Нун улы Ешуа ҳаққында ўақыя
Рахаб ҳәм жансызлар
Мухаддес Китап, Ешуа китабы 1-2 баплар
Муўсаның өлиминен соң, Нун улы Ешуа Израил халқын ўәде етилген жерди ийелеўи ушын таярлап баслады. Егер Ешуа Қудайдың буйрықларына әмел қылып, Оған бойсынса, Жаратқан Ийе оған жәрдем бериўин ўәде етти. Қудай оған:
– Күшли ҳәм мәрт бол. Өйткени Қудайың Жаратқан Ийе сен баратуғын ҳәр бир жерде сениң менен бирге болады! – деди.
Ешуа халыққа үш күнлик жол ушын азық-аўқат таярлаўды буйырды, себеби олар енди Иорданның арғы жағасына өтеди. Бул жерди Қудай оларға беремен деп ўәде қылған еди, сонлықтан да ол ўәде етилген жер деп аталған еди. Ешуа абайлап ҳәрекет етти. Ол алды менен сол жерди, әсиресе Ерихоны көзден өткериў ушын еки жансызды жибериўди шешти. Еки жигит қалаға кирди ҳәм түнеп қалыў ушын, Рахаб деген ҳаялдың үйинде қалды. Оның үйи қаланың дийўалында жайласқан еди. Ерихоның патшасы бул ҳаққында хабар тапқанда, ол өзиниң хызметкерине сол израиллыларды тутқынға алыўды буйырды. Бирақ Рахаб оларды үйиниң төбесине жасырып қойды, ал патшаның хызметкерлерине:
– Сол адамлардың маған келгени ырас. Бирақ мен олардың қай жерли екенин билмеген едим. Геўгим түспестен бурын, қала дәрўазасы жабылайын деп атырғанда, олар шығып кетти. Олардың қай жаққа кеткенин билмеймен. Излеринен дәрҳал қуўып кетсеңиз, жетип аласызлар, – деди.
Патшаның адамлары жансызларды Иордан дәрьясын кесип өтетуғын жерге қарай қуўып кетти. Рахаб мийманларына қарай жоқары көтерилип, былай деди:
– Жаратқан Ийениң бул елди сизлерге бергенин билемен. Бизлерди сизлер себепли қорқыныш бийледи. Себеби сизлердиң Қудайыңыз Жаратқан Ийе – жоқарыдағы аспанда да, төмендеги жер жүзинде де Қудай. Сизлерге жақсылық еткеним сыяқлы, сизлер де мениң үй-ишиме жақсылық ететуғыныңызға Жаратқан Ийе ҳақы ант ишиңлер. Жақынларымды ҳәм олардың үй-ишлерин өлимнен сақлап, ҳәммемизди аман қалдыратуғыныңызды билдиретуғын исенимли бир белги бериңлер.
Жансызлар Рахабқа оның өзи ҳәм оның шаңарағы аман қалатуғынын айтып, ўәде берди. Сонда Рахаб адамларға арқан менен әйнектен төменге түсиўине жәрдем берди. Кетип баратырып, израиллы адамлар Рахабқа усы елге киргенимизде, мына қырмызы арқанды бизлерди түсирип жиберген әйнегиңе байлап қой, деп айтты. Бул шәртли түрдеги белги болып, усы арқалы оның өзи ҳәм үйинде болған шаңарақ ағзаларының барлығы қутқарылыўы сөзсиз болады. Соннан соң, адамлар қаладан шығып кетти.
Олар табыслы түрде Ешуаға қайтып келди ҳәм өзлери менен не жүз бергенин айтып, мына сөзлер менен жуўмақлады:
– Жаратқан Ийе ҳақыйқаттан да усы жердиң барлығын бизлердиң қолымызға тапсырыпты ҳәм қала турғынлары қорқыныштан қалтырасып жүр.
СОРАЎЛАР
1. Жаратқан Ийе Ешуаға нени ўәде қылды?
2. Ешуа Қанан жерине кирместен алдын не иследи?
3. Жансызлар қалай аман қалды?
