Жартастан аққан суў
Мухаддес Китап, Санлар китабы, 20: 1-13-аятлар, 22-29-баплар
Израиллылар бир орыннан екинши орынға көшип, шөлде узақ жылларды өткерди. Бир күни олар суў жоқ жерге келди. Сонда олар не қылды? Қудайға дуўа етти ме ямаса тоңқылдап баслады ма? Тилекке қарсы, олар қандай да бир сынаўға дус келгенде, ҳәмме ўақытта әдетте қылғанындай, Муўса менен Харонға қарсы шықты. Олар былай деди:
– Неге бизлер алдынырақ өлип кетпедик? Не ушын бизлерди Мысырдан алып шықтыңлар, шөлде өлиўимиз ушын ба? Бул жерде әнжир де, жүзим де, улыўма ҳеш қандай мийўелер жоқ, ҳәттеки ишетуғын суў да жоқ!
Олар өзлериниң Қудайға исенбегени ушын шөлде қалғанын умытып та кетти. Бул тоңқылдыны еситип, Муўса менен Харон қатты қапа болды. Олар халықтан узағырақ жерге барып, Ушырасыў шатырының алдына келди де, ет-бети менен жерге жығылды да, дуўа етти. Көп ўақыт өтпей Қудай оларға сөйледи.
Ол Муўсаға былай деди:
– Таяғыңды алып, халықты бир жерге жыйна. Кейин жартастың қасына барып, оған суў бериўин айт ҳәм жартастан суў шығады.
Ал Муўса ҳәм Харон халыққа соншелли қатты ғәзепленген еди. Олар:
– Ҳәй, бойсынбайтуғын халық, мына жар тастан сиз ушын суў шығарып бериўимиз керек пе екен? – деди.
Кейин Муўса қолындағы таяғын жоқары көтерди де, жартасты еки мәрте урды: суў атлығып шықты, халық суў ише баслады ҳәм малларын да суўғарды.
Муўса менен Харон дурыс ис-ҳәрекет қылды ма? Муўса бир неше қәтеге жол қойды. Ол жартасты таяғы менен урыўының ҳәжети жоқ еди, ал тек ғана оған айтыўы керек еди! Оннан қала берсе, Муўса да, Харон да жартастан суў шығатуғынына екиленген еди. Сонда да Жаратқан Ийе халқына мийримин түсирип, суў берди. Сонда Қудай Муўса менен Харонды жазалап:
– Усылай ислегениңиз ушын, сизлер Қанан жерине кирмейсизлер, – деди.
Бул олар ушын жүдә қатал түрдеги жаза еди. Муўса көбинесе Ибрайымның қурбанлық орнын қурып, Қудайға сыйынған Қанан жерин көриўди жүдә қәлеп жүрген еди. Бирақ усы ўақыядан соң, оның әрманы пушқа шыққан еди.
Муўса жер жүзиндеги ең кишипейил инсан болған еди. Израиллылар көбинесе оған наразы болды, оған урысып, қатты сөйледи, бирақ ол ҳеш қашан оларға қарсы гәп қайтармады. Ол тек ғана усы жерде өзин услай алмай қалған еди.
СОРАЎЛАР
1. Халық және суў болмай қалған ўақытта не иследи?
2. Жартастан суў шығарыў ушын, Қудай Муўсаға қандай буйрық берген еди?
3. Муўса буның орнына не қылды?
4. Қудай Муўса менен Харонды қалай жазалады?
