ўақыт аралығында пүткил израиллылар теңиздиң басқа тәрепине жетип алған еди. Муўса теңизге бурылып, таяғын оның үстине түсирди. Самал сол ўақыттың өзинде ақ есиўди тоқтатып, теңиз суўлары бурынғы орнына, артқа қайтты. Израиллылар таң қалып, теңизге қарап турды. Мысырлылар суўдың астында көринбей қалды, тек ғана бирнеше арба бөлеклери суў үстинде қалқып жүрген еди.
Израиллылардың барлығы бир адамдай қуўанышқа толып, Муўса менен бирге салтанатлы алғыс қосығын айтты.
– Ийем мениң күш-қудиретим ҳәм даңқым мениң. Ол мениң қутқарыўшым болды. Ол мениң Қудайым, соның ушын мен Оны ҳәр қашан уллылайман!
СОРАЎЛАР:
1. Не ушын мысырлылар израиллылардың изинен қуўа баслады?
2. Ийемиз фараон әскерлерин қалай тоқтатты?
3. Қудай теңизди қалай етип екиге бөлди?
